Hindistanın Müstəqillik Günü münasibətilə Ermənistanın Baş naziri Nikol Paşinyan bu ölkənin Baş naziri Naredra Modini təbrik edib. Paşinyan iki xalqın çoxillik dostluğuna işarə edərək, iqtisadi, siyasi və mədəni sahələrdə Ermənistan-Hindistan əlaqələrinin dərinləşəcəyinə əminliyini ifadə edib.
Erməni mediası yazır ki, Hindistan hərbi-texniki əməkdaşlığa və silah bazarında iştirakını artırmağa xüsusi diqqət yetirir. Bu mənada Hindistan və Ermənistan böyük əməkdaşlıq potensialı olan qarşılıqlı faydalı tərəfdaş ola bilərlər. Mart ayında Hindistanın Ermənistana təxminən 40 milyon dollara silah tədarük etməsi ilə bağlı məlumatlar ortaya çıxdı. Hindistan mətbuatı İrəvanın 50 km məsafədə mina, raket və qumbaraatanları aşkarlaya bilən 4 dəst “Swathi” tipli radar aldığını yazdı. Qeyd olunur ki, qarşılıqlı faydalı Ermənistan-Hindistan əməkdaşlığının hərbi-siyasi tərkib hissəsinin genişləndirilməsi təhlükəsizlik mühiti kontekstində Ermənistanın hədəflərindən biri ola bilər.
Erməni tərəfi, hər zaman olduğu kimi, hiyləgər gedişlər edir. Paşinyan hesab edir ki, Hindistan Pakistanla olan gərgin münasibətlərə görə Ermənistanla hərbi əməkdaşlığa xüsusi önəm verər. Çünki Pakistanın Azərbaycanla çox yaxın münasibətləri var. Bir vaxtlar Hindistana səfər edən Ermənistanın sabiq prezidenti Serj Sarkisyan bəyan edib ki, guya Tac Mahal abidəsini erməni memarı tikib. Hindistana yaltaqlanmaq yolunu indi də Paşinyan tutub. Ümid edir ki, Pakistanla Hindistan düşmən olduğuna görə rəsmi Dehli İslamabadın acığına Ermənistana dəstək verəcək.
“Sadəcə, bu, erməni tərəfin arzusudur”
Məsələyə münasibət bildirən hərbi ekspert Ramil Məmmədlinin sözlərinə görə, bu, ermənilərin gözləntiləridir: “Ermənistanla Hindistan arasında hərbi sahədə əlaqələr var, amma elə də geniş deyil. Mart ayının ilk günündə Hindistan rəsmi mənbələri mətbuata Ermənistan tərəfinə 40 milyon dəyərində 4 ədəd “Swathi” WLR radarı satıldığını yaydılar. Bu RLS-lərin adı onların təyinat və funksiyasını tam əks etdirmir, bunlar hamımıza yaxşı tanış olan əks batareya radiolokasiya stansiyalarıdır. İddialara görə, bu tip radarların alınması ilə bağlı keçirilən tenderdə Hindistanın “Swathi” radarları ilə bərabər Rusiya və Polşa istehsalı olan analoji sistemlər də iştirak edib. Hindistan radarlarına üstünlük verilməsini hardasa siyasi motivlərlə də əlaqələndirmək mümkündür. Ermənistan rəhbərliyinin bu addımla məmnun olmadığı Azərbaycan-Pakistan əlaqələrinə qarşı hansısa balans “yaratdığını” nümayiş etdirdiyi aydın sezilir. Əslində, “Swathi” radarlarının alınması hələ Ermənistanın sabiq prezidenti Serj Sarkisyanın dövründə müzakirə mövzusu idi. Bu gün əldə edilən hind radarları barədə iki ölkə arasında ilkin razılaşma Paşinyanın hakimiyyətə gəlməsindən daha öncə - 2017-ci ildə Sarkisyanla Ermənistana rəsmi səfər edən Hindistanın vitse-prezidenti, Parlamentin Yuxarı Palatasının sədri Məhəmməd Həmid Ansari və onun rəhbərlik etdiyi nümayəndə heyəti arasında aparılan müzakirələr nəticəsində əldə edilib. Ancaq inanmıram ki, Pakistana görə Hindistan Ermənistanla hərbi əməkdaşlığa xüsusi önəm versin. Ona görə ki, Hindistan böyük ölkədir. Hindistanın Azərbaycanla da münasibətləri var. Digər tərəfdən, Ermənistan yoxsul bir ölkədir və bu səbəbdən cəlbedici deyil. Müasir silahları almaq üçün gərək böyük maliyyə imkanları olsun”.
Ekspertin fikrincə, sadəcə, bu, erməni tərəfin arzusudur. Yəni Pakistanla olan rəqabətə görə Hindistan Ermənistana önəm versin.
Vidadi ORDAHALLI
