Bir aydan çoxdur ki, Ermənistanın Dilican vilayətinin Berd rayonunun Ayqepar kəndi yaxınlığındakı keçmiş hava limanının ərazisində aktiv tikinti işləri aparılır. Yayılan məlumata əsasən, burada Rusiyanın yeni hərbi bazasının yerləşdirilməsi gözlənilir.
Məsələ ilə bağlı “Azatutyun” radiosu bildirir ki, hələ ötən ay hökumət “Rusiya hərbi bazasının Ermənistan ərazisində yerləşdirilmə məntəqələri haqqında” protokola dəyişiklik edilməsinə başlayıb. Hökumətin saytında yerləşdirilən əsaslandırmaya görə, Rusiya hərbi bazasının Ermənistan ərazisində yerləşdirmə məntəqələrinin ünvanları dəyişdiriləcək. Bununla əlaqədar torpaq sahələri ilə də bağlı dəyişikliklər edilməsi zərurəti yarandığı qeyd edilir. Əsaslandırmanı müdafiə naziri Suren Papikyan təqdim edib. Beləliklə, Ermənistan ərazisində Rusiya hərbi bazasının yerləşdirmə məntəqəsinin dəyişməsi gözlənilir. Hökumətin artıq müvafiq qərarı var, lakin prosesə başlanılması üçün müqavilə hazırlanmalı və nəhayət, parlamentdə ratifikasiya edilməlidir. Ermənistan Müdafiə Nazirliyinin bu xüsusda dərc etdiyi paketdə ünvanlar, torpaq sahələrinin xüsusiyyətləri və digər rekvizitlər göstərilməyib. Amma gözləntilər bundan ibarətdir ki, rus hərbçiləri Berd rayonuna köçürüləcək. Artıq Berddə tikinti gedir. Yerli sakinlərin dediyinə görə, tikintiyə rəhbərlik edənlər arasında ruslar da var. Burada nə qədər rus hərbçisinın olacağı və onların hansı missiya yerinə yetirəcəyinə Ermənistan Müdafiə Nazirliyi hələ ki, cavab vermir. Berd icmasının sədr müavini Samvel Hovsepyanın sözlərinə görə, hava limanının ərazisi icmaya aid deyil, onların işi yalnız tikintiyə icazə verməkdən ibarət olub: “Yəqin ki, ərazi Nəqliyyat və Rabitə Nazirliyinə məxsus olub, lakin qədim zamanlardan bura aeroportun ərazisi olub, icma mülkiyyəti deyil”.
Burada bir maraqlı məqamı qeyd edək ki, Berd rayonunun Ayqepar kəndi Azərbaycanın Tovuz rayonunun Əlibəyli kəndindən bir kilometr aralıda yerləşir. Ermənistanın buradakı hava limanının ərazisi də Azərbaycan ordusunun nəzarətdədir. İndi ermənilər Rusiya hərbçilərinin sərhədin bu hissəsində olmasını təhlükəsizliyin təminatı hesab edirlər. Ayqebar sakini Vaçe Kələntəryan bu xüsusda bildirir: “İnsanlar sülhün olacağına ümid edirlər. Siz çox gözəl bilirsiniz ki, bura Azərbaycana ən yaxın ərazidir. Müəyyən dərəcədə insanlar ümidlərini ruslara bağlayır. Təhlükəsizlik baxımından rusların gəlişi ilə vəziyyət bir az da yaxşılaşacaq”. Tavuşun bu hissəsində sonuncu Ermənistan-Azərbaycan toqquşması 2020-ci ilin iyulunda baş verib. Həmin vaxt Ayqepar, Mövses, Nərkin Karmiraxbyur, Berd, Çinar yaşayış məntəqələrindən Azərbaycanın mövqeləri atəşə tutulub. Ordumuz buna cavab verib və düşmən susdurulub. Azərbaycan indi də bəyan edir ki, Ermənistan üçün təhlükə yaratmır və bu ölkə ilə sülh əldə edilməsində maraqlıdır. Rus hərbçilərinin sərhədə yerləşməsi də vəziyyəti dəyişməyəcək. Ermənistanın “1in.am” nəşri də məsələyə elə bu prizmadan yanaşır: “Rus hərbçilərinin yerdəyişməsi Azərbaycanın siyasətinə təsir etməyəcək. Çünki Bakı və Moskvanın prosesə vahid yanaşması var. Bu, ATƏT-in Minsk Qrupu ilə bağlı prosesdə özünü qabarıq büruzə verdi. Artıq ATƏT-in Minsk Qrupu yoxdur. Vəssalam. ATƏT-in Minsk Qrupunun həmsədri Rusiya və Azərbaycan belə qərar verib. Azərbaycanla Rusiyanın bu məsələdə yekdil rəyi var və bu konsensusda Ermənistana yer yoxdur. 2020-ci ilin fəlakətli müharibəsindən sonra gecə-gündüz formatı yenidən işə salmaqdan və ona alternativin olmamasından danışan Ermənistana bu konsensusda yer yoxdur. Bu yaxınlarda Lavrov-Əliyev, daha sonra isə Lavrov-Bayramov görüşü oldu. Biz bir daha əmin olduq ki, başda Moskva olmaqla, Ermənistanın heç bir müttəfiqi yoxdur. Rusiyanın xarici işlər naziri Sergey Lavrov Bakıda bəyan edib ki, Minsk Qrupu ABŞ və Fransanın təşəbbüsü ilə fəaliyyətini dayandırdığı üçün Azərbaycanın xarici işlər naziri ilə məsələni müzakirə etməyib. Digər məsələlər üzrə də Bakı və Moskvanın mövqeləri üst-üstə düşür”. Nəşr qeyd edir ki, Rusiya hərbçilərinin sərhəddə peyda olması Ermənistan silahlı qüvvələrinin mövqelərini əvəz etməyəcək, əlavə mexanizm olacaq. Lakin əlavə mexanizm sərhədlərin qorunması üçün deyil, sabitlik rejimi üçündür. Onu da qeyd edək ki, rus hərbçilərinin Azərbaycanla sərhəddə yerləşdiriləcəyi ilə bağlı məlumat əvvəldən var idi. Hələ ötən ildən erməni mediası yazır ki, Ermənistanla Rusiya arasında sərhədlərin qorunmasına dair danışıqlar gedir. Görünən odur ki, Ermənistan və Rusiya arasında gedən danışıqlar başa çatıb və tərəflər razılaşıb.
Nahid SALAYEV
