Tanınmış jurnalist Mirşahin Ağayev müəllifi və aparıcısı olduğu “Mirşahinin vaxtı” verilişində bir sıra telekanalları sərt tənqid edib. Aparıcı Azərbaycanda peşəkar medianın, peşəkar jurnalistlərin özünü ifadə etməsi üçün sağlam rəqabət mühitinin yaradıldığını deyib:
“Peşəkar jurnalistlər bu gün daha açıq, sərbəst şəkildə öz fikirlərini ifadə edirlər. Yeni qaydalara, daha doğrusu peşəkar əxlaqa uyğunlaşmayan reketlər, çığallar da açıq görünür. Çünki hələ dünən onlar media məkanında olan qeyri-sağlam mühitin fonunda özlərini göstərə bilir, bulanıq suda balıq tutmağı bacarırdılar. İndi isə sular durulub. Peşəkar media fonunda onlar öz ənənəvi oyunlarını daha oynaya bilmirlər. Həmin insanlaradır sözüm. O vaxtlar keçib artıq. Peşəkarlığa doğru dəyişin, rəqabətdə dözə bilmirsizsə, cığallıq da etməyin. Əvvəllər mediamız boz rəngdə idi. Siz məhz o bozun fonunda rəngarəng görünürdüz. Amma indi artıq AzTV-də də tənqid var, İTV-də də, REAL TV-də də. Problemli məsələ peşəkar şəkildə qaldırılır, problemin üzərinə gedilir. Belə olan halda siz sadəcə artıq olursuz”.
Mirşahin Ağayev açıq yayımda olan televiziyalara da iradlarını bildirib:
“Biz qalib Azərbaycana hələ ki, layiq ola bilmirik. Son zamanlar Azərbaycan teleməkanında inkişaf meylləri var. Fasiləsiz xəbər xidməti olan kanalımızdan danışmayacam, təvəvökarlıqdan uzaq görünər deyə. Amma AzTV-nin, İTV-nin, ARB-24-ün timsalında müsbət dəyişiklikləri görməmək olmaz. Dünya auditoriyasına çıxmağı bacaran CBC var, Xəzər TV artıq öz simasını müəyyənləşdirir və təəssüf ki, yerdə qalan bir neçə kanalımız var. Onlar yerdə qalıblar. Ağır da olsa, deməliyəm. Heyif ki, ictimai zövqü korlayırlar. Məndə olan dəqiq məlumatlara görə, bu kanalların rəhbərləri Prezident Administrasiyasına çağırılıb, onlara ən kəskin şəkildə iradlar bildirilib. Hətta bəzi verilişlərin oyunbazlıq məkanına, pul yığımı məntəqəsinə çevrilməsi, sonra da yığılan vəsaitin dəllallar arasında bölünməsi, bununla da bütün ölkə ictimaiyyətini aldatmaq, təhqir etmək kimi halların olduğu sərt şəkildə kanal rəhbərlərinə çatdırılıb. Məndə məsələnin hüquq-mühafizə müstəvisində araşdırma perspektivinin olması barəsində də məlumatlar var. Ona görə də, hörmətli həmkarlar, hər şey pulla ölçülmür. İctimai fikrə, ictimai zövqə, Azərbaycanın mədəni, etik davranış sisteminə, mənəvi dəyərlərimizə zərər, zərbə vurduğunuzun fərqində olun”.
Göründüyü kimi, Mirşahin Ağayev telekanallardakı biabırçılığı ümumi mənada deyil, konkret ünvanlar göstərərək sərt tənqid edib. Müsbətə doğru irəliləyişin olduğu bəzi kanalların adını çəkirsə, deməli, onun səsləndirdiyi tənqidin ünvanı adlarını sadalamadığı telekanallardır. Maraqlıdır ki, Mirşahin Ağayaevin bu ünvanlı tənqidinə cavab özünü çox gözlətməyib. Belə ki, ATV-nin direktoru Azər Xəlilov öz sosial şəbəkə hesabından yazdığı statusda rəhbəri olduğu kanalın ölkədə ən böyük izləyici auditoriyası olan media resursu olduğunu bildirib:
“Qarabağın tarixi və Qarabağ həqiqətlərini Azərbaycan və dünya auditoriyasına elmi-kütləvi proqramlar silsiləsi vasitəsilə çatdıran fərqli özəl telekanal. Erməni işğalından azad edilmiş torpaqlarımızdan sistemli və davamlı verilişlərin özəyi olan ATV telekanalı. Baxıldıqca sevilir, sevildikcə söyülür, söyüldükcə baxılır! ATV nə yerdə qalıb, nə də yerində qalıb. ATV öz yerini bilir, yolunu gedir, irəliləyir. Dostlarını sevindirir! Az bilmir, çox danışmır, baxılanı göstərir".
