Azərbaycan diasporunun güc göstəriciləri və Mehriban Əliyevanın çağırışı...
İyulun 12-də işğalçı Ermənistanın silahlı bölmələri tərəfindən növbəti dəfə Azərbaycan-Ermənistan dövlət sərhədində, Tovuz istiqamətində mövqelərimiz ağır artilleriyadan və minaatanlardan atəşə tutulmağa başladı və bir neçə gün davam edən döyüşlərdə şanlı Azərbaycan ordusu Ermənistan ordusuna ağır zərbə vurdu.
Müharibə isə həm də informasiya cəbhəsində genişləndi. Belə məqamda Birinci vitse-prezident Mehriban Əliyeva Azərbaycanın diaspora nümayəndələrinə müraciət etdi. Mehriban Əliyevanın müraciətindən sonra dünya azərbaycanlıları daha mütəşəkkil formada birləşib, birlik, həmrəylik nümayiş etdirərək dünyanın müxtəlif ölkələrində dinc, qanuni aksiyalar keçirdilər. Ali Baş Komandan, Prezident İlham Əliyevə, Azərbaycan Ordusuna, əsgərlərimizə dəstək nümayiş etdirdilər, işğal altındakı torpaqlarımızın işğaldan azad olunmasını tələb etdilər. Bu, qürurverici bir mənzərə və Mehriban Əliyevanın müraciətinə adekvat reaksiya idi. Erməni diasporunun, erməni lobbi qruplarının təxribatlara əl atacağını nəzərə alaraq, Birinci vitse-prezident diasporumuzu təxribatlara uymamağa və aksiyaları dinc, hüquqi müstəvidə keçirməyə çağırdı.
Azərbaycan Respublikasının Birinci vitse-prezidenti Mehriban Əliyevanın dünya azərbaycanlılarına etdiyi müraciətin mətninə diqqət edək:
"Əziz həmvətənlər!
Amerikanın Los-Anceles şəhərində və bəzi Avropa ölkələrinin paytaxtlarında yaxın günlərdə baş vermiş hadisələr milyonlarla azərbaycanlı kimi məni də dərindən hiddətləndirib.
Azərbaycanlıların öz Vətənini dəstəkləmək üçün müvafiq dövlət orqanları ilə əvvəlcədən razılaşdırılmış dinc, vətənpərvərlik aksiyaları erməni diasporunun nümayəndələri tərəfindən fiziki zorakılıq, aqressiya və qeyri-insani nifrət hissi ilə üzləşib.
Yaxşı hazırlıq və təlim keçmiş təhrikçilər, sayca xeyli üstün olmalarından istifadə edib, dinc nümayişçilərə hücum çəkərək onlara xəsarət yetiriblər. Bir sıra hallarda aqressiv əhval-ruhiyyəli erməni qrupları həmin vaxt azlıqda qaldığına görə azğınlaşmış kütləyə müqavimət göstərə bilməyən azərbaycanlılara hücum ediblər.
Onilliklər boyu aşılanan nifrət və azərbaycanofobiya ideologiyası öz “eybəcər bəhrəsini” verir – ermənilərin bir qismi dinc azərbaycanlı nümayişçilərə dünya paytaxtlarının mərkəzində daş atır, digərləri Azərbaycan vətəndaşlarının evlərinə ağır artilleriya silahlarından atəş açırlar.
Tarixdə Azərbaycan xalqına qarşı bu cür cinayətlər törədilməsi nümunələri çox olub.
1992-ci il fevralın 25-dən 26-na keçən gecə Xocalı şəhərinin dinc azərbaycanlı əhalisinin Ermənistan silahlı qüvvələri tərəfindən kütləvi şəkildə məhv edilməsini xatırlamaq kifayətdir. Bu faciəli hadisələr 10-dan çox dövlət tərəfindən soyqırımı kimi tanınıb və beynəlxalq təşkilatlar səviyyəsində pislənib.
O qanlı gecədə təpədən dırnağa qədər silahlanmış erməni döyüşçülər xüsusi qəddarlıqla 613 nəfəri qətlə yetirib, 421 dinc sakin işgəncələrə və təhqirlərə məruz qalıb, 1275 nəfər itkin düşüb və ya girov götürülüb, şəhər özü isə tamamilə yandırılıb.
Mindən çox dinc vətəndaş odlu silah yaraları nəticəsində şikəst olub. Öldürülənlər arasında 106 qadın, 63 uşaq, 70 ahıl şəxs olub.
Səkkiz ailə tamamilə məhv edilib, 25 uşaq hər iki valideynini, 130 uşaq valideynlərindən birini itirib. 56 nəfər diri-diri yandırılıb.
