Türkiyənin NATO-dan çıxış kampaniyasını kim və niyə başladıb?

Ramil Məmmədli: “Azərbaycan üçün qonşu və tarixi ənənələri olan ölkələrin bir-biri ilə dərin əməkdaşlığının formalaşması bizim də mövcud proseslərdən yararlanmağımıza gətirib çıxara bilər”

img

Türkiyənin iri şəhərlərində Vətən Partiyası ölkənin NATO-dan çıxarılması üçün genişmiqyaslı kampaniyaya başlayıb. Partiyanın baş katibi Doğu Perincək bununla bağlı bildirib: "Türkiyənin Şimali Atlantika Alyansından çıxması ölkənin iqtisadi gələcəyinə müsbət təsir göstərəcək".

Vətən Türkiyə Böyük Millət Məclisində (parlamentində) təmsil olunmur, bu partiyanın nümayəndələri Türkiyənin Avrasiya məkanı ilə sıx əməkdaşlığına fəal çağırış edir, həmçinin Krımı Rusiya ərazisi kimi tanıyırlar. Doğu Perincək deyib ki, davamlı olaraq hökumətə təkliflər verəcəklər: “Tələb edirik ki, NATO ilə bağlı Türkiyənin müstəqilliyinə və bütövlüyünə uyğun siyasət yeridilsin. Gələn il ərzində düzəliş mümkündür. Biz Türkiyəni düşünürük. Türkiyənin enerji böhranından çıxış yolu NATO-dan çıxmaqla mümkündür. NATO-dan çıxsaq, pomidor və badımcanın qiyməti aşağı düşəcək. Çünki NATO-nun dizel, elektrik enerjisi və ya təbii qazı yoxdur”.

Bu kampaniyanın Türkiyədə hansı məqsədlə başlanması ilə bağlı ekspertlər nə düşünür?

Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Perincəyin apardığı bu kampaniyanın arxasındakı əsl məqsəd Türkiyənin NATO-dan daha çox Rusiya ilə yaxınlığını görmək istəyidir: “Rusiya-Türkiyə müttəfiqliyi zəruridir. Bu, regional müdafiə sisteminin formalaşması üçün ən optimal variantdır. Rusiya-Türkiyə-Çin-İran əməkdaşlıq  formatı Şərqin güclənməsi və Avropadan asılılığın zəiflənməsinə səbəb olacaq.  Sadəcə, Türkiyənin bu məsələdə manevr imkanları çox deyil. Mövcud vəziyyətdə Türkiyə-Rusiya münasibətlərinin strateji müttəfiqlik səviyyəsinə qalxması əsirlərdi istənilən bir niyyətdir.  Ancaq bu və ya digər maneələr səbəbindən baş tutmayıb. Hazırkı vəziyyət son illər ərzində regionda yaranan optimal şəraitdir ki, bundan da bəhrələnmək lazımdır. Belə bir yaxınlaşma Azərbaycanın da dövləti, milli maraqlarına xidmət edən məsələdir. Azərbaycan üçün qonşu və tarixi ənənələri olan ölkələrin  bir-biri ilə dərin əməkdaşlığının formalaşması bizim də mövcud proseslərdən yararlanmağımıza gətirib çıxara bilər. Aydındır ki, NATO-ya qarşı olan bu kampaniyanın digər üzü Rusiyaya meylli olmaqla bağlıdır. Bu aksiyanı keçirən siyasi partiya anti-Qərb, Rusiyaya meylli olmaq kimi siyasi xəttin yürüdülməsi ilə tanınır”.

Qeyd edək ki, bir müddət əvvəlki müsahibəsində İstanbul Universitetinin və Lomonosov adına MDU-nun professoru, Doğu Perincəyin oğlu Mehmet Perincək deyib ki, Türkiyə NATO-nun rəsmi üzvü olsa da, əslində onun hədəfidir: “NATO ölkələri və ilk növbədə, ABŞ Suriyada kürd separatçılarını dəstəkləyir. Bundan başqa, NATO çərçivəsində Aralıq dənizinin şərq hissəsində antitürk bloku yaradılır, Türkiyəyə qarşı hərbi dəniz təlimləri keçirilir. Ona görə də Türkiyə ilə NATO arasında ciddi problemlər var. Alyansın genişlənməsi Türkiyənin maraqlarına ziyan vurur”.

Məhəmmədəli QƏRİBLİ

Peşə etikası

Son xəbərlər