Azərbaycanın əsas mütəffiqləri sırasında yer alan Pakistanla qarşılıqlı əlaqələrin yaxın tezlikdə tamamilə yeni bir mərhələyə çıxması gözlənir. Hazırda bu məsələdə həm Azərbaycan, həm də Pakistanın özü maraqlı tərəf qismində çıxış edir. Qeyd edilən xüsusda Pakistan prezidenti Arif Alvinın açıqlamaları xüsusi diqqət çəkir.
O bildirir ki, Pakistan Azərbaycanla iqtisadi, o cümlədən enerji, turizm və ticarət sahələrində, eləcə də müdafiə sahəsində əməkdaşlığı artırmaq istəyir. Onun sözlərinə görə, Azərbaycana yeni təyin edilmiş səfir Bilal Hayee ilə söhbətdə ona Azərbaycanla münasibətlərə böyük əhəmiyyət verildiyi deyilib:"Səfirə iki ölkənin dərin siyasi, iqtisadi və mədəni əlaqələrə malik olduğunu xatırladaraq, onu ikitərəfli əməkdaşlığın artırılmasında rol oynamağa çağırmışıq”. Alvi, həmçinin, Azərbaycan hökumətinə koronavirus pandemiyası zamanı Pakistana dəstək verdiyinə, xüsusilə çıxılmaz vəziyyətdə qalmış 522 pakistanlının vətənə çatdırılmasına görə minnətdarlığını bildirib. Ekspertlər də qeyd edir ki, yaxın tezlikdə iki ölkə arasında müxtəlif istiqamətlər üzrə əlaqələrin daha da dərinləşməsini gözləmək olar.
Artıq məlumdur ki, Pakistan Azərbaycanla enerji sahəsində əməkdaşlığın dərinləşməsinə xüsusi maraq göstərir. Xatırladaq ki, Pakistan enerji baxımından Yaxın Şərq ölkələrindən asılıdır. Bu asılılığı azaltmaq üçün rəsmi İslamabad Bakı ilə işbirliyini genişləndirməyə hazırlaşır. Artıq ötən il Pakistana 100 milyon dollar məbləğində Azərbaycan neftinin tədarükünə dair saziş imzalanıb. Azərbaycan isə Pakistanda maye qaz və mayeləşdirilmiş neft qazı terminalının tikilməsində maraqlıdır. Həmçinin iki ölkənin iştirakı ilə neft-qaz anbarları üzrə birgə müəssisənin yaradılması nəzərdən keçirilir. Pakistan və Azərbaycan arasında neft və qaz hasilatı üzrə sınaqların keçirilməsi üçün laboratoriyanın yaradılması və birgə araşdırmalar aparılması barədə də razılığa gəlinib. Bunlar fonunda qarşıdakı dövr ərzində Azərbaycandan Pakistana neft və neft məhsullarının göndərilməsi istiqamətində əməli addımlar atılması gözlənir. Tərəflər digər istiqamətlərdə də əməkdaşlıq etməyi düşünür. Məsələn, tekstil, kimya, əczaçılıq və digər məhsulları Pakistan Azərbaycanda istehsal etmək istəyində olduğunu bildirir. Bakı üçün bu prosesdə maraqlı məqamlardan biri də hərbi sferadır. Artıq bilindiyi kimi, Azərbaycan Pakistan istehsalı olan JF-17 “Thunder” döyüş təyyarələrini almaqda maraqlıdır. Pakistan bəyan edir ki, təyyarənin satışında heç bir problem yoxdur. Pakistanın raket arsenalı da Azərbaycan üçün cəlbedicidir. Söhbət ilk növbədə Pakistan istehsalı olan “Şahin-1”, “Hatf-1” raketlərindən gedir. “Şahin-1” 750 kilometr məsafədə hədəfi vurur. “Hatf-1” raketi isə “Şahin-1”in təkmilləşdirilmiş formasıdır və daha uzaq məsafədə hədəfi vura bilir. Onun uçuş məsafəsi 3 min kilometrdir. “Pakistani defence” saytının məlumatına görə, bu raketlər yüksək dəqiqliyə malikdir və Hava Hücumundan Müdafiə sistemləri onu tuta bilmir. Raketlər strateji obyektlərin, komanda məntəqələrinin və infrastrukturun məhv edilməsi üçün nəzərdə tutulub. Bundan əlavə, Pakistan hərbi sənayesi "Babur" və "Raad" qanadlı raketləri, yüksək dəqiqlikli H-2 qanadlı raketi istehsal edir. Bu raketlərin müəyyən növlərinin idxalı Azərbaycan üçün maraqlıdır. Pakistan istehsalı olan orta mənzilli “Şahin” ballistik raketlərinin bütün növləri isə çoxdan Azərbaycanı maraqlandırır. Yuxarıda qeyd olunduğu kimi, Azərbaycan Pakistandan 750 kilometr mənzilli “Şahin-1" ballistik raketlərini almaqda maraqlı tərəf kimi çıxış edir. Qeyd edək ki, “Şahin” raketlərinin bir neçə modifikasiyası mövcuddur. Çin texnologiyasının köməyilə istehsal edilən və Hindistanla qarşıdurmada Pakistanın əsas çəkindirici elementi olan “Şahin” ballistik raketlərinin radiusu 500-600 kilometrdən 2300 kilometrə qədər dəyişir. Raketlər 700-1230 kiolqram ağırlığında müxtəlif modifikasiyalı döyüş başlıqları daşıya bilir. Düşmənin hava hücumundan müdafiə sistemini dəf etmək üçün raketlərin döyüş başlığı hədəfə yaxınlaşanda əsas blokdan ayrılır. Raketlər 12 oxlu mobil platforma üzərində yerləşdirilib. Bu raketlər Rusiyanın Ermənistana verdiyi “İsgəndər” raket komplekslərinə qarşı da uğurla istifadə edilə bilər. İstisna deyil ki, Azərbaycan və Pakistan bu raket sistemlərinin çatdırılması haqqında tezliklə razılığa gələcək. Onda bu raketlər Azrbaycanın hərbi mövqelərini daha da gücləndirəcək. Özü də Pakistan Azərbaycana silahı Rusiya və digərlərindən daha ucuz qiymətə satacaq. Bütün bunlar Azərbaycan-Pakistan hərbi əməkdaşlığının yüksək səmərə verdiyini aydın surətdə nümayiş etdirir. Elə Ermənistanı da qorxudan məqam məhz budur. Düşmən bilir ki, Azərbaycan Paksitan və digər ölkələrdən aldığı, eləcə də öz istehsalı olan silahları ona qarşı tətbiq etməli olsa, ağır duruma düşəcək. Istənilən halda isə Pakistan istehsalı olan raketləri tezliklə ordumuzun arsenalında görmək mümkün olacaq.
Nahid SALAYEV