İki yaşlı Zəhra Quliyevanın erməni təcavüzkarlar tərəfindən qətlə yetirilməsini də qeyd etməmək olmaz. Zəhra 2017-ci il iyulun 4-də Füzuli rayonunun Alxanlı kəndinin iriçaplı silahlardan atəşə tutulması nəticəsində nənəsi ilə birlikdə həlak olub. Başqa bir misal. 2020-ci il iyulun 14-də Tovuz rayonunun 76 yaşlı dinc sakini Əziz Əzizov erməni silahlı qüvvələri tərəfindən mülki obyektlərin artilleriya atəşinə tutulması nəticəsində həlak olub.
Erməni təbliğat-təşviqat şəbəkəsi 30 ildən artıqdır ki, bu amansız cinayətlərə haqq qazandırmağa çalışaraq çoxsaylı diasporunun köməyi ilə məkrli anti-Azərbaycan təbliğatı aparır. Sirr deyil ki, ölkəmizə qarşı böhtan kampaniyalarının mütləq əksəriyyəti də məhz erməni diasporu tərəfindən inspirasiya edilir və maliyyələşdirilir.
Nifrət və aqressiya dərəcəsi o qədər artıb ki, bu diasporun bəzi nümayəndələri özlərini demokratiyanın beşiyi hesab edən Qərb ölkələrinin paytaxtlarında qanunsuzluq və hərc-mərclik törədirlər.
Avropa siyasətinin mərkəzi sayılan Brüsseldə Azərbaycan Respublikası səfirliyinin daşa basılmasını, dinc nümayişçilərə xəsarət yetirilməsini başqa necə izah etmək olar?
Los-Ancelesdən, Brüsseldən və digər şəhərlərdən çəkilmiş, düşmənlərimizin həqiqi simasını göstərən zorakılıq və vandalizm kadrları həm haqlı olaraq hiddət, həm də əsaslı suallar doğurur.
Həmin ölkələrin hüquq-mühafizə orqanları azğınlaşmış bandit qruplaşmalarının bu cür hərc-mərclik törətməsinə nə üçün imkan verirlər? Bu cinayətlərə necə göz yummaq olar?
Mən bütün dünyada yaşayan milyonlarla azərbaycanlı adından ABŞ-ın, Belçikanın və digər dövlətlərin hüquq-mühafizə orqanlarını bu hadisələri hərtərəfli təhqiq etməyə, onlara müvafiq hüquqi qiymət verməyə və bütün təqsirkarları məsuliyyətə cəlb etməyə çağırıram, çünki qanunsuz əməllər cəzalandırılmalıdır.
Mən, həmçinin, çoxsaylı qeyri-hökumət təşkilatlarını, o cümlədən insan haqlarının müdafiəsini özlərinin missiyası elan edən “Freedom House”, “Amnesty International” və “Human Rights Watch” təşkilatlarını törədilmiş hadisələrə ədalətli qiymət verməyə çağırıram. Lakin nədənsə, biz hələ onların səslərini eşitmirik. Ümidvaram ki, bu qurumlar yetərincə prinsipiallıq nümayiş etdirərək, ikili standartlar siyasətindən əl çəkəcək və faktlara əsaslanan bəyanatlarla çıxış edəcəklər.
Əziz qardaşlar və bacılar!
Baş verənlər Ermənistanın işğalçı siyasətinin dinc Azərbaycan əhalisi üçün nə qədər təhlükəli olmasını dünya birliyinə əyani şəkildə nümayiş etdirir.
Belə hallarda bizim borcumuz bu həqiqəti dünya birliyinə çatdırmaqdır.
Bizim vəzifəmiz birləşmək və son zorakılıq aktlarının ədalətlə təhqiq edilməsini, təqsirkarların məsuliyyətə cəlb olunmasını bütün tribunalardan təkidlə tələb etməkdir. Hər bir səsin əhəmiyyəti var!
Mən bütün dünya azərbaycanlılarını birgə hərəkət etməyə, azğınlaşmış düşmənə layiqli cavab vermək üçün bizim diasporun bütün potensialını birləşdirməyə çağırıram. Bununla belə, unutmamalıyıq ki, qeyri-insani nifrət hissini əsas götürən vəhşilərə və banditlərə bənzəmək olmaz. Bizim mübarizəmiz yalnız hüquq müstəvisi çərçivəsində aparılmalıdır.
Bu günlərdə bütün dünya şəhərlərində öz səsini ucaltmış və Azərbaycan bayrağını qaldırmış hər kəsə təşəkkür edirəm.
Qoy, heç kim şübhə etməsin ki, heç bir provokasiya bizi haqq yolundan dönməyə məcbur edə bilməz. Biz milyonlarlayıq, bizim bir məqsədimiz var – Vətəni müdafiə etmək, onun ərazi bütövlüyünü və tarixi həqiqəti bərpa etmək.
Ona görə ki, Qarabağ Azərbaycandır və nida işarəsi!"