Doğrusu, Mirşahin Ağayevin haqlı iradlarına Azər Xəlilovun cavab verməsi olduqca təəccüblüdür. Etiraf edək ki, Mirşahin Ağayevə bir jurnalist kimi cəmiyyətdə birmənalı münasibət yoxdur. Etdiyi sərt və ziqzaqlı, əksər hallarda isə anlaşılmayan manevrlərə görə haqlı olaraq sərt tənqidlərə tuş gəlir. Ancaq bütün bunlara baxmayaraq, kimsə Mirşahinin diletant telejurnalist olduğunu deyə bilməz. Onun müstəqil telekanallarımızın yaranmasında bəlli təcrübəsi və ortaya çıxardığı “məsullar” var. Bu xüsusda ən azı 3 özəl telekanalın adını çəkə bilərik. Birincisi özəl telekanallarımızın ilk qaranquşu sayılan “215 KL” olub, sonra “ANS” kimi baxımlı bir kanalın ərsəyə gəlməsində onun əvəssiz xidmətləri olub. İndi isə “Real TV” də fərqli nələrsə etməyə çalışır. Bəs Azər Xəlilov televiziya arenasında kimdir və hansı xidmətləri olub? Adam uzun müddət yaxşı əmək haqqı almaqla böyük dünya KİV-ləri ilə əməkdaşlıq edib. Bəlli və burada detallı danışılmasına lüzum görmədiyimiz bir situasiyanın yetişməsi səbəbi onun Londondan təyyarəyə oturub Bakıya uçmasını zəruri etdi. Bununla da, Azər Xəlilov “nə yoğurdum, nə yapdım, hazırca kökə tapdım” kimi klassik deyimə uyğun olaraq telekanal rəhbərinə çevrilmiş oldu. Ancaq Azər Xəlilovun hazır kökə tapmasından xeyli müddət keçib. Bu zaman istənilən telekanalı sıfır nöqtəsindən zirvələrə qaldırmaq üçün kifayət edirdi. Təəssüflər olsun ki, biz ATV-nin yayım siyasətində onun rəhbərinin öyündüyü inkişafı, tərəqqini müşahidə etmirik. Doğrudan da, yaxşı ki, dövlətin ciddi nəzarəti olduğu bəzi telekanlalra var. Bu gün dünyada kimsə Azər Xəlilovun rəhbərlik etdiyi telekanala baxanda deyir ki, görəsən, belə də millət var imiş?! Kim kimin başını qırxdı, kim qaynanası ilə dalaşdı, bütün ailə məsələləri açılıb tökülür, ya da bahalı reklam şərtləri ilə həkim və kulinar məsləhətləri verilir. Bizim bunlardan başqa dərdimiz yoxdur? Bu yaxınlarda bir deputat parlamentin kürsüsündən dedi ki, camaat ona görə övladlarını rus bölmələrində təhsilə qoyur ki, heç olmasa uşaqlar rus dilini öyrənib rus kanallarına baxa bilsin. Telekanallara senzura qoymaq məsələsi bütün dünyada var. Hətta Türkiyədə də belə hadisələr baş verir. Bir həftəliyinə, on günlüyünə, bir aylığına televiziyanın efir vaxtı məhdudlaşdırılır. Təəssüf ki, bizdə özəl kanalların biabırçılığının fonunda biz belə qərarların şahidi olmuruq. ATV kanalında nümayiş edilən teleseriallarda ölkədə həyat tərzi eybəcər formada göstərilir. Sanki Azərbaycan ailəsi ancaq belə olmalıdır. Gənc nəsil həmin seriallara baxanda düşünür ki, Azərbaycan kişisi və qadını elə bu cürdür. Gülüş və pul qazanmaq naminə belə şeylər etmək olmaz!
Təsəvvür edin ki, bu gün teleməkanda verilişlərə baxılma vaxtının reytinqi var. ATV kanalı rəhbərinin öyündüyü hərbi-vətənpərvərlik proqramlarını elə vaxta salır ki, həmin vaxt tamaşaçının o verilişə baxmaq imkanı olmur. Və ya milli musiqini gecə saatlarında verirlər. Bu yaxınlarda Azərbaycan mədəniyyətində özünəməxsus yeri olan bir sənətçinin Filarmoniyada yubileyi keçirilirdi. Filarmoniyada keçirilən tədbirdə yalnız AzTV-nin kameraları qoyulmuşdu. Dedilər ki, digər kanallara da dəvət göndərilib. Amma onlar Röyanın konsertini işıqlandırmağı daha üstün tuturlar.
Azər Xəlilovun təriflədiyi ATV telekanalında yayımlanan verilişdə xəstə bir uşağa yardım kampaniyası çərçivəsində 4 milyon manata yaxın vəsait yığıldı. Hansısa xəstə uşağa yardım kampaniyasının keçirilməsi, ona maddi dəstəyin verilməsi təqdirəlayiq haldır. Ancaq gəlin görək, bununla bağlı efir siyasəti düzmü müəyyənləşir?
Bir uşaq üçün yığılan bu pula böyük bir xəstəxana inşa etmək olardı. Və ya elə xəstə uşaqlar var ki, müalicəsi üçün 10 min pul tapılmır. İndi görün, toplanan 4 milyon vəsaitə nə qədər xəstə uşağı müalicə etmək olardı? Biz demirik ki, belə neqativliklər yalnız ATV-də yaşanır. Sadəcə, yaxşı olardı ki, Azər Xəlilov və digər kanal rəhbərləri haqlı tənqidin üzərinə gedib cavab vermək əvəzinə, bundan düzgün nəticə çıxaraydılar. Mirşahinin özünün də rəhbəri olduğu kanal daxil olmaqla bütün özəl televiziyalar öz yayım siyasətində köklü dəyişikliklər etməlidirlər. Əks halda, onsuz da yerli əhali arasında etibarını itirən bu televizyalara heç kim baxmayacaq...
Məhəmmədəli QƏRİBLİ
