Zaman-zaman vəzifə səlahiyyətlərindən sui-istifadə edən, dövlət vəsaitini qanunsuz olaraq mənimsəyən, ondan öz şəxsi mənafeyi üçün istifadə edən məmurlar olub.
Belə hallar indi də var. Düzdür, belə pozuntulara yol verən heç də bütün məmurlar layiqli cəzalarını almırlar. Ancaq bir sıra hallarda ciddi qanun pozuntularına yol verən məmurlar gərəkən cəzanı alırlar. Dünyanın istənilən ölkəsində belə neqativ hallara rast gəlinir. Lakin inkişaf səviyyəsindən, ictimai nəzarətin nə dərəcədə təmin olunmasından asılı olaraq, bu cür halların sayı ölkələr üzrə fərqlidir. Problem ondadır ki, inkişaf etməkdə olan ölkələrdə və yoxsul dövlətlərdə bu cür pozuntular daha çox özünü göstərir, nəinki inkişaf etmiş ölkələrdə.
Azərbaycanın müstəqillik tarixi yeni olsa da, ölkənin inkişafı naminə zaman-zaman islahatlar aparılır. Bununla yanaşı, fəaliyyəti dövründə ciddi pozuntulara yol verən vəzifə sahibləri qanuna müvafiq olaraq cəzalandırılır.
Son illər diqqətçəkən məqamlardan biri ondan ibarətdir ki, hansısa sabiq və ya hazırda vəzifə başında olan yüksək vəzifəli məmurun həbsi ilə bağlı xəbər yayılanda bu, cəmiyyətdə böyük sevinclə qarşılanır. Xüsusən də sosial şəbəkələrdə belə münasibət çox açıq formada özünü göstərir və hansısa məmurun həbsi az qala toy-bayram kimi qarşılanır. Maraqlıdır, bunun əsl səbəbi nə ilə bağlıdır? Niyə barəsində belə xəbər yayılan heç olmasa bir məmurla bağlı vətəndaşların heyfsləndiyinə rast gəlmirik. Bu, nəyin göstəricisidir?
“...hansısa məmur həbs ediləndə, bu, böyük sevincə səbəb olur”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı bunu bir sıra amillərlə əlaqələndirdi: “Kiminsə həbsinə sevinmək yaxşı hal deyil. Ancaq belə münasibətin yaranmasını doğuran müxtəlif səbəblər var. Bu, bir tərəfdən, bolşevizm təfəkkürüdür. Yəni kasıb təbəqənin varlı təbəqəyə düşmən münasibəti bəsləməsindən irəli gəlir. Belə vəziyyət onu göstərir ki, Azərbaycanda insanlar arasında olan münasibətlər hələ də normal səviyyədə deyil. Digər tərəfdən, məmur özbaşnalığı, bununla bağlı cinayət varsa, cəzası vaxtında olmalıdır. Sovet dönəmində hansısa katibin nöqsanları üzə çıxırdısa, dərhal müvafiq addımlar atılırdı. Bizdə vəzifə səlahiyyətlərini aşan məmurlar vaxtında cəzalandırılmadığı üçün, cəmiyyətdə onlara qarşı güclü aqressiya yaranır. Bu səbəbdən hansısa məmur həbs ediləndə, bu, böyük sevincə səbəb olur. O üzdən, yaxşı olardı ki, belə hallar vaxtında aşkar edilsin. Ən başlıcası isə korrupsiyaya şərait yaradan amilləri aradan qaldırmaq lazımdır. Yoxsa 4-5 icra başçısını həbs etməklə, nazirləri qandallamaqla bunun qarşısını almaq mümkün deyil. Korrupsiyaya yol açan səbəblər ortadan qaldırılmalıdır”.
Professor hesab edir ki, belə yanaşma olsa, o zaman hansısa məmurun həbsi toy-bayramla qarşılanmaz.
Vidadi ORDAHALLI
