Avropa İttifaqının Cənubi Qafqaz məsələləri üzrə xüsusi nümayəndəsi Toivo Klaar İrəvana səfəri çərçivəsində Baş nazir Nikol Paşinyanla görüşüb. Görüşdə tərəflər bir sıra məsələləri müzakirə edib.
Paşinyan Avropa Şurasının rəhbəri Şarl Mişelin regionda stabillik və qarşılıqlı anlaşma mühitinin güclənməsindəki fəaliyyətini yüksək qiymətləndirdiyini deyib. Görüşdə Cənubi Qafqazda baş verən hadisələr, sülh və stabillik üçün atılan addımlara toxunulub. Eyni zamanda Soçi və Brüsseldəki üçtərəfli görüşlərin nəticələri müzakirə edilib. Tərəflər Ermənistan-Türkiyə münasibətlərinin nizamlanması prosesi haqda da danışıblar.
Maraqlıdır ki, görüşdə Azərbaycan Silahlı Qüvvələrinin nəzarətinə keçmiş ərazilərdə “erməni mədəni irsinin” qorunub-saxlanması probleminə beynəlxalq ictimaiyyətin ardıcıl diqqət yetirməsinin zəruriliyi qeyd edilib. Xüsusilə bir sıra “erməni abidələrinin dağıdılması” nəzərə alınaraq, YUNESKO missiyasının Qarabağ münaqişəsi zonasına buraxılmasının təmin edilməsindən danışılıb.
Yaxşı, bəs onda niyə Azərbaycanın çoxsaylı yaşayış məntəqələrinin, mədəni irsinin yerlə yeksan olunmasına görə Avropa rəsmiləri və YUNESKO narahat olmur? Hansı “erməni mədəni irsindən” dəm vururlar?
“Bütün bunlara rəğmən, Aİ rəsmisi Toivo Klaarın erməni təbliğatının təsiri altına düşməsi təəssüf doğurur”
Məsələyə münasibət bildirən politoloq Tural İsmayılovun fikrincə, erməni vandalizmini görməzdən gəlmələri növbəti riyakarlıq göstəricisidir: “Problem ondadır ki, 30 il ərzində Ermənistanın işğal etdiyi ərazilərdə törətdiyi vandalizm aktları ilə bağlı nə Avropa İttifaqı, nə də YUNESKO tərəfindən heç bir addım atılmayıb. Bugünə qədər Azərbaycanın davamlı çağrışlarına baxmayaraq, maddi və mədəni irsimizin dağıdılması ilə bağlı YUNESKO tərəfindən hansısa bir tədbir görülməyib. Nəinki tədbir görülməyib, ümumiyyətlə, buna etiraz belə etməyiblər. YUNESKO rəhbəri Ludri Azurenin bu məsələ ilə bağlı tutduğu qeyri-obyektiv mövqe nəticəsində Azərbaycanın dağıdılan maddi-mədəni irs nümunələri, ekologiyanın məruz qaldığı terror barədə heç bir hesabatda məlumat öz əksini tapmayıb. Təqdiredici hal ondan ibarətdir ki, bugünə qədər Azərbaycana qarşı qərəzli mövqe sərgiləyən ABŞ Dövlət Departamentinin sonuncu hesabatında ölkəmizin mədəniyyət abidələrinin məhv edilməsi öz əksini tapıb. Lakin yenə də ümid edirik ki, Dövlət Departamentinin növbəti hesabatlarında, YUNESKO-nun addımlarında bu öz əksini tapacaq. Çünki Ermənistan tərəfindən Azərbaycana qarşı çoxvektorlu mədəni terror həyata keçirilib. Bütün bunlara rəğmən, Aİ-nin Cənubi Qafqaz məsələləri üzrə xüsusi nümayəndəsi Toivo Klaarın erməni təbliğatının təsiri altına düşməsi təəssüf doğurur. Onun erməni rəsmiləri ilə görüşdə Azərbaycan mədəniyyət abidələrinin başına gətirilən oyunu vurğulamaması təəssüf doğurur. Bu, T.Klaarın nə qədər cəsarətsiz siyasətçi olduğunu göstərir. Hansısa “erməni irsindən” danışır, amma Azərbaycanda törədilən vandalizm aktlarını görməzdən gəlir. Birinci Qarabağ müharibəsində itkin düşən 4 min nəfər azərbaycanlı barəsində danışmır. Halbuki, Avropa İttifaqı itkin düşən azərbaycanlıların taleyinə aydınlıq gətirmək üçün Ermənistana təzyiq göstərməlidir. Əfsuslar olsun ki, bütün bunlar baş vermir”.
Politoloq onu da əlavə etdi ki, Aİ ədalətli mövqe sərgiləmək istəyirsə, o zaman T.Klaar danışıqlarda ehtiyatlı mövqe sərgiləsin.
Vidadi ORDAHALLI
