Türkiyə Ermənistanla münasibətləri normallaşdırmaq üçün Ankara və ya İrəvanda növbəti görüşün keçirilməsini təklif edib, lakin hələlik cavab yoxdur.
Bu barədə Türkiyə mətbuatı diplomatik mənbələrə istinadən məlumat verib:
“Əgər söhbət iki ölkə arasında münasibətlərin tənzimlənməsi prosesindən gedirsə, danışıqların üçüncü dövlətlərin və qüvvələrin iştirakı olmadan aparılması məntiqli olardı. Biz görüşün Ankara və ya İrəvanda keçirilməsini təklif etdik, lakin hələlik cavab almamışıq”.
Qeyd olunur ki, Türkiyə ilə Ermənistan arasında münasibətlərin normallaşmasına maneələrdən biri də erməni diasporunun təzyiqidir: “Bəzi hallarda proses sabotaj edilir. Amma ümid edirik ki, nizamlanma prosesi davam edəcək”.
Xatırladaq ki, Ermənistan tərəfi Türkiyə ilə danışıqların sürətləndirilməsini, tezliklə sərhədlərin açılmasını təklif edib.
Dünyadakı erməni diasporu bundan niyə narahatdır və prosesi sabotaj etməyə gücləri çatacaqmı?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan dövlət kimi bu təmasda maraqlıdır: “Ermənistan fərqindədir ki, Türkiyə ilə münasibətlərinin nizamlanması Ermənistan iqtisadiyyatına müsbət təsir göstərəcək və bu addımı atmaq planlaşdırır.
Paşinyan və Erdoğan arasında telefon danışığı və bu danışıqda Ermənistanın baş nazir və Türkiyə prezidenti üçüncü ölkələrin vətəndaşları və yük daşımalar üçün sərhədlərin açlması məsələlərini müzakirə ediblər. Bu kimi təmaslar Ermənistan-Türkiyə münasibətlərinin normallaşması prosesində daha bir addımdır.
Əslində, Ermənistan sərhədləri yükdaşımalara açmaqla, bölgə ölkələri arasında iqtisadi-ticari əlaqələrdə iştirakla Avrasiyanın nəqliyyat şəbəkəsinə qoşulmaq məqsədini güdür.
Ermənistan Türkiyəyə belə dəhliz imkanı yaratmaqla, onun regionda əsas iqtisadi tərəfdaşı olan Azərbaycana birbaşa quru yolunu reallaşdırır. Bununla ona təsir aləti formalaşdırmaq iddiasındadır.
Bu dəhliz Türkiyə üçün həm də Mərkəzi Asiya ilə iqtisadi səmərəli əlaqələrin genişlənməsi deməkdir və Ermənistan bunun fərqindədir.
Erməni lobbisi və diasporası da fərqindədir ki, Türkiyə ilə münasibətlərin normallaşması, sərhədlərin açılması, Türkiyə biznesinin Ermənistan bazarına girməsi ilə cəmiyyətdə də Türkiyəyə münasibətdə müəyyən liberallaşma gedəcək. Aydındır ki, 100 ildən çoxdur bütün dünyada erməniləri bir çətir altında öz maliyyə ehtiyacları üçün istismar edən erməni lobbisi əlindən belə bir rıçağın çıxmasını istəmir.
Çünki 100 ildən çoxdur ki, məhz Türkiyə və türkə nifrət üzərindən erməni diasporu bütün dünyada şəbəkələşmiş geniş biznes-sindikat qurub. Onlar bəzən leqal, çox vaxt isə kriminal üsullarla bu milli ideoloji biznes strukturu hesabına varlanırlar.
Diaspora və onun ölkə daxilindəki təsisatları məhz bunun üçün Ermənistan-Türkiyə sərhədlərinin açılması Ermənistanı uzun müddət iqtisadi baxımdan Türkiyədən asılı vəziyyətə salacaq təbliğatını apararaq, prosesi sabotaj edir.
Eyni zamanda, sərhədlərin açılmaması üçün hakimiyyətə daxildən birbaşa, xaricdən isə fəaliyyət göstərdikləri ölkələrin bir sıra rəsmiləri vasitəsilə prosesin əleyhinə açıq və örtülü mesajlar verirlər. Terrorla əlaqəli olan erməni diasporu bu yollarla nəticə əldə etməyəcəyi halda, daha radikal addımlara, terror törətməyə qədər əl atacaq”.
Məhəmmədəli QƏRİBLİ
