Rəsmi Yerevan antirus fəaliyyətlər üçün Kanadaya şans verir - rus səfirin iddiası...
Rusiyanın Ermənistandakı səfirliyi Kanadanın İrəvanda səfirlik açmasına sərt reaksiya verib. Məsələ ilə bağlı açıqlamaya münasibət bildirən Rusiya səfirliyi qeyd edir ki, Kanadanın Ermənistanda səfirliyinin açılması ilə bağlı mətbuatda gedən xəbərə diqqət yetiriblər:
“Hər şey yaxşı olardı, amma təəccüblüdür ki, bu addım, mediaya görə, Kanada Xarici İşlər Nazirliyi tərəfindən vicdanla, o cümlədən “Rusiya təsirinə qarşı mübarizə” kontekstində təqdim edilib. Dövlətə qarşı bu cür açıq-aydın təkəbbürlü və nifrətli münasibət təəccüb doğurur. İstər-istəməz fikirləşirsən ki, belə bir xətt erməni xalqının rifahına, təhlükəsizliyinə necə təsir edəcək. Bu süjet özünü “qızıl milyardlar” sırasına daxil edən həmin dövlətlərin hakim dairələrinin dünyanın qalan hissəsini qavramasının göstəricisidir. Müasir dünyada baş verən bir çox faciəli hadisələrin əsasında başqa ölkələrə və xalqlara qarşı bu təkəbbürlü münasibət dayanır”.
Kanadanın Ermənistanda səfirliyi Şimali Amerika ölkələrindən birinin Cənubi Qafqazda ilk daimi diplomatik nümayəndəliyi olacaq.
Bütün bunlar onu göstərir ki, Ermənistan öz ərazisini hansısa dövlət üçün platsdarma çevirir. Kanadanın bu ölkədə səfirliyi açılır. Özü də Kanada xarici işlər nazirliyi rəsmi şərh verib ki, Rusiyanın fəaliyyət imkanlarını məhdudlaşdırmaq məqsədi ilə bu edilir. İndiki şəraitdə Cənubi Qafqazın heç bir ölkəsində Kanada səfirliyi olmadığı halda, gəlib birinci Ermənistanda açırlar. Ermənistan da rahat şəkildə buna imkan yaradır. Çünki söhbət NATO üzvü olan bir ölkənin vasitəsilə Rusiyanın ölkədəki fəaliyyətini məhdudlaşdırmaq cəhdlərindən gedir.
Məsələyə münasibət bildirən Azərbaycan Dirçəliş və Tərəqqi Partiyasının sədri Ramil Hüseynovun fikrincə, baş verənlər onu göstərir ki, Paşinyan hakimiyyəti Rusiyaya yönəlik ikili oyun oynayır: “Məsələ ondadır ki, Ukraynaya hücumla əlaqədar Rusiyaya qarşı kəskin mövqedən çıxış edən ölkələrdən biri Kanadadır. Kanda Rusiyaya qarşı sanksiyaların tətbiq olunmasında xüsusi fəallıq göstərir. Bu məsələdə ABŞ və Böyük Britaniya ilə eyni mövqedən çıxış edir. Bu ölkələrin də Rusiyaya qarşı Avropa İttifaqından daha sərt olduqları ortadadır. Eyni zamanda, Kanada NATO çərçivəsində Rusiyaya yönəlik aktiv fəaliyyət göstərir. Ukraynaya silah və digər yardımlar edir. Ancaq Rusiyanın patronu olduğu Aİİ və KTMT-də təmsil olunan Ermənistan indiki mürəkkəb geosiyasi vəziyyətdə Kanada səfirliyinin açılmasına yaşıl işıq yandırır. Kanada rəsmiləri də həmən Rusiyaya yönəlik sərt mesajlarla çıxış edirlər. Bu nə deməkdir? Bu o deməkdir ki, Ermənistan ərazisini Rusiyaya qarşı platsdarm olmasına razıılıq verir. Əslində məlum səbəblərdən Ermənistan səfirlik məsələsini təxirə salmalı idi. Ən azından, Ukraynada müharibə bitənə qədər bunu yubatmaq olardı. Ancaq Ermənistan müttəfiqinə xəyanət edərək Kanadanın səfirlik açmasına gedir. Bu isə Cənubi Qafqazda növbəti qarşıdurma yaratmaq cəhdidir. Fikrimcə, Kreml bunu Paşinyana bağışlamayacaq”.
Bu səbəbdən partiya sədri hesab edir ki, tərəflər arasında gərginlik arta bilər.
Vidadi ORDAHALLI
