Rusiya Müdafiə Nazirliyi məlumat yayıb ki, guya avqustun 12-də saat 07:29 və 07:58-də Azərbaycan tərəfi iriçaplı silahlarla atəşkəsi pozub. Bu barədə məlumat “Teleqram”da yer alıb.
10 noyabr bəyanatından sonra da on dəfəllərlə atəşkəsi pozan Ermənistanın Azərbaycana şər atması azmış kimi, indi də Rusiya MN Azərbaycana şər atır. Halbuki, indiyə qədər Ermənistan atəşkəsi min dəfələrlə pozub, amma Rusiya MN buna münasibət bildirməyib, bu ölkəyə “gözün üstə qaşın var” deməyib. Ancaq Azərbaycan atəşkəsi pozmadığı halda Rusiya MN-i həqiqətə uyğun olmayan açıqlamalar yayır, öz aləmində ölkəmizi “günahkar” çıxarmağa çalışır.
Ekspertlər deyir ki, son həftələr Rusiya MN-ın bu iddiada bulunmasının başlıca səbəblərindən biri Qarabağdakı sülhməramlı kontingentin paxırlarını ört-basdır etmək cəhdidir.
Ekspertlərin sözlərinə görə, ümumiyyətlə Azərbaycan indiyə qədər heç zaman atəşkəsi pozmayıb və təxribata yol verməyib. Rusiyanın Azərbaycanın “atəşkəsi pozduğunu” iddia etməsinin isə tamamilə əsassız olduğunu deyən ekspertlərin fikrincə, bu iddia bizə qarşı böhtandır.
“Azərbaycan tərəfi heç zaman atəşkəsi pozmur, pozmayıb da, tikinti və quruculuq-bərpa işləri ilə məşğul olan dövlət kimi sülh olmasında maraqlıdır”
Tanınmış hərbi ekspert Tərlan Eyvazov “Bakı-Xəbər”ə bildirdi ki, Azərbaycanın “atəşkəsi pozması” Rusiya MN-in şayiəsindən və böhtanından başqa bir şey deyil. O qeyd etdi ki, Ermənistan hər gün Naxçıvan, Şuşa, Laçın, Kəlbəcər və sair istiqamətində atəşkəsi pozur, amma Rusiya bunu “görmür”.
“İstər Şuşa bəyannaməsi, istərsə də Bakı bəyannaməsi imzalandıqdan sonra Rusiyanın bizə qarşı qısqanclığı daha aşırı səviyyədə özünü göstərməyə başlayıb. Rusiyanın Azərbaycanı Avrasiya Birliyinə, yəni KTMT-yə cəlb etmək israrları, tələbləri həyata keçmədiyinə görə bizə müxtəlif vasitələrlə təzyiq etməyə çalışır. Xüsusən də son günlər Ermənistan silahlılarının Qarabağa gəlməsini təşkil etməklə, “atəşkəsi pozmaq” uydurması ilə ittiham etməklə bizə təzyiq etmək istəyir. Bəzi mənbələrə görə, hazırda Qarabağda ortalama 20 minə yaxın silahlı terrorçu var, onlar postlarda durur, təlimlər keçirlər, bizə yaxın ərazilərdə mövqe tuturlar, daim də atəşkəsi pozurlar və təbii, cavablarını da alırlar. Azərbaycan tərəfi heç zaman atəşkəsi pozmur, pozmayıb da, tikinti və quruculuq-bərpa işləri ilə məşğul olan dövlət kimi sülh olmasında maraqlıdır, israrlıdı. Amma Ermənistan tərəf hər zaman özünə xas terrorçuluq, təxribatlar, xoşagəlməz hərəkətlər törətməklə aranı qarışdırmaq, Rusiyanı da bu işə qataraq yenidən bizim üstümüzə qaldırmaq istəyir. Təbii ki, bunun da dirijoru yenə Rusiyadı. Ona görə də, Azərbaycan tərəfi öz işini möhkəm tutur, bütün vəziyyətə nəzarət edir. Bizim apardığımız sülhməramlı işlər nəticəsində ora köçürüləcək insanlarımızın təhlükəsizliyinin təmin olunması üçün bütün işlər görülür”.
T.Eyvazovun sözlərinə görə, bu təxribatların geniş miqyas almasının, Ermənistanın dinc dayanmamasının baiskarı Rusiyadır, o, iki xalqın sülh şəraitində dinc yanaşı yaşamasında maraqlı deyil. “Azərbayanın “atəşkəsi pozması” ümumiyyətlə yalandır, bu, Rusiyanın və Ermənistanın uydurmasıdır. Heç şübhəsiz, bu cür yalan məlumatların yayılmasında maraqlı olan elə Rusiya və Ermənistandır. Rusiya Ermənistanın atəşkəsi pozmasına ona görə göz yumur ki, bunun dirijoru elə özüdür”.
T.Eyvazovun sözlərinə görə, bununla eyni zamanda Ermənistandakı revanşist qüvvələrə münbit şərait yaradılır, bu qədər məğlubiyyətdən sonra onlar yenə də öz məkrli işlərindən əl çəkməyiblər, yenə də “böyük Ermənistan” iddiasındadırlar.
İradə SARIYEVA
