20/09/2020 04:21
728 x 90

Paşinyanla Rusiya erməni ziyalılarının qarşıdurması kəskinləşir - Simonyan yeni zərbə vurdu...

Azər Həsrət: “Bu cür hücumların arxasında həm də Simonyanın təmsilçisi olduğu dövlətin maraqları durur”

img

Məşhur rusiyalı jurnalist, Rusiyanın RT telekanalının baş redaktoru Marqarita Simonyan bugünkü Ermənistan hökumətinin ünvanına ardıcıl tənqidlərlə çıxış etməkdə davam edir. M. Simonyanın Ermənistan hökuməti başçısının ünvanına yeni müraciəti mahiyyətinə görə daha təhqiramizdir.

Rusiyalı jurnalist N. Paşinyanı erməni xalqının maraqlarına, tarixinə və dəyərlərinə xəyanət etməkdə günahlandırır. Simonyanın Paşinyana qarşı növbəti hücumu ilə bağlı fikirləri jurnalistin Facebook səhifəsində dərc olunub.

Marqarita Simonyan Paşinyana yönəlik sərt ittiham səsləndirir: “İndi başa düşürəm ki, mənim postum Ermənistanda niyə bu qədər səs-küyə səbəb olub. Mən, həqiqətən, böyük erməni tarixinə nifrət edən, əcdadlarını lənətləyən və “soyqırım” qurbanlarının xatirəsinə hörmət etməyən şəxsin hakimiyyətinə sevinməyə qadir olan publikanın bir hissəsi deyiləm. Zərərli və manqurt. Mənim nənəm onun üzünə tüpürərdi".

Erməni əsilli tanınmış rusiyalı jurnalistin Paşinyana hücumlarının arxasında  hansı maraqlar dayana bilər?

Media eksperti Azər Həsrət “Bakı-Xəbər”ə açıqlamasında bildirdi ki, Simonyanın son vaxtlar sərgilədiyi davranış təsadüfi deyil:“Simonyan Rusiya vətəndaşı olsa da, erməni cəmiyyətinin bir parçasıdır. Harada olmasından asılı olmayaraq, bu tip adamların ürəyi daima Ermənistanla döyünür. Onun Nikol Paşinyana son hücumunun səbəbi indiki baş nazirin vaxtilə jurnalist statusunda olarkən işlətdiyi fikirlərlə bağlıdır. Mən bir neçə dəfə öz müsahibələrimdə də demişəm ki, Paşinyan Dağlıq Qarabağdan qurtulmağın tərəfdarıdır. Onun sözdə sərt bəyanatlar verməyinə baxmayın. Paşinyan alt qatda nəyin nə olduğunu gözəl dərk edir. Başa düşür ki, Dağlıq Qarabağdan erməni ordusu geri çəkilmədikcə Ermənistanın və erməni xalqının gələcəyi olan deyil. Paşinyan naşı olmaqla yanaşı, bu məsələdə, azacıq da olsa, ağlıkəsən adamdır. Bunu da ağıllı ermənilər həzm edə bilmir. Onlar anlayır ki, Paşinyan sonda İlham Əliyevin qarşısında geri çəkilməyə məcbur olacaq. Bu səbəbdən də nüfuzlu diaspor nümayəndələri Paşinyanı hədəfə alırlar. Simonyan kimilərin nənələri onları türklərə qarşı nifrətlə böyüdüb. Onun Paşinyana iradlarının kökündə hansısa humanizmə çağırış dayanmır. Əksinə, Paşinyanı loyal olmaqda, tarixi faktları təhrif etməkdə günahlandırırlar. Paşinyanın bir fərqi də ondadır ki, özündən əvvəlki bir neçə dövlət başçısı kimi Qarabağın işğalında birbaşa rolu olmayıb. Vaxtilə Paşinyanın jurnalist kimi səsləndirdiyi fikirlərdən də görünür ki, o, məsələlərə bir qədər loyal baxışlara sahib olub. İndi tutduğu vəzifəyə görə bunu edə bilmir. Erməni diasporunun bəzi nümayəndələri bu cür pressinqlərlə Paşinyanı konstruktiv olmamağa vadar edirlər. Onlar dərk edirlər ki, Paşinyan Ermənistanı böhrandan çıxarmağın yolunu işğaldan əl çəkməkdə görür. Bu səbəbdən də hərdən bir istiqamətdən Paşinyanı tənqid atəşinə tuturlar. Simonyanın tənqidində Paşinyanı konstruktivliyə çağıran bir detal yoxdur ki, biz buna sevinək. Hesab edirəm ki, bu cür hücumların arxasında həm də Simonyanın təmsilçisi olduğu dövlətin maraqları durur”.

Doğrudan da Simonyan Paşinyanı hansısa loyal addım atmağa səsləmir. Əksinə, onu hadisələrə tarixi baxışda qəddar münasibət ortaya qoymadığına görə tənqid edir. Rusiyadan əsən bu küləyin əslində Moskvanın maraqlarına daha uyğun gəldiyi hiss edilir.

Məhəmmədəli QƏRİBLİ

Son xəbərlər