Gürcüstanın hakim “Gürcü Arzusu” Partiyasının dörd bələdiyyədə dövlət vəzifələri tutan 4 üzvü istefa verib. Laqodexi, Çiatura, Tercola və Axaltsixe bələdiyyələrinin yerli hakimiyyət orqanlarının nümayəndələri partiya sıralarını tərk edib.
Laqodexi bələdiyyəsi sədrinin müavini Giorgi Qambaşidze, Çiatura şəhər şurasının üzvü Nikoloz Samxaradze, Tercola şəhər şurasının sədr müavini Omar Cixvaşvili və Axaltsixe şəhər şurasının sədr müavini Saba Kbilaşvili partiya ilə yanaşı, tutduqları vəzifələrindən də istefa verdiklərini elan ediblər.
Onlar bununla “Gürcü Arzusu”nun sıralarını bu yaxınlarda tərk etmiş və Qərbi Gürcüstanı müharibəyə cəlb etməkdə cəhddə günahlandıran Sozar Subari, Mixeil Kavelaşvili və Dmitri Xundadzeyə dəstəklərini ifadə ediblər.
Maraqlıdır ki, istər bundan əvvəl hakim partiyadan istefa verən deputatlar, istərsə də onlara istefa ilə dəstək verən bələdiyyə üzvləri ABŞ-ın Gürcüstandakı səfirini onların ölkəsini müharibəyə sürükləməkdə günahlandırır. Bütün bu proseslər Gürcüstanın Avroittifaqa namizəd kimi qəbul edilmədiyindən sonra başlanıb. Nə baş verir?
Politoloq Elşən Mustafayev “Bakı-Xəbər”ə açıqlamasında bildirdi ki, Avropanın elan etdiyi məqsədlərlə onun atdığı addımlar arasında ciddi disbalans hiss edilir: “Saakaşvilinin hakimiyyətdən getdiyi dönəmdə Gürcüstanda fərqli bir tendensiya yaşandı. Onun tərəfdarlarının çoxu ölkəni tərk etdi. Görünən bu oldu ki, Avropa dəyərləri özünü həmin coğrafiyada çox da doğrultmur. Postsovet ölkələri arasında cinsi azlıqlara qarşı ən total etiraz məhz Gürcüstanda oldu. Bu çirkli mövzular Avropa dəyərlərini gözdən salmış olur. Bu gün Gürcüstanın özü üçün də Avropa Birliyinə üzvlük məsələsi heç prioritet sayılmır. Həmin ölkə təhlükəsizliyi və iqtisadiyyatı ilə bağlı daha ciddi problemlərin öhdəsindən gəlməyə çalışır. Rusiya bu aqressiv vaxtında AB üzvlüyünə namizəd olub, özünü hədəfə gətirmək istəmir. Ukrayna nümunəsi göstərdi ki, Qərb üçün ölkələrin dağılması narahatedici deyil. Hakim partiya Avroittifaqa üzvlüklə bağlı bəzi öhdəlikləri yerinə yetirmək istəyir. Hakim "Gürcü Arzusu-Demokratik Gürcüstan" partiyasının sədri İrakli Kobaxidze məlumat verib ki, Gürcüstanın seçki sistemində dəyişiklik ediləcək. Bildirilib ki, hakim partiya bununla bağlı üzərinə siyasi öhdəlik götürüb.
Onun sözlərinə görə, 2024-cü ildə parlament və növbəti seçkilərin tam olaraq proporsional sistem və 2 faizli seçki baryeri ilə keçirilməsini nəzərdə tutan qanun qəbul olunacaq. Gürcüstan parlamenti qanunu ölkənin Avropa İttifaqına üzvlüyə namizəd statusu almasından sonra ən geci bir aydan sonra qəbul edəcək.
O qeyd edib ki, bununla bağlı siyasi öhdəliyi “Gürcü Arzusu”nun Siyasi Şurası və parlament çoxluğu öz üzərinə götürür.
Partiyanın sədri bildirib ki, Gürcüstanın üzvlüyə namizəd statusu əldə etməsi əvvəlcə ölkədə qütbləşmənin səviyyəsini azaltmağa, daha sonra seçki baryerinin aşağı salınmasına kömək edəcək.
İstefa verənlər hesab edir ki, bu vədlə ABŞ və Avropa Gürcüstanı Ukraynada olduğu kimi Rusiya ilə müharibəyə sürükləyir. Həm istefalar, həm də ABŞ səfirinə olan hücumun səbəbi bununla bağlıdır”.
Məhəmmədəli QƏRİBLİ
