18/09/2020 21:30
728 x 90

Ermənistanın məkirli niyyətləri, havadarlarının canfəşanlığı - Əminə YUSİFQIZI yazır

img

Çox qəribədir. Mənfur ermənilər haqqında fikirləşəndə istər-istəməz Hüseyn Cavidin bu sözləri yadıma düşür:

- İblis nədir?

- Cümlə xəyanətlərə bais…

- Ya hər kəsə xain olan insan nədir?

- İblis.

«Cümlə xəyanətlərə bais..» Bu fikir ermənilərin elə bil boyuna biçilib. Əminəm ki, mən hər dəfə bu şeirdə «iblis» sözünü «erməni» sözü ilə əvəz etməyim Hüseyn Cavidin çox xoşuna gələrdi.

Fikirləşirəm, görəsən Ermənistanda hakimiyyətə gələnlərin hər biri niyə çönüb iblis olurlar?!  

İşğalçı Ermənistan hakimiyyətində kimin olmasından asılı olmayaraq, əksər siyasi qüvvələrin faşizm ideologiyasından qidalandığını əks etdirən o qədər faktlar var ki… Bu, tək bizəmi məlumdur? Əslində bütün dünya bunu bilir. Bütün dünya bilir ki, ermənilər öz uşaqlarına körpəlikdən təkcə azərbaycanlılara yox, qonşu xalqlara qarşı nifrət ruhunda böyüdülür. Nə böyük rəzalət, nə böyük iyrənclik.

Müşahidəçilərin fikrincə, N.Paşinyan diktaturasının mahiyyəti ondan ibarətdir ki, hüquq mühafizə sisteminin əsas funksiyası siyasi opponentlərə qarşı represiyaya yönəldilib, ölkədə söz azadlığı, hətta insanların şikayət etmək hüququ açıq-aşkar, heç nədən çəkinmədən pozulur.

Artıq bütün dünyanın gözü qarşısında Ermənistan sürətlə silahlanır. Daha heç kimə sirr deyil ki, Ermənistan 1991-ci ildə müstəqilliyini elan etdikdən sonra təhlükəsizlik siyasətini Rusiya ilə hərbi-siyasi əməkdaşlıq üzərində qurub. Eyni zamanda ondan 1 il sonra Ermənistan KTMT-yə üzv oldu. Bu ölkənin ərazisində həm də Rusiyanın 102-ci hərbi bazası fəaliyyət göstərir.

Təsadüfi deyil ki, Almaniyada fəaliyyət göstərən “Bonn International Center for Conversion” (BICC) təşkilatının hazırladığı “Global Militarisation Index’” məruzəsinə görə Ermənistan Avropada ən çox silahlanmış dövlətdir.

Tovuzla sərhəddəki təxribatın əvvəlcədən hazırlandığını bu da sübut edir ki, döyüş başlamazdan bir neçə gün əvvəl və toqquşmaların gücləndiyi dövrdə Ermənistana Serbiyadan çoxlu sayda silah-sursat, o cümlədən minaatan və müxtəlif kalibrli döyüş sursatı göndərilib.

Xarici İşlər Nazirliyi tərəfindən Serbiyanın Ermənistanın işğalçı siyasətinə və Azərbaycanın ərazi bütövlüyünə qarşı davam edən təcavüzünə dəstək xarakteri daşıyan qeyri-dost addımının Azərbaycan xalqında və rəhbərliyində dərin təəssüf doğurduğu bildirilib.

Avqustun 7-də Serbiya Prezidenti Aleksandr Vuçiç Azərbaycan Prezidenti İlham Əliyevə telefonla zəng edərək, iyul ayında Ermənistan-Azərbaycan sərhədində Ermənistanın təxribatı nəticəsində baş vermiş hadisələr zamanı Ermənistan tərəfinin Serbiyada istehsal olunan silahlardan istifadə etməsindən təəssüf hissi keçirdiyini bildirib, vəziyyətin araşdırılması ilə bağlı yaxın vaxtlarda Azərbaycana Serbiyanın yüksək səviyyəli nümayəndə heyətinin göndəriləcəyini qeyd edib və vədinə də əməl edib.

