Tovuz istiqamətində bu il iyulun 12-də Ermənistan silahlı qüvvələrinin törətdiyi təxribat düşmən ölkə daxilində yeni bir vəziyyət yaradıb. Rusiyadan və Kollektiv Təhlükəsizlik Müqaviləsi Təşkilatından bütün yalvarışlarına baxmayaraq heç bir dəstək ala bilməyən Nikol Paşinyan iqtidarı indi cəmiyyətdə Kremlə qarşı qəzəb və narazılıq yaratmaq üçün yeni kampaniyaya start verib. Erməni mediasına nəzər saldıqda bəlli olur ki, Rusiyaya qarşı yeni təbliğat kampaniyası başlanıb.
Bundan başqa, yenə Rusiyaya bağlı müxalif qüvvələr də indi əsas hədəflər sırasındadır. Rusiya ilə əlaqəli fəaliyyət göstərən “Daşnaksütyun”, “Çiçəklənən Ermənistan” və “Vətən” partiyalarına qarşı repressiv fəaliyyət, “Qarabağ klanı”nın yenidən hədəfə alınması da bunun təsdiqidir. Müxaliflər isə, öz növbəsində, Nikol Paşinyanı Soros Fondunun sifarişi ilə hərəkət etdiyinə görə ittiham edirlər. Burada o da diqqətə çatdırılır ki, Soros Fondunun Qafqazda yalnız İrəvanda ofisi var və bu fond koronavirusla mübarizə adı ilə MDB ölkələri içərisində yalnız Ermənistana vəsait ayırıb. Hazırda Paşinyanın komandası da Soros Fondu ilə uzun müddət çalışan şəxslər, ekspertlərin dediyi kimi, “Sorosun uşaqları”ndan ibarətdir. Bu durumda Respublika Partiyasının sədr müavini Eduard Şarmazanov bildirir ki, Paşinyan repressiyalarında məhz ona kənardan verilən göstərişlər əsas rol oynayır:“Bu günlərdə müxalifətin ordu və milli bayraq ətrafında birləşmək çağırışlarına baxmayaraq, respublikada baş nazir Nikol Paşinyan tərəfindən siyasi repressiyalar və təqiblər davam edir. Xatırladım ki, Nikol Paşinyanın hakimiyyət dövründə Soros Fondunun nümayəndələri hakimiyyətə gəldilər”. Şarmazanovun sözlərinə görə, sorosçular dövlət siyasətinin həyata keçirilməsi ilə bağlı hər hansı təcrübəyə malik deyillər və bu səbəbdən də repressiyalar genişlənir:
“Dünyada nöqsanları olmamış siyasi qüvvə yoxdur. Lakin həmişə geriyə baxmaq lazım deyil. Biz keçmişin səhvlərindən, nöqsanlarından, çətinliklərindən nəticələr çıxarmalı və gələcəyə baxmalıyıq. Amma indiki hakimiyyət bunu edə bilmir. Əvəzində Ermənistan uduzur. Bura Dağlıq Qarabağ münaqişəsi də daxildir. Ermənistan hökumətinin rəhbəri Sankt-Peterburq və Vyanada qurmağa nail olunmuş platformanı rədd etdi. Bu halda söhbət nədən gedir?. Paşinyan hələ də bilmir ki, Türkiyəni saxlayan əsas təminatçılar 102-ci rus hərbi bazası və KTMT-dir. Bu səbəbdəndir ki, Paşinyan və onun tərəfdarları antirus siyasəti davam etdirir. Nikol Paşinyanın səriştəsizliyini ört-basdır etmək üçün necə yalan yaymaq və XİN səviyyəsində “Vyana, Sankt-Peterburq razılaşması da olmayıb” demək olar? Ələ salmısınız? Yaxşı, bu qədər yalan danışmaq olar? Bu dərəcədə yalançı olmaq olar? 2016-cı ilin mayında Vyanada İlham Əliyev-Serj Sarkisyan görüşü baş tutub, görüşdə həmsədrlik edən ölkələrin XİN rəhbərləri də iştirak edirdi. Bir ay sonra, həmin ilin iyununda artıq Sankt-Peterburqda Rusiya prezidenti Vladimir Putinin vasitəçiliyi ilə Əliyev-Putin-Sarkisyan üçtərəfli görüşü baş tutdu, görüş nəticəsində mətbuatda rəsmi bəyanat nəşr olunmuşdu. Nikol elə bilir ki, insanların yaddaşı yoxdur”.
Şarmazanov jurnalistlərlə görüşü zamanı milliyətcə erməni, Rusiyada yaşayan jurnalist Marqarita Simonyanın son zamanlar tirajlanmış “Facebook” qeydinə də toxunub:“Marqarita Simonyanın dediklərindən hansı yalandır? Nikol Paşinyan erməni-rus münasibətlərini korlayıb, sıfır səviyyəsinə endirib. Cənab baş nazirin səriştəsiz siyasətinə görə təkcə KTMT-də yox, hər yerdə izqoy olmuşuq”. Elə Rusiyanın “Svetoç TV” “YouTube” kanalında “Ermənistan: Sorosun gəmisi” adlı videoda da eyni mövqe bölüşülür. Videoda Rusiyaya qarşı erməni nifrətinin səbəbləri, burada Soros amilinə xüsusi toxunulur: “Sorosun xəyalları Ermənistanı valeh edir!!! Fərziyyə, yoxsa reallıq?! Rusiyanı və rusları açıq təhqir edən yeni erməni nazirlərin - Soros üzvlərinin siyahısı!!! Ermənistanda Sorosa qarşı çıxanlar üçün əsas təhlükə nədir? Həbslər və saxlanmalar. Hakimiyyət bütün bunları açıq həyata keçirir, Rusiya ilə münasibətləri Sorosa qurban verir”. Videoda, həmçinin, Ermənistanda baş verən son dərəcə həyəcanverici proseslərin - həm daxili siyasi sahədə, həm ictimai münasibətlər, əhval-ruhiyyə, həm də xarici siyasət sahələrində cərəyan etməsinə diqqət çəkilir:“Cəmiyyət heç vaxt bu qədər parçalanmamış, nifrət, dözümsüzlük, intizamsızlıq istər media məkanında, istərsə də sosial şəbəkələrdə hakimiyyətin davamlı təxribatçı ifadələrindən qaynaqlanaraq bu qədər açıq vəziyyət almamışdı”.
Rusiyalı politoloq, Yeni Dövlətlər Beynəlxalq İnstitutunun direktoru Aleksey Martınov bildirir ki, Paşinyan Sorosa bağlı olduqca İrəvan-Moskva münasibətlərində problemlər davam edəcək:“Söhbət müxtəlif Qərb fondları ilə, daha çox Corc Sorosun strukturları ilə sıx bağlı olan kifayət qədər ixtisaslaşmış qruplardan gedir. Ermənistanın baş naziri Nikol Paşinyan bunun əyani təsdiqidir. Niyə “yoldaş” Soros postsovet məkanında agentlərini qəflətən aktivləşdirdi? Bəlkə də bu sualı Corc Sorosun özünə vermək lazımdır. Amma Ermənistanda indiki hakimiyyətin bu addımları ondan gələn göstərişlə atdığı aydın görünür. Onlar, sadəcə, Amerika pullarının haqqını verirlər. Bu bir sözlə ifadə oluna bilər – satqınlıq”. Bütün bunlar Ermənistan-Rusiya münasibətlərində qarşıdakı dövr ərzində də ciddi kəskinləşmələrin olacağını göstərir.
Nahid SALAYEV
