19/09/2020 06:10
728 x 90

14 iyul olaylarına görə həbs olunanların həbsxanada guya öldükləri barədə şayiə yayanlar ifşa olunur...

Rasim Quliyev: “Onların yalan yaymağı belə taktiki gediş adlandırmaları və buna haqq qazandırmaq cəhdləri ən yaxşı səmimi etiraf sayılır”

img

Məlum olduğu kimi, Ermənistanın Azərbaycanın Tovuz rayonu ətrafında başlatdığı təxribatlar zamanı ölkəmizin daxilində və xaricində ordumuza, Ali Baş Komandana dəstək aksiyaları keçirildi.

Təəssüflə qeyd etməliyik ki, paytaxtda keçirilən izdihamlı dəstək aksiyasının sonunda xoşagəlməz hallar yaşandı. Bir qrup təxribatçı və radikal müxalifətçi aksiyanın mahiyyətinə uyğun olmayan davranışlar sərgiləyərək, Milli Məclisin binasına, asayişi qoruyan polislərin üzərinə hücum etdi. Bunun nəticəsində dövlətə xeyli maddi ziyan vurdular. Hüquq-mühafizə orqanlarının apardığı araşdırmalardan sonra həmin təxribatlarda əli olan şəxslər həbs edildi. Onların barəsində müvafiq maddələrlə cinayət işləri açıldı. Həmin şəxslərin arasında radikal müxalif mövqedə olan siyasi partiyaların tanınmış funksionerləri də var. Keçirilən hər bir əməliyyatla bağlı hüquq-mühafizə orqanları cəmiyyəti məlumatlandırıb. Ancaq təəssüflər olsun ki, elə həmin radikal dairələr həbs olunanlarla bağlı zərərli dezinformasiyalar tirajlamaqla həm cəmiyyəti, həm də həbs edilənlərin yaxınlarını çaşdırmaq, panika toxumu səpmək yolunu tutdular. Əsasən radikal müxalif partiyaların tərəfdarları olan həmin şəxslər daha sonra həbs edilən müxalif funksionerlərin güya həbsxanada öldüklərinə dair yalan məlumatları dövriyəyə buraxdılar. Qısa müddətdə əlaqədar qurumlar onların yalanını ifşa etdi və hansı müxalifətçinin hansı həbsxanada saxlandığına dair məlumat verdi. Bundan sonra sosial şəbəkələrdə həmin dezinformasiyaları yayanlar həbsdə olanların dost və yaxınlarının qınağına tuş gəldilər. Onlara izah etməyə çalışıldı ki, bu cür xəbərlər həbsdə olanların ailələrinə, yaxınlarına çox pis təsir edib. Əməlin törədiciləri isə, peşman olmaq əvəzinə, bunun düzgün taktiki addım olduğunu qeyd etdilər. Əsas arqumentləri də bu oldu ki, bunu etməsəydilər hakimiyyət həbs edilənlərin yerini düzgün deməyəcəkdi. Kiminsə yalan ölüm xəbərini uydurub, belə məlumatlarla siyasi məqsədlər üçün manipulyasiya etmək nə dərəcədə doğru taktika sayıla bilər?

Resurs Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, həmin izdiham xalqın Qarabağ sevgisinin ölməzliyinin, ordumuza və Prezidentə olan dəstəyinin ifadəsi idi:“Azərbaycan xalqı bir daha göstərdi ki, biz torpaqlarımızı kiməsə güzəştə gedən deyilik. Sonrakı proseslərdə könüllülərin döyüşə getmək üçün ordu sıralarına yazılmaq yönündə müraciətləri bunu daha da sübuta yetirdi. Təəssüflə qeyd etməliyik ki, belə aksiyalardan öz maraqları üçün istifadə etmək istəyində olan qüvvələr də tapılır. Biz bu təxribatçıları bu aksiyada da gördük. Həmin adamların bəzi xarici ölkələr tərəfindən idarə olunduğuna şübhə yoxdur. Onlar yaranmış istənilən şəraitdən təxribat törətmək məqsədilə istifadə üçün zaman gözləyiblər. Dövlətə olan dəstək aksiyasını kiçik təxribatçı əməllərlə əksinə yönəltməyə cəhdlərin şahidi olduq. Təbiidir ki, dövlətin əlaqədar qurumları belə şəraitdə daha həssas davranır. Həmin gün də baş verən təxribatda iştirak edənlərin müəyyənləşdirilib istintaqa cəlb edilməsi istiqamətində addımlar atıldı. Bunlar tam qanuni addımlardı. Çünki hər bir şəxs etdiyi əmələ görə cavab verməlidir. Hazırda istintaq gedir, elə məlumatlar var ki, cəmiyyətə açıqlanmır. Yəqin ki, istintaqın yekununda biz bu təxribatların hansı qüvvələr tərəfindən idarə olunduğuna dair də təkzibolunmaz məlumatlarla tanış olacağıq. Prosesə məhz həmin dairələr tərəfindən qarayaxma cəhdləri informasiya siyasətilə davam etdirilir. Əsasən sosial şəbəkələrdə yanlış məlumatlar yazan bu adamların yalanları tez ifşa olundu. Xüsusilə də kiminsə güya  ölməsi ilə bağlı məlumatlar öz təsdiqini tapmadı. Onların yalan yaymağı belə taktiki gediş adlandırmaları və buna haqq qazandırmaq cəhdləri ən yaxşı səmimi etiraf sayılır. Kiminsə həyatı ilə yalan informasiya siyasəti aparmaq yolverilməzdir. İndi təsəvvür edirsinizmi, həmin adamların yaxınları bu xəbərləri eşidəndə nələr çəkiblər? Siyasətlə məşğul olmaq heç də o anlama gəlmir ki, insan qırmızı cızgiləri keçən bütün əməllərə yol verə bilər”.

Doğrudan da kiminsə ölüm xəbərini yalandan tirajlayıb bunu taktika adlanadırması, həmin adamların doğmalarına iztirab yaşatması heç bir siyasi əxlaqa sığmır...

Məhəmmədəli QƏRİBLİ

Son xəbərlər