Son zamanlar rəsmi Kiyevin Türkiyəyə münasibəti bir qədər dəyişib. Tərəflər arasında müəyyən soyuqluq elementləri özünü göstərməkdədir. Kiyev şübhələnir ki, Rusiya Ukraynadan oğurladığı taxılı Türkiyənin limanlarına daşıyır və guya Ankara buna göz yumur. Bu məsələ ilə bağlı Türkiyənin səfiri Ukrayna Xarici İşlər Nazirliyinə çağırılıb. Ukraynanın Türkiyədəki səfiri də son zamanlar iki ölkə arasındakı münasibətlərdə suallar yaradan məqamlara toxunub.
Ukrayna telekanallarında Türkiyəyə yönəlik tənqidi xarakterli məlumatlar artır. Halbuki, bundan əvvəl Qərb ölkələri Ukraynaya silah və hərbi texnika satmadığı dönəmdə Türkiyə bu ölkəyə müəyyən silahlar satdı. Rusiyanın narazılığına rəğmən, Türkiyə Ukraynaya pilotsuz uçuş aparatları satdı. Ondan istifadə qaydalarını öyrətdi, mütəxəssislərini hazırladı. Ukraynada “Bayrakdar” PUA-larına mahnı qoşulurdu və s. Bununla yanaşı, Ankara Krımın ilhaqını birmənalı şəkildi tanımır. Nəinki Krımın, digər ərazilərin də işğal olunmasını tanımır. Belə olan halda iki ölkə arasında nə baş verir? Bütün bunlar nə deməkdir?
“Qərb maraqlı deyil ki, Ankara prosesdə yaxından iştirak etsin”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, bir sıra amillər buna öz təsirini göstərir: “Ukrayna fevralın 24-də Rusiyanın təcavüzünə məruz qalandan sonra vaxtaşırı olaraq Qərb ölkələrini tənqid edirdi. Çünki həmin ölkələr ilk vaxtlar yaxından dəstək vermirdilər. Yalnız Türkiyə Ukraynaya əsas dəstək verirdi. Həm ərazi bütövlüyünü dəstəkləyirdi, həm də hərbi baxımdan dəstək verirdi. Ancaq eyni zamanda, Türkiyə Rusiyaya qarşı sanksiyalara qoşulmadığını bəyan edib. Çünki Türkiyənin də dövlət olaraq öz milli maraqları var. Bu baxımdan hesab edirəm ki, Rusiyadan hər hansı bir məhsulun Türkiyə limanlarına daşınmasında qeyri-adi heç nə yoxdur. Qaldı ki, Ukraynadan taxılın oğurlanaraq Türkiyə limanlarına daşınmasına, fikrimcə burada yanlışlıqlar var. Türkiyə heç vaxt oğurlanan taxılın ölkə limanlarına daşınmasına razı ola bilməz. Türkiyə bundan əvvəl də bəyan edib ki, işğal olunmuş ərazilərdə ələ keçirilmiş taxılın satılmasında hər hansı bir formada iştirak etməyəcək. Ola bilsin ki, bununla bağlı Ukrayna tərəfinin əldə etdiyi məlumatlar yanlışdır. Yaxud da hansısa şübhəli məlumatlar var və onlar qəsdən ötürülür. Ola bilsin belə yanlış məlumatlar qəsdən Ukraynaya ötürülür ki, bu ölkənin Türkiyə ilə olan münasibətləri pisləşsin. Hər halda bunun başqa izahını görmürəm. Hesab edirəm ki, burada Qərb ölkələri də maraqlıdır. Yəni Qərb maraqlı deyil ki, Ankara prosesdə yaxından iştirak etsin. Bir qədər kənara çəkilmiş olsun. Söhbət Rusiya və Ukrayna arasında vasitəçilikdən gedir”.
Bir sözlə, partiya sədri hesab edir ki, üçüncü qüvvələr tərəflər arasında münasibətləri gərginləşdirmək istəyir.
Vidadi ORDAHALLI
