Xəbər verildiyi kimi, Azərbaycan Milli İstiqlal Partiyasının XI Qurultayı keçirilib. Videokonfrans şəklində keçirilən Qurultayda AMİP-in sədr əvəzi Arzuxan Əlizadə partiyanın sədri seçilib. Qurultayda AMİP Nizamnaməsinə əlavə və dəyişikliklər edilib, katiblik institutu ləğv olunaraq, yerinə müavinlik institutu yaradılıb. Həmçinin, qurultaylararası dövrdə partiyanın Ali orqanı olan Mərkəzi Şuraya, eləcə də Mərkəzi İntizam Komissiyasına seçkilər keçirilib, tərkib müəyyənləşib.
AMİP lideri Etibar Məmmədov Qurultaya qatılaraq, ölkədəki mövcud ictimai-siyasi durum və Partiyanın qarşısında duran vəzifələr, eləcə də sosial-iqtisadi sahədəki problemlər, Dağlıq Qarabağ, Türkiyə - Azərbaycan strateji müttəfiqliyi və bir sıra digər məslələrlə bağlı geniş çıxış edərək partiya rəhbərliyinə və yerli təşkilatlara tövsiyələrini verib.
Qurultayda bir sıra sahələr üzrə bəyanatlar, işçi sənədlər və Qətnamələr qəbul olunub. AMİP Qurultayı bütün sahələrdə islahatların həyata keçirilməsinə, iqtisadiyyatın ilberallaşdırılmasına, antiinhisar tədbirlərin gücləndirilməsinə, azad rəqabət mühitinin yaradılmasına ehtiyac olduğunu vurğulayaraq, iqtisadiyyatın neft-qaz sektorundan asılılığına son qoyulması, azad sahibkarlığın inkişafı, mülkiyyət toxunulmazlığı, rüşvət və korrupsiya, təhsil, səhiyyə, kənd təsərrüfatı, təqaüd və müavinətlər, ərzaq təhlükəsizliyi və bir sıra digər məslələrlə bağlı sənədlər qəbul edib.
Sonda, özündə Dağlıq Qarabağ problemi, Türkiyə Cümhuriyyəti ilə hərbi strateji müttəfiqlik müqaviləsinin bağlanması, siyasi sistem və idarəetmə, yerli özünüidarəetmə, xarici siyasət və digər sahələri ehtiva edən Qətnamə qəbul edilib.
Partiyanın bundan sonrakı fəaliyyətində hansı yeniliklərin olacağı, hakimiyyət və müxalifətə münasibət, cəmiyyətlə davranış, ideologiyasında yeniliklərin mümkünlüy ilə bağlı yeni sədr Arzuxan Əlizadə ilə söhbətləşdik. O, “Bakı-Xəbər”ə açıqlamasında bildirdi ki, belə diqqətə görə qəzetimizə xüsusi təşəkkürünü bildirir:“Uzun müddət idi ki, biz yeni qurultayın keçirilməsilə bağlı problemlər yaşayırdıq. 2015-ci ildən sonra bir neçə dəfə belə cəhdlər etdik. Təəssüflər olsun ki, bizim yerlə təmin olunmağımızda müəyyən problemlər yaşandı. Ötən ilin oktaybr ayında partiyanın Mərkəzi Şurasının toplantısında qərar verildi ki, 2019-cu ilin sonuna qədər AMİP-in növbəti qurultayı keçirilsin. Həmin dönəm növbədənkənar parlament seçkilərinin çağırıldığı zamana təsadüf etdiyi üçün qurultayın keçirilməsi bir qədər də təxirə düşdü. Planımız bu ilin martında keçirmək idi. Dünyada pandemiyanın hökm sürməsi səbəbilə biz qurultayı bir qədər də gec, onlayn şəklində keçirməli olduq. Siyasi partiyaların içində ilk dəfə bu formatda keçirilən qurultay sayıla bilər. Son bir ay müddətində biz texniki məsələləri həll etdik. Adı onlayn olsa da, bunun da öz çətinlikləri var. Bilirsiniz ki, AMİP qədim partiyadır, bizim bütün rayonlarda yerli təşkilatlarımız var. Onların hamısını qurultaya qoşmaq üçün müəyyən problemlər oldu. Elə yerlər var ki, orada internet problemi var, elə üzvlərimiz vardı ki, qurultaya qoşulması üçün texniki avadanlıqları yox idi. Bir ay ərzində biz bu problemlərin həlli ilə məşğul olduq. Bütün qurultay iştirakçılarına xüsusi hazırlanan videoçarxlar təqdim etdik. Yenilik odur ki, AMİP-in Nizamnaməsinə müəyyən dəyişiklik edildi. Sədr seçkisi qurultay günü oldu və mənə bu etimad göstərildi. Bu posta layiq görülmək şərəfli olmaqla yanaşı, eyni zamanda bir məsuliyyətdir. Mən bu məsuliyyəti üzərimə götürərək, partiyanın gələcək fəaliyyətində yeniliklərə imza atmağı qarşıma məqsəd qoyuram. Onu da qeyd edim ki, AMİP-in ideologiyasında hər hansı bir dəyişiklik olmayacaq. Bizim Məramnaməmiz və partiyanın əsas 6 prinsipi toxunulmazdır. Bu prinsiplərə birmənalı şəkildə əməl olunacaq. Çünki bu bizim ideologiyamızın əsasını təşkil edir. Bizim cəmiyyətlə münasibətlərimiz hər zaman açıq və şəfaf olub. Bu prinsipə toxunmayacağıq. Biz həm hakim partiya, həm də hakimiyyətyönlü partiyalarla əlaqələrimizi davam etdirəcəyik. Eləcə də müxalifətdə olan bütün partiyalarla istisnasız olaraq əməkdaşlıq edəcəyik. Bütün əlaqələrin, münasibətlərin kökündə dövlət və millət naminə əməkdaşlıq duracaq. Biz bu yöndə bütün əməkdaşlıqlara açığıq. Zaman-zaman bizim bir sıra partiyalarla əməkdaşlıq sazişlərimiz olub, indi də var. Bizim siyasi partiyalara müraciətimiz oldu. 12 partiya ilə birlikdə siyasi islahatlara baxışımızla bağlı sənədi hazırlayıb hakimiyyətə və cəmiyyətə təqdim etdik. Mənim sədrlik dönəmimdə də partiyalarla ikitərəfli və çoxtərəfli formatlarda əməkdaşlığımız davam etdiriləcək. Bizim hakim partiya ilə bir sıra məsələlərdə baxışlarımız tam fərqlənir, ancaq dövlətçilik və millətçilik məsələsində biz bəyan etmişik ki, müxaliflik qurtarır. Partiya maraqlarından daha çox, dövlət və millət maraqlarına xidmət edəcəyik”.
Partiya sədrinin verdiyi açıqlamadan məlum oldu ki, AMİP elə köhnə yolu ilə öz fəaliyyətini davam etdirəcək. Sadəcə, yeni sədr bu fəaliyyəti bir qədər çevikliklə aparmaq niyyətindədir. Hər halda, partiyada nəyin dəyişdiyini onun gələcək fəaliyyəti aydın göstərəcək.
Məhəmmədəli QƏRİBLİ
