Ülkü Ocakları Təhsil və Mədəniyyət Vəqfinin sədri Ahmet Yiğit Yıldırımın sosial şəbəkədə paylaşdığı, Egey dənizinin də yer aldığı “Dənizlərdəki Milli Paktımız” adlı xəritənin Yunanıstanda yaratdığı müzakirəyə Almaniya da qatılıb.
Vəqf sədrinin MHP lideri Dövlət Baxçalının sosial media hesabında ona hədiyyə etdiyi xəritəni paylaşması Yunanıstanda böyük təəssürat yaradıb. Yunanıstanın baş naziri Kiryakos Mitsotakis rəsmi Twitter hesabından paylaşdığı mesajla xəritəyə reaksiya verib. Amerikanın Associated Press (AP) xəbər agentliyi Mitsotakisin Tvitter hesabından "Yunanıstan baş naziri Türkiyədəki böyük Yunan adalarını göstərən xəritəni ciddi şəkildə tənqid etdi" başlığı ilə xəbər yayıb.
Kathimerini bəyan edib ki, Egey dənizinin şərqindəki adaların Türkiyəyə aid olduğunu göstərən xəritənin Ankaradakı “hökumət ortağı” tərəfindən ictimaiyyətə açıqlanması Afinada böyük narahatlığa səbəb olub. Qəzetə danışan diplomatik mənbələr xəritəni “xüsusilə təhqiredici, təxribat xarakterli və qınaq obyekti” kimi qiymətləndiriblər. Kathimerini həmçinin qeyd edib ki, diplomatik mənbələr xəritəni Türkiyədə artan ekstremist diskursun bir hissəsi kimi görürlər.
Dövlət Baxçalıya hədiyyə edilən rəsmlə başlayan müzakirədə Almaniyanın Yunanıstandakı səfiri Ernst Reichel söz açıb və Almaniyanın mövqeyinin aydın olduğunu bildirib.
Səfir verdiyi açıqlamada Yunanıstanın ərazi bütövlüyünün şübhə altına alınmasının qəbuledilməz olduğunu bildirib. Ərdoğandan izahat istəyən Yunanıstanın baş naziri Kyriakos Mitsotakisin şərhini retvit edərək, “Almaniyanın mövqeyi aydındır: Yunanıstanın ərazi bütövlüyü və suverenliyinin hər hansı şübhə altına alınması qəbuledilməzdir” deyib.
Yunanıstanın baş naziri Miçotakis açıqlamasında bu ifadələrdən istifadə edib:
"Bu xəritəyə yaxşı baxın. Krit, Rodos, Lesbos, Sakız adaları, Samos Türkiyə tərəfindən yeyilib. Ekstremistlərin alovlu arzusu, yoxsa Türkiyənin rəsmi siyasəti? Başqa bir təxribat, yoxsa əsl hədəf? Prezident Ərdoğan öz mövqeyini dəyişdi. Koalisiya tərəfdaşının son qəribəlikləri aydınlaşdırılmalıdır”.
Abutalıb Səmədov: “Belə həssas məqamda bu cür addımların Türkiyəyə yalnız ziyanı var”
Belə həssas bir dönəmdə millətçilərin etdiyi bu hərəkətin Türkiyəyə xeyri var, yoxsa ziyanı?Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, qardaş ölkənin ayrı-ayrı siyasətçiləri dəfələrlə bu cür yanlış addımlar atıblar: “Zamanında Turqut Ozalın XXI əsr türk əsridir deməsi, Dövlət Baxçalının Ərdoğana xeyli ölkəni narazı salan xəritə hədiyyə etməsi və nəhayət bu addım son dərəcədə yanlışdı. Bu, Türkiyə dövlətinin maraqlarına kökündən vurulan zidd addımdır. Çin kimi ölkəyə fikir verək. Heç bir ölkəni qıcıqlandırmadan ağılasığmaz səviyyədə irəliləyir. Görün, Türkiyə bu səviyyədə irəliləyə bilirmi? Hər dəfə iqtisadiyyatda bir balaca irəliləyiş olan kimi bu cür yanlış addımlar ortaya çıxır və nəticədə Türkiyə geriləməyə başlayır. Biz Türkiyənin güclənməsini istəyirik. Ancaq bunu hay-küysüz, düşmənləri qıcıqlandırmadan etməliyik. Türkiyəni yalnız bu yolla qorumaq olar. Təəssüf edirəm ki, Baxçalı kimi radikal addımlar atan siyasilər hakimiyyətin ortağı mövqeyindədirlər. Onun atdığı addımlar Türkiyə hökumətinin iradəsinin ifadəsi kimi qəbul edilir. Bu səbəbdən Türkiyə ciddi sıxıntılarla üz-üzədir. Buna görədir ki, ABŞ-ın Yunanıstanla olan hərbi müqaviləsi uzadıldı. Əslində belə müqaviləyə ehtiyac da yoxdur. Çünki hər iki ölkə NATO üzvüdür. ABŞ Yunanıstanda 9 hərbi baza yaradıb. Bütün bunlar Türkiyəyə qarşıdır. Biz Fransadan da analoji addımlar görürük. Belə həssas məqamda bu cür addımların Türkiyəyə yalnız ziyanı var”.
Samir Adıgözəlli: “Türk millətçi gəncləri ənənəvi mövqelərini ifadə ediblər”
İctimai Siyasi Proseslər Beynəlxalq Əlaqələr Mərkəzinin ( İSBAM) rəhbəri Samir Adıgözəlli isə fərqli düşünür. O qəzetimizə bildirdi ki, hansısa partiyanın gənclər qolunun belə bir addım atmasında qeyri-adi nəsə yoxdur: “Bunu qətiyyən Türkiyənin rəsmi mövqeyi kimi qəbul edə bilmərik. İstənilən ölkədə belə mövqedə olan millətçi yönümlü siyasi təşkilatlar var. Yunanıstan hətta rəsmiləri səviyyəsində dəfələrlə Türkiyəyə qarşı ərazi iddiaları irəli sürüb. Türkiyəyə aid sualardakı təbii sərvətlərin mənimsənilməsi istiqamətində dünya gücləri ilə qardaş ölkəyə qarşı iş çevirirlər. Bütün anti-Türkiyə mövqeyində olan ölkələrlə yaxından əməkdaşlıq edirlər. Məgər siz bizim ölkədə hansısa partiyanın Dərbəndin, Təbrizin, Borçalının əzəli Azərbaycan torpaqları olduğunu bəyan etməsini eşitməmisiniz? Həmin ölkələr bizə qarşı müharibə elan edib? Razıyam ki, bu fikri Türkiyə rəsmən bəyan etsəydi, yanlış olardı. Burada qeyri-adi nəsə görmürəm. Türk millətçi gəncləri ənənəvi olan mövqelərini ifadə ediblər”.
Məhəmmədəli QƏRİBLİ
