Son günlər sosial şəbəkələrin Azərbaycan və Ermənistan seqmentində Rusiyanın Tovuzun bir kilometrliyində yeni hərbi baza tikməsi haqda məlumatlar paylaşılır. Hesab edilir ki, Rusiyanın bu addımı xoş niyyətdən irəli gəlmir.
Məsələyə Azərbaycandakı hərbi ekspertlər də reaksiya verib. Ehtiyatda olan polkovnik Üzeyir Cəfərov deyib ki, Azərbaycan davamlı şəkildə Rusiyaya öz etiraz və narahatlığını çatdırmalıdır: “Rusiya 2049-cu ilədək Ermənistanın ərazisində nə istəsə edə və tikə bilər. Biz Rusiyanın Birinci və İkinci Qarabağ müharibələrində İrəvana hər cür maddi-mənəvi dəstək verdiyini unutmamalıyıq. Növbəti dəfə yenə müharibə baş versə, Moskvanın bu dəstəyi davam edəcək. Berddə hərbi bazanın tikilməsi isə ondan xəbər verir ki, Rusiya 2049-cu ildən sonra da Cənubi Qafqazda qalmaq istəyir. Ümumiyyətlə isə, Rusiyanın bölgə ilə bağlı uzağa gedən planları var...”.
Polkovnik hesab edir ki, müharibədən artıq iki ilə yaxın bir müddət keçib, Azərbaycan humanistlik göstərərək Ermənistanın, erməni xalqının yeni reallığı, müharibənin gerçəklərini başa düşəcəyini gözləyir: “İrəvan isə sülhün əleyhinə addımlar atır, təxribatlar törədir, ölkəmizə qarşı iddialar səsləndirir. Bütün sadaladığımız məsələlər fonunda yenə vurğulamaq istəyirəm ki, Tovuzda rusların hərbi baza tikməsi xoş məramdan, niyyətdən xəbər vermir. Azərbaycan mütəmadi olaraq hər fürsətdən yararlanaraq Rusiyaya etirazını bildirməlidir. Belə məsələlərdə daha prinsipial olmalıyıq”.
Mövzu ilə bağlı fikirlərini “Bakı-Xəbər”lə bölüşən hərbi-siyasi ekspert Emin Həsənlinin sözlərinə görə, Rusiyanın forpostu olan Ermənistan müstəqil siyasət yürüdən ölkə deyil: “Rusiyanın Azərbaycanla sərhəddə bazanı hansı məqsədlə tikdiyi aydındı. Bizə məlum idi ki, Rusiya İran və Türkiyə ilə Ermənistanın sərhədlərini özü qoruyur. Hətta bu məqsədlə həmin ölkədə bazalar saxlayır. Hazırda Ukraynada müharibənin aparıldığı bir zamanda Rusiyaya canlı qüvvə və hərbi texnika lazımdır. Bu vəziyyətdə gəlib bizimlə sərhəddə əlavə hərbi baza tikir. Bütün bunlar göstərir ki, Rusiya imperiya siyasətindən əl çəkmək istəmir. Eyni addımların Suriyada atıldığını da gördük. Biz buna görə öz müttəfiqlərimizlə əlaqələrimizi daha da gücləndirməliyik. Biz Rusiya ilə də müttəfiqik. Amma anlamaq olmur, Rusiya öz müttəfiqi ilə sərhəddə niyə hərbi baza tiksin? Ermənistanın Tovuzla olan sərhədini kimdən qorumaq istəyir? Tovuz və Qazax rayonu Azərbaycan üçün çox böyük strateji mahiyyətə malikdir. Bizim böyük layihələrimiz həmin ərazilərdən keçir. Azərbaycan hər zaman belə təxribatlara soyuqqanlı yanaşıb. Bu siyasəti davam etdirməliyik. SSRİ-nin Avropanın əksər ölkələrində hərbi bazaları vardı. İndi həmin bazalar qalırmı? Yox! Tarix göstərir ki, Rusiya gec-tez Cənubi Qafqazdan getməlidir. Artıq dünya bir neçə ölkənin ərköyün siyasətinə dözmək istəmir. Rusiya imperiya maraqlarından əl çəkməlidir. Bizim başımıza gələn bir çox faciələrin kökündə Rusiya amili durur. Yaxşı olardı ki, bundan sonra həmin ölkə normal siyasət yürütsün. Bu addımları ilə onlar Ermənistanın bir dövlət kimi mövcudluğunu sual altına salmış olurlar”.
Məhəmmədəli QƏRİBLİ
