Polşalı jurnalist Vitold Repetoviç iyulun 29-dan avqustun 7-dək Ermənistanın Tavuş və Azərbaycan Respublikasının işğal altındakı torpaqlarında olaraq çəkilişlər aparıb və məqalə yazıb. Ən pisi odur ki, separatçı rejimi müstəqil dövlət kimi təqdim edən həmin jurnalist hazırladığı materialda Azərbaycan və Türkiyəyə qarşı böhtanlar yağdırıb.
Qanunsuz olaraq işğal altındakı Azərbaycan torpaqlarına ayaq basan Polşa media mənsubu Vitold Repetoviç "Defenceence.pl" agentliyi, "TVP" kanalı və "Pulaski Foundation" siyasi-analitik mərkəzi ilə əməkdaşlıq edir. V. Repetoviçin Qarabağa etdiyi səfər haqqında geniş məqalə 8 avqust tarixində "Defense24.pl" xəbər agentliyində videonun müşayiəti ilə yayımlanıb.
Separatçı rejimi müstəqil dövlət kimi tanıdığı və təqdim etdiyi üçün Azərbaycan Polşadan izahat istəməlidir. Hər halda, dərhal belə hallara reaksiya vermək diplomatk və siyasi baxımdan faydalı olar. Çünki bu kimi halların üzərinə getmək lazımdır ki, erməni tərəfi separatçı qurumu “müstəqil” subyekt kimi kimi təqdim edə bilməsin.
“Azərbaycan tərəfi buna görə Polşaya etiraz notası verməli və izahat tələb etməlidir”
Məsələyə münasibət bildirən siyasi ekspert Ramil Hüseynovun fikrincə, kimliyindən asılı olmayaraq, Qarabağa qanunsuz səfər edən jurnalistlərin fəaliyyəti araşdırılmalıdır:“Belə jurnalistlərin adı nəinki qara siyahıya salınmalıdır, bütün müvafiq instansiyalar səviyyəsində buna etiraz edilməlidir. Görünən odur ki, Lapşin məsələsi bir sıra xarici jurnalistlərə dərs olmayıb. Ona görə də hesab edirəm ki, Azərbaycan tərəfi buna görə Polşaya etiraz notası verməli və izahat tələb etməlidir. Faktiki olaraq, sözügedən jurnalist Azərbaycan qanunlarını pozub. Bütün hallarda biz yorulmadan beynəlxalq hüquq çərçivəsində bu kimi hallarla mübarizəni davam etdirməliyik. Düzdür, dünyada ikili standartlar, haqsızlıqlar çoxdur. Ancaq heç bir halda işğal olunmuş ərazilərə bu sayaq səfərlərə, orada qanunsuz reportajların hazırlanmasına yol vermək olmaz. İmkan vermək olmaz ki, bu cür qanunsuz səfərlər adi hal alsın. Dövlət qurumları ilə yanaşı, diaspor təşkilatları da bu işdə fəal olmalıdır”.
Politoloqun fikrincə, Qarabağa qanunsuz xarici səfərlər məsələsində hərtərəfli mübarizə aparmalıyıq.
Vidadi ORDAHALLI