Bir məqamı da təəssüflə qeyd etmək lazımdır. Bu proseslər zamanı xaricdəki antimilli ünsürlərin erməniləri müdafiə etməsinin də şahidi olduq. Sevinc Osmanqızı, Arif Məmmədov, Vidadi İsgəndərli kimilər, Milli Şura ətrafında birləşənlər birbaşa Ermənistana, ermənilərin maraqlarına xidmət etdiklərini ortaya qoydular. Etnik terrorizmin bir forması kimi özünü büruzə verən erməni terrorizminin bu yolla dəstəklənməsi qəbuledilməzdir. Həmin ünsürlər erməni tərəfinin vandalizmini, təxribatlarını müdafiə edir, baş verənlərə görə Azərbaycan tərəfini günahlandırmağa çalışırdılar. Özlərinə məxsus internet kanallarında, verdikləri müsahibələrdə təkrar-təkrar deyirdilər ki, günah Azərbaycan tərəfində, azərbaycanlılardadır. Bununla da iç üzlərini açdılar.
Qeyd edək ki, Azərbaycan diasporunun güc göstəriciləri Mehriban Əliyevanın çağrışından sonra özünü daha aydın biruzə verməyə başladı. Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Mehriban xanımın müraciətində bir çox vacib məqamlar və tövsiyələr əksini tapıb:“Hazırkı dönəmdə xaricdə yaşayan azərbaycanlılara belə bir müraciətin ünvanlanması xüsusi əhəmiyyət daşıyır. Xaricdə yaşayan hər bir azərbaycanlı bu çağırış və tövsiyələrə əməl etdi, təxribata uymadı. Təəssüf ki, son günlər ermənilər azərbaycanlılara qarşı, hər zaman olduğu kimi, bu dəfə də növbəti vəhşilik və aqressiya nümayiş etdirdilər. Bu kimi halların baş verməsi Azərbaycan cəmiyyətində ciddi hiddət və narahatlıq doğurur. Eyni zamanda, ermənilərin həqiqi mahiyyətini ifşa edir. Bu millətin bacardığı ən yaxşı iş terror və qətldir. Onlar dəfələrlə azərbaycanlılara qarşı bu bədnam əməlləri törədiblər”.
Partiya sədrinin sözlərinə görə, müraciətdə haqlı olaraq qeyd edilir ki, baş verən hadisələrə beynəlxalq qurumlar mütləq reaksiya verməlidir:“Azərbaycanda baş verən kiçik bir hissəni böyüdən bu beynəlxalq qurumlar əgər obyektivdirlərsə, bu məsələyə də ədalətli münasibət bildirəcəklər. Biz bunu onlardan gözləyirik. Etməsələr, növbət dəfə qeyri-obyektv olduqlarını, reallıqlara iki standartlarla yanaşdıqlarını nümayiş etdirmiş olacaqlar. Bu reaksiyanı, xüsusilə Azərbaycana qərəzli mövqeləri ilə seçilən “Freedom House”, “Amnesty International” və “Human Rights Watch” təşkilatlarından gözləyirik. Bu qurumlar Azərbaycana qarşı hər zaman qərəzli olublar.
Azərbaycan bütün zorakılıq tördənlərin məsuliyyətə cəlb edilməsi üçün həm diplomatik missiyalar, həm də hüquq-mühafizə orqanları vasitəsilə müraciətlər ünvanlayıb. Əminik ki, bütün qanun pozuntularına hüquqi qiymət veriləcək, günahkarlar tapılaraq cəzalandırılacaq. Bizim işimiz, ermənilərdən fərqli olaraq, haqq işidir”.
Elşən Həsənovun sözlərinə görə, diqqət çəkən məqamlardan biri ermənilərin ASALA terror təşkilatı ilə bağlı oldu:“ Yaxın tarixdə türk diplomatlara hücumları ilə gündəmə gəlmiş ASALA terror təşkilatı bir daha ortaya çıxdı. ASALA terror təşkilatının adı yazılmış köynəklər geyinmiş qrupların azərbaycanlılara hücumu, xüsusi zorakılığa, vəhşiliyə yol vermələri nifrətlə qarşılanmaya bilməzdi. Los-Anceles, Vaşinqton, Brüssel və digər şəhərlərdə soydaşlarımıza, hətta diplomatik korpuslarımıza hücumlar oldu. Soydaşlarımız belə təxribatlara hüquqi müstəvidə reaksiya verdilər və bütün dünya erməni vandalizminin şahidi oldu. Bizim diasporun mütəşəkkil fəaliyyətinin nəticəsidir ki, Ermənistan baş naziri diasporla işə məsul nazirliyin aparıcı və məsul işçilərini işdən çıxarmasının da diaspor sahəsində uğursuzluğun nəticəsi olduğunu vurğulayıb. Bu mütəşəkkil və nizamlı fəaliyyətdə Mehriban xanımın müraciətinin oynadığı müsbət rolu qəbul etmək lazımdır. Həmvətənlərimiz gördü ki, onların arxasında Azərbaycan dövləti durur”.
Son nəticədə qeyd etməliyik ki, gənc Azərbaycan diasporu əsirlər boyu təşkilatlanmış erməni diasporunu açıq müstəvidə məğlub etdi.
Məhəmmədəli QƏRİBLİ
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.
