ABŞ konqresmeni Adam Şiff 2023-cü maliyyə ilinin Təsisatlar Aktına Azərbaycanı erməni hərbi əsirləri və mülki şəxsləri dərhal azad etməyə çağıran düzəliş təqdim edib.
Bu barədə erməni mediası Amerikanın Hay Dat Komitəsinə (ANCA) istinadən məlumat yayıb.
Məlumata görə, onlarla konqresmen 698-ci düzəlişi dəstəklədiyini bildirib. Hay Datın ABŞ-dakı nümayəndə heyəti gələn həftə Nümayəndələr Palatasının Prosedurlar Komitəsində müzakirə zamanı 698 saylı düzəlişə dəstəyi artırmaq üçün böyük səylər göstərir. Milli Təhlükəsizlik Qanunu Aktına edilən düzəlişlər komitə tərəfindən qəbul olunarsa, ABŞ Konqresinin Nümayəndələr Palatasında səsverməyə çıxarılacaq.
Göründüyü kimi, Ermənistanın hərbi əsirlərinin azad olunmasına ABŞ üçün Milli Təhlükəsizliyin maliyyələşdiriməsi qanunu çərçivəsində baxılır. Konqresmenlər buna az qala ABŞ-ın Milli Təhlükəsizlik məsələsi kimi baxır. Bu isə biabırçılıqdır. O üzdən, doğrudan da 698 saylı düzəliş Konqresin aşağı palatasının müzakirəsinə çıxarılaraq qəbul olunarsa, bu, Birləşmiş Ştatlar qanunlarının erməni lobbisinin təsiri altına düşməsindən başqa bir şey deyil.
“Onların müəyyən hissəsinin erməni lobbisindən bəslənərək belə təşəbbüslə çıxış etməsi rəzillikdir”
Məsələyə münasibət bildirən hərbi ekspert Ramil Məmmədlinin fikrincə, ABŞ Konqresinin erməni lobbisinin əlində alət olması, əfsuslar olsun ki, bu gün də davam edir: “Prinsipcə, bu bizim üçün yeni bir şey deyil. Bu həmin Konqresdir ki, 1992-ci ilin oktyabrında Azadlığa Dəstək Aktına dair 907-ci düzəlişi qəbul etdi. Nəticədə Azərbaycan 10 il haqsız yerə ABŞ-ın dövlət yardımından məhrum oldu. Guya ki, Qarabağda ermənilər etnik təmizləməyə məruz qalır. Halbuki, Azərbaycan əraziləri 90-cı illərin birinci yarısında Ermənistan tərəfindən işğal edildi. Ancaq 907-ci düzəliş birdəfəlik ləğv edilmədi. 2002-ci ildən başlayaraq hər il ABŞ prezidenti düzəlişin fəaliyyətini dondurur. Konqresin bizə qarşı olan ədalətsizliyi təkcə bununla bitmir. Dəfələrlə Azərbaycanla bağlı bənzər təşəbbüslər müzakirə mövzusu olub. 2019-cu uldə ermənipərəst konqresmenlər Azərbaycana hərbi yardımları məhdudlaşdırmaq üçün təşəbbüslə çıxış etdilər. Guya ki, Azərbaycan Xocalı hava limanına uçacaq mülki təyyarələri vuracaq. Ermənistan o zaman qanunsuz olaraq Xocalı hava limanını işə salmaq istəyirdi. Ancaq Azərbaycan buna imkan vermədi. İndi də qondarma erməni əsirləri mövzusunu ortaya atmaqla 698-ci düzəlişi qəbul etmək istəyirlər. Halbuki, bunun məsələyə heç bir aidiyyəti yoxdur. Ən azından ona görə ki, onlar hərbi əsir yox, diversantdılar. Müharibə dövründə təslim olan hərbçilər hərbi əsir hesab olunur. Azərbaycanda saxlanılan diversantlar isə 10 noyabr razılaşmasından sonra həbs edilib. Özü də ölkə ərazisində təxribat apararkən. Hesab edirəm ki, Azərbaycan bütün imkanlarını işə salaraq bunun qarşısını almağa səy göstərməlidir. Konqresmenlərin müəyyən hissəsinin erməni lobbisindən bəslənərək belə təşəbbüslə çıxış etməsi rəzillikdir. Buna başqa ad vermək olmur”.
Hərbi ekspert onu da əlavə etdi ki, erməni lobbisinin Azərbaycana yönəlik fəaliyyəti bununla bitməyəcək. Ona görə də biz hər zaman ayıq-sayıq olmalıyıq.
Vidadi ORDAHALLI
