Ermənistanın baş naziri Nikol Paşinyan əsəbiləşərək Diaspora İdarəsinin 10 əməkdaşını tutduqları vəzifədən azad edib. Ermənistan mətbuatının verdiyi məlumata görə, buna səbəb idarənin qeyri-effektiv, yarıtmaz fəaliyyəti olub.
Bildirilir ki, erməni cəmiyyəti və hökuməti Azərbaycanla sərhəddə gərginlikdən sonra müxtəlif ölkələrdə yaranan azərbaycanlı-erməni qarşıdurmasında diasporanın passivliyindən narahat və narazı qalıb. Məlumatda deyilir ki, bugünlərdə Nikol Paşinyan Diaspor İdarəsinin rəhbəri Zare Sinanyana sərt təpki göstərib. Onunla söhbətdə Ermənistanın diaspora siyasətinin məğlubiyyət səbəbi kimi onun yarıtmaz rəhbərliyini göstərib və qınayıb. Söhbətin sonunda Paşinyan diaspor komissarı Sinanyandan tələb edib ki, xaricdəki dairələrdə erməni diasporunun məyusluq əhvalını aydınlaşdırsın və təcili olaraq ona bu barədə hesabat versin. Paşinyanın bu davranışı diaspor sahəsində məğlubiyyətin etirafı sayıla bilərmi?
Beynəlxalq Diaspor Mərkəzinin rəhbəri İsmayıl Ağayev “Bakı-Xəbər”ə açıqlamasında bildirdi ki, Azərbaycan diasporunun son dövrlərdə öz fəaliyyətini kifayət qədər aktivləşdirməsi Ermənistanda narahatlıq doğurmaya bilməzdi:“Son zamanlar Azərbaycan diasporu kifayət qədər effektli fəaliyyət göstərir. Məhz bu fəaliyyətin nəticəsidir ki, Ermənistanın Tovuz rayonumuz istiqamətində törətdiyi hərbi təxribatla bağlı həqiqətlər dünyanın əksər ölkələrində yayıldı, ordumuza dəstək xarakterli çox sayda geniş aksiyalar keçirildi. İyulun 12-də işğalçı ölkənin növbəti təxribatı nəticəsində münaqişənin yenidən alovlanması və bunun nəticəsi olaraq Azərbaycan diaspor təşkilatlarının xüsusi fəallığı Ermənistanı və erməni lobbisini çətin sınaq qarşısında qoydu. Tarixdə ilk dəfə erməni lobbisi Azərbaycan diasporunun təzyiqi qarşısında aciz qaldı. İki əsrlik diasporçuluq stajı olan xaricdəki erməni icmaları bu dəfə həddindən artıq sönük imic sərgilədilər. Ermənistan hakimiyyətinin yarıtmaz fəaliyyəti özünü diaspora sahəsində də açıq göstərməyə başladı. Yəni təkcə ön cəbhədə deyil, bütün cəbhələrdə Azərbaycandan və azərbaycanlılardan sarsıdıcı zərbələr alan Paşınyan çıxılmaz vəziyyətə düşüb. Bunu onun diaspora ilə bağlı qəbul etdiyi son qərarlar da təsdiqləyir. Bütün hallarda, azərbaycanlılara qarşı bütün bu zorakılıq, şiddət, əslində əks reaksiyaya gətirib çıxarıb. Azərbaycan diasporası daha mütəşəkkil qaydada fəaliyyətini davam etdirir, erməni diasporasına müxtəlif ölkələrdə daha kəsərli cavablar verir. Onlar həmişə deyirdilər ki, "Diaspora sahəsində biz güclüyük. Bizim təsir imkanlarımız çoxdur". Amma son hadisələr göstərdi ki, onların diaspora sahəsindəki “uğurları” da süni şişirdilmiş sabun köpüyü olub. Paşinyan bunu kompensasiya etmək üçün həmin sahədə kadr dəyişikliyi edir. Bunun da xeyri olan deyil. Artıq Azərbaycan diasporasının güclənməsi, ermənilərin isə zəifləməsi qarşısıalınmaz tarixi bir prosesə çevrilib”.
Göründüyü kimi, ermənilərin ən güclü sahəsi sayılan diaspora ilə bağlı vəziyyətləri acınacaqlıdır. Paşinyanın bununla bağlı etdiyi kosmetik yeniliklər isə, çətin ki, bundan sonra nəyisə dəyişə bilsin.
Məhəmmədəli QƏRİBLİ