Ermənistanın Rusiyadan silah alması intensivləşir. Azərbaycan-Ermənistan dövlət sərhədinin Tovuz rayonu istiqamətində iyulun 12-də Ermənistanın atəşkəsi pozmasından bir neçə gün sonra - iyul ayının 17-dən avqust ayının 4-nə qədər Rusiyadan Ermənistana təyyarə ilə 7 reys silah daşınıb.

Rusiya Ermənistana satdığı silahları dünya silah bazarı qiymətinə deyil, daxili bazar qiymətinə satır ki, bu da Ermənistana olduqca ucuz başa gəlir.

Rusiyanın Ermənistana hansı əsaslarla silah satdığı məlum deyil. Belə ki, silah satışı haqqında müqavilənin nə vaxt imzalandığı haqqında hər iki ölkənin KİV-də heç bir məlumata rast gəlinmir.

Avqustun 12-də Azərbaycan Respublikasının Prezidenti İlham Əliyev Rusiya Federasiyasının Prezidenti Vladimir Putinə telefonla zəng edib. Prezident İlham Əliyev Prezident Vladimir Putinə iyulun 12-16-da Ermənistan-Azərbaycan dövlət sərhədinin Tovuz rayonu istiqamətində Ermənistanın törətdiyi təxribat barədə məlumat verib. Dövlətimizin başçısı Ermənistanın növbəti təcavüz aktı nəticəsində Azərbaycan Respublikası Silahlı Qüvvələrinin hərbi qulluqçularının və bir nəfər mülki şəxsin həlak olduğunu vurğulayıb. Prezident İlham Əliyev Ermənistan silahlı qüvvələrinin sərhəd boyunca kəndləri və yaşayış məntəqələrini artilleriya atəşinə tutması nəticəsində bir çox evlərin dağıldığını və yararsız hala düşdüyünü bildirib.

Ölkə Başçısı Ermənistanın bu hərbi hücumunun əsas məqsədinin üçüncü tərəfləri Ermənistan-Azərbaycan münaqişəsinə cəlb etmək olduğunu qeyd edib.

Ermənistan-Azərbaycan sərhədində baş vermiş toqquşmalar başa çatandan sonra iyulun 17-dən bu günə kimi Rusiyadan Ermənistana hərbi təyinatlı yüklərin daşınmasının intensiv xarakter almasının Azərbaycan ictimaiyyətində narahatlıq və ciddi suallar doğurduğunu Rusiya Prezidentinin diqqətinə çatdırıb.

Ali Baş Komandan Ermənistan-Azərbaycan sərhədində baş vermiş hərbi toqquşmadan dərhal sonra Rusiyadan Qazaxıstan, Türkmənistan və İran İslam Respublikasının hava məkanından istifadə edərək bu günə qədər Ermənistana daşınan hərbi təyinatlı yüklərin həcminin 400 tondan artıq olduğunu bildirib və telefon zənginin əsas məqsədinin bu məsələnin aydınlaşdırılması olduğunu vurğulayıb.

Bəli, Ermənistana silah satılması əslində Azərbaycan torpaqlarının işğalında faktiki olaraq iştirak kimi başa düşülür. Bu isə Azərbaycan Rusiya münasibətlərinə ciddi zərbə vurur. Düzdür, bəhanələr gətirilir, hər iki tərəfə silah satıldığı bildirilir. Həqiqət isə budur ki, əvvəla Ermənistan Azərbaycan torpaqlarını işğal edib. İkincisi isə, əslində Rusiya Ermənistana silah satmır, hədiyyə edir. Bu isə çox ciddi məqamlardan xəbər verir. Və heç şübhəsiz ölkənin Ali Baş Komandanı bütün bunları bağışlamaq fikrində deyil.

Əminə YUSİFQIZI,
Yevlaxda çıxan «Kür» qəzetinin baş redaktoru,
Respublikanın əməkdar jurnalisti  

Son xəbərlər