23/09/2020 07:34
728 x 90

Təcavüzkar Ermənistanı silahlandırmaq Rusiyaya nə verdi – dünyada, regionda və Azərbaycan xalqının gözündə...

Məhəmməd Əsədullazadə: “Moskva çox ciddi geosiyasi səhvə yol verdi və bu onun regionda dayaqlarını zəiflədəcək”

img

Məlum olduğu kimi, avqustun 12-də Azərbaycan Prezidenti İlham Əliyev rusiyalı həmkarı Vladimir Putinə zəng edib. Ölkə başçısı Putinə iyulun 12-16-da Ermənistan-Azərbaycan dövlət sərhədinin Tovuz rayonu istiqamətində Ermənistanın törətdiyi təxribat barədə məlumat verib, İrəvanın növbəti təcavüzü nəticəsində Azərbaycanın hərbi qulluqçularının və bir mülki şəxsimizin həlak olduğunu vurğulayıb. İşğalçı Ermənistanın bu hücumunun əsas məqsədinin üçüncü tərəfləri münaqişəyə cəlb etmək olduğunu söyləyib.

Dövlət başçısı habelə sərhəddə toqquşmalar bitəndən sonra, iyulun 17-dən indiyədək Rusiyadan Ermənistana hərbi təyinatlı yüklərin daşınmasının intensiv xarakter almasının Azərbaycan ictimaiyyətində narahatlıq və ciddi suallar doğurduğunu Rusiya liderinin diqqətinə çatdırıb. Hərbi toqquşmadan dərhal sonra Rusiyadan Qazaxıstan, Türkmənistan və İranın hava məkanından istifadə edərək bu günədək Ermənistana daşınan hərbi təyinatlı yüklərin həcminin 400 tondan artıq olduğunu və telefon zənginin əsas məqsədinin də bu məsələnin aydınlaşdırılması olduğunu qeyd edib. Göründüyü kimi, Bakıdan edilən kritik zəngdə əsas məqsəd Rusiyanın təcavüzkar Ermənistanı durmadan silahlandırmasının Azərbaycanda yaratdığı haqlı narazılıq olub.

Bütün bu deyilənlərlə yanaşı, Rusiyanın təcavüzkar Ermənistanı silahlandırması özünün bir dövlət olaraq regionda, dünyada və Azərbaycan cəmiyyətində nüfuzuna necə mənfi təsir göstərir? Ümumən, Ermənistanın silahlandırmasının Rusiyaya nə faydası olub?

  • “Məhz bunu Tovuz təxribatları fonunda həyata keçirməsi iki ölkə əlaqələrində inamsızlığı yol açır”

Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Rusiyanın Ermənistana 400 ton silah göndərməsi və məhz bunu Tovuz təxribatları fonunda həyata keçirməsi iki ölkə əlaqələrində inamsızlığı yol açır: “Əlbəttə, bunu Moskva edir. İlk növbədə, Kreml ATƏT-in Minsk Qrupunun üzvü kimi vasitəçilik missiyasına zərbə vurur. Bu silahları baha qiymətə Azərbaycana satdığı kimi satsaydı, burada kommersiya maraqları ola bilərdi. Ancaq bu, Tovuz təxribatlarında Ermənistana pulsuz verilərək, birbaşa Azərbaycana qarşı hərbi fəaliyyətə dəstək vermək deməkdir. Bu, Azərbaycan cəmiyyətində Moskvaya inamı azaldır və hesab edirəm ki, Rusiya danışıqlarda əsas problem yaradan tərəfdir. Prezident İlham Əliyevin Rusiya dövlət başçısına zəng edərək Azərbaycan xalqının bundan narahat olduğunu ona deməsi, prinsipial mövqe tutması ölkəmizin bundan sonra daha da ciddi siyasi dəyişikliklər edəcəyinin mesajıdır. Azərbaycan artıq Türkiyə ilə siyasi-hərbi ittifaqı gücləndirir və bu imkan verəcək ki, ölkəmiz xarici təhdidlərə qarşı immunitetli olsun. Hesab edirəm ki, Moskva çox ciddi geosiyasi səhvə yol verdi və bu onun regionda dayaqlarını zəiflədəcək. Ermənistanda Paşinyan anti-Rusiya siyasəti aparır. Rusiya Ermənistana yaxınlaşdıqca, Paşinyan ona arxasını çevirir”.

Politoloqun fikrincə, Rusiya bundan itirəcək.

Vidadi ORDAHALLI 

Son xəbərlər