Azərbaycanın enerji resurslarının dünya bazarlarına çıxarılmasında əsas tranzit məkan olan Gürcüstanda cari ilin oktyabrında keçirilməsi nəzərdə tutulan parlament seçkiləri ətrafında indidən maraqlı proseslər müşahidə edilir. Hətta fikirlər səslənir ki, bu seçkilər Gürcüstanda yenidən hakimiyyət dəyişikliyinə rəvac verə, xüsusən də Gürcüstan eks-prezidenti Mixail Saakaşviliyə bağlı qüvvələrin iqtidara gəlişini təmin edə bilər.
Bu barədə danışmazdan öncə xatırladaq ki, Gürcüstanda xeyli sayda soydaşımız da yaşayır. Onların səsi uğrunda da siyasi qüvvələrin açıq mübarizəsi başlayıb. Elə soydaşlarımız da, əvvəlkindən fərqli olaraq, indi siyasi proseslərdə daha çox fəallıq nümayiş etdirir. Bu da onlara diqqəti daha da artırır. Bu arada isə gürcü müxalifəti Gürcüstan hökumətinin koronavirus pandemiyasından istifadə edərək parlament seçkilərini təxirə salacağı barədə fikirlər irəli sürüb, beynəlxalq təşkilatlara müraciət göndəriblər. Parlamentin sabiq sədri, hakim “Gürcü arzusu-Demokratik Gürcüstan” partiyasının funksionerlərindən olan İrakli Kobaxidze müxalifətin fikirlərinə cavabında deyib ki, koronavirusun ikinci dalğası baş versə, seçkilər təxirə salına bilər. Kobaxidzenin bu sözləri müxalifət düşərgəsində daha ciddi müzakirələrə səbəb olub. Elə bundan sonra Gürcüstanın baş naziri Giorgi Qaxaria bildirib ki, oktyabr ayında keçirilməsi nəzərdə tutulan parlament seçkilərini heç bir təhlükə gözləmir. Seçkilər vaxtında, şəffaf və demokratik şəraitdə keçiriləcək:“Seçkilərin Konstitusiyada nəzərdə tutulmuş vaxtda, yəni oktyabr ayında keçirilməsinə heç bir maneə yoxdur. Seçkiləri heç nə risq altına ala bilməz. Hökumət bu seçkiləri demokratik, azad, şəffaf və beynəlxalq standartların tələblərinə uyğun şəkildə keçirməkdə israrlıdır”.
Amma müxalifətin reytinqinin artması da indi hakimiyyəti narahat edir. Bu fonda diqqət çəkən daha bir məqam odur ki, parlament seçkisinə az qalmış müxalifət partiyalarının yaratdığı “Güc Birlikdədir“ koalisiyasından qopmalar başlayıb. Yeni Gürcüstan Partiyasının sədri Georgi Vaşadze artıq koalisiyadan ayrıldığını elan edib. Son prezident seçkisində aktiv iştirakçı kimi koalisiyanın namizədi Qriqol Vaşadzeni müdafiə edən Georgi Vaşadze ilə bərabər, koalisiyanı Qanun və Ədalət Partiyası da tərk edib. Hər iki partiya birgə Aqmaşenebeli Strategiyası Platforması yaradaraq seçkiyə gedəcəklərini açıqlayıblar. Vaşadze isə hədəfinin Gürcüstanın baş naziri olmaq olduğunu bildirib. Maraqlı məqam isə Vaşadzenin koalisiyadan “Edison Risöç” şirkətinin Gürcüstanda keçirdiyi sorğunun nəticələrini açıqlamasından sonra ayrıldığını elan etməsi olub. Belə ki, bu sorğuya əsasən, respondentlərin 59%-i növbəti seçkidə yeni partiyaların qələbə qazanmasını istədiklərini söyləyib. Üstəlik, sorğuda respondentlər daha çox Vaşadzenin partiyasına güvəndiklərini deyib.
“Güc Birlikdədir” koalisiyasının üzvü olan Vahid Milli Hərəkat Partiyası Georgi Vaşadzenin addımını kəskin tənqid edib. Gürcüstanın eks-prezidenti Mixail Saakaşvili isə Vaşadzenin qaranlıq tərəfə keçdiyini bildirib. O, baş verənləri Bidzina İvanişvilinin oyunları adlandırıb. Bu durumda Saakaşvili bildirib ki, Gürcüstan Vahid Milli Hərəkat Partiyası seçkidə təkbaşına qalib gəlməlidir. O, seçkidə heç bir partiyanın Vahid Milli Hərəkatla mübarizə aparmaq gücündə olmadığını bildirib:“Mənim fikrim o idi ki, bütün real müxalif qüvvələr birləşdirilib, vahid parlament siyahısı hazırlansın. Onlar bundan imtina etdilər ki, bu da çox pisdir. İndi Vahid Milli Hərəkat onun ümumi siyahı ilə etməsi gərəkdiyini etməlidir. Milli Hərəkat bu seçkidə təkbaşına qalib gəlməlidir və əminəm ki, bu belə də olacaq. Mixail Saakaşvili adı isə Avropa radarlarından yoxa çıxmayacaq, Gürcüstan adı üçün bu baxımdan böyük təhlükə var. Mən Avropanın ən böyük ölkəsində baş nazir vəzifəsinə namizəd ola bilərəm. Siz Ukrayna mətbuatı ilə tanış olub, buna əmin ola bilərsiniz. Mənim Ukraynada çox vacib rolum var. Biz artıq Gürcüstanın ölkə kimi yoxa çıxmasından danışmalıyıq. İvanişvili istəyirdi ki, Saakaşvili dünya radarlarından yox olsun. Mən bütün dünya radarlarında çox dəqiq şəkildə təmsil olunuram, Gürcüstan isə artıq orada yoxdur”. Bu durumda sabiq prezident xalq və onun tərkib hissəsi olan azərbaycanlıların da seçkidə mühüm rol oynayacağını bildirib: “Son 2 seçki zamanı Gürcüstanın müasir tarixində ilk dəfə olaraq Gürcüstan azərbaycanlıları müxalifətə səs verdilər. Mənim üçün bu çox əlamətdardır. Bu o deməkdir ki, azərbaycanlılar da gürcülərlə yanaşı, özlərini ölkənin sahibi hiss edirlər və ona görə məsuliyyət daşıyırlar. İndiki hakimiyyət onlarla oyun oynaya bilməz. Onlar Gürcüstanın vətənpərvərləridir. Onlar Gürcüstan üçün çox iş görüblər və gələcəkdə də görəcəklər. Biz onları Gürcüstan hökumətinə daha çox inteqrasiya etməliyik. Çünki onlar da Gürcüstan cəmiyyətinin üzvləridir. Bu nöqteyi-nəzərdən Gürcüstan azərbaycanlıları, təzyiqə və hədələrə rəğmən, bu seçkilərə də əsl vətənpərvərlər kimi baxıb azad seçim etməlidirlər”.
Xatırladaq ki, soydaşlarımızın Saakşavili komandasına rəğbəti böyükdür. Saakşavilinin isə Gürcüstana təsirləri artır. Rusiyanın “Kommersant” qəzeti bu xüsusda yazır:“Mixail Saakaşvilinin Ukrayna prezidenti Vladimir Zelenski komandasında yerini tapması tamamlandıqdan sonra məlum olub ki, keçmiş Gürcüstan liderinin fəaliyyəti Milli İslahatlar Şurası İcra Komitəsinin rəhbəri kimi daxili gündəliklə məhdudlaşmayacaq. O, Gürcüstan hakimiyyətinin hərəkətlərini şərh edir və ümumiyyətlə, yeni vəzifəsində vətənindəki siyasi proseslərdən yayınmaq niyyətində olmadığını açıqlayır. Mütəxəssislər əmindirlər: Mixail Saakaşvili Kiyevdəki hazırkı vəziyyətdən Gürcüstanda keçiriləcək parlament seçkilərinə təsir etmək üçün istifadə edəcək”.
Tahir TAĞIYEV
