Son dövrlərdə Ermənistanda Rusiyaya bağlı qüvvələrə qarşı təzyiq və repressiyaların artması müşahidə olunur. Erməni mediası yazır ki, bunlar Nikol Paşinyan hakimiyyətinə Qərbdən gələn göstərişlərin icrasıdır və belə vəziyyət İrəvan üçün daha ciddi problemlər yaradacaq. “İravnuk” qəzeti yazır ki, Paşinyan hakimiyyətindəki Sorosçular artıq gerçək simalarını göstərib, fəaliyyətləri ilə ölkəni əsl fəlakətə doğru sürükləyirlər.
Qeyd edək ki, Sorosun adamlarının Ermənistanda, belə demək olarsa, “at oynatması” barədə Azərbaycan da mövqeyini ifadə edib. Elə bu günlərdə Prezident İlham Əliyev Balakən regional “ASAN xidmət” mərkəzinin açılışında bildirib ki, Ermənistanın bugünkü rəhbərliyi Soros fondunun təsiri altında olan adamlardan ibarətdir:“Onların tərcümeyi-halına baxmaq kifayətdir. Bu gün Ermənistanda hökumətdə, parlamentdə, məhkəmə hakimiyyətində, digər önəmli vəzifələrdə çalışanların bir çoxu Soros fondunun və ona yaxın təşkilatların əməkdaşları olub. Aydın məsələdir ki, Ermənistanda baş vermiş “inqilab” Sorosun və ona yaxın dairələrin növbəti təxribatı olub”. İndi Soros fondundan gələn göstərişlə Ermənistan hakimiyyətində təmsil olunanlar daha repressiv fəaliyyətə keçiblər. Bu dəfə hədəf Rusiyaya bağlı müxalif qüvvələrdir. Onlardan biri də “Vətən” partiyasının rəhbəri, Ermənistan Milli Təhlükəsizlik Xidmətinin keçmiş direktoru Artur Vanetsyandır. “Qraparak” nəşri yazır ki, artıq Artur Vanetsyana qarşı cinayət təqibi başlayıb. Qeyd olunur ki, nəyin bahasına olursa-olsun, Vanetsyana qarşı cinayət işi açmaq və onun siyasi fəaliyyətini əngəlləmək hakimiyyətdəki Sorosçular, o cümlədən Paşinyan üçün vacibdir. “Erməni Qartalları: Vahid Ermənistan” partiyasının sədri Xaçik Asryan da qeyd edir ki, Paşinyan və onun Soros yönümlü hakimiyyəti Ermənistanın normal inkişaf gedişatını məhv edir. “Politik.am” nəşri isə bildirir ki, Sorosa bağlı olanların fəaliyyəti Ermənistanın Rusiya ilə də münasibətlərini tam sıradan çıxarır: “Məsələn, Ermənistanda Rusiya kanalları Sorosçular üçün olduqca pisdir və qadağan olunur. Bu kontekstdə qeyd etmək lazımdır ki, milli təhlükəsizlik haqqında Sorosçuların anlayışı çox qəribədir. Onlar Ermənistanı Rusiya himayəsindən məhrum edib ölkəni məhvə aparırlar”. Xatırladaq ki, qeyd edilən məsələ ətrafında son günlərdə Rusiya mediasında da geniş materillar verilir. Elə bu günlərdə Rusiyanın “lenta.ru” saytı da belə bir yazı ilə çıxış etmişdi ki, Ermənistan siyasətində Birləşmiş Ştatlarla, Sorosla bu və digər şəkildə bağlı olan insanların sayı artmaqdadır:“Məsələn, keçən il iyun ayında Amerikanın Qlendeyl şəhərinin keçmiş meri Zare Sinanyan Ermənistan hökumətində diaspor məsələləri üzrə komissar oldu. Bu vəzifə diaspor nazirliyinin ləğv edilməsindən və nazirlər kabinetinin optimallaşdırılmasından az sonra təsis edilib. Ermənistanın ali siyasi dairələrində daha bir iddialı fiqur ədliyyə nazirliyinin yeni rəhbəri Rustam Badasyandır. Badasyan bu vəzifəyə təyin edilənə qədər mətbuatda belə şayiə yayılmışdı ki, onun namizədliyini Soros fondunun Ermənistandakı icraçı direktoru Larisa Minasyan dəstəkləyib. Ermənistan təhlükəsizlik şurasında və xüsusi istintaq xidmətində də Sorosun “öz adamları” var. Məsələn, xüsusi istintaq xidmətinin rəisi Sasun Xaçaturyanın qardaşı Soros fondunun idarə heyəti şurasının sədri, Ermənistan Təhlükəsizlik Şurasının katibi Armen Qreqoryan isə “Transparency İnternational”ın yetirməsidir. Onlar hər ikisi “Məxməri inqilab”dan dərhal sonra bu vəzifələrə təyin edilib. Onu da unutmaq olmaz ki, Ermənistanda Rusiya biznesi təqib edilir. Yuxarıda deyilənləri yekunlaşdıraraq böyük inamla demək olar ki, Ermənistanda mühüm vəzifələri amerikapərəst qeyri-kommersiya təşkilatlarının nümayəndələri tutduqca, Qafqazın bu respublikası dövlətlərarası münasibətlərdə yeni gərginlik ocaqları yaradacaq”.
O da faktdır ki, Sorosun və onun strukturlarının Ermənistanın siyasi və ictimai həyatında iştirakını tənqid edən VETO təşkilatının fəalları bu gün Paşinyanın göstərişilə güc orqanları tərəfindən repressiyaya məruz qalırlar. VETO-nun təsisçisi Narek Malyan və müxalif “Adekvat” partiyasının görkəmli funksioneri Konstantin Ter-Nakalyan qanunsuz olaraq silah saxlamaqda və gəzdirməkdə ittiham edilir. Rusiya mediası qeyd edir ki, Ermənistanın indiki hökuməti Corc Sorosun strukturları ilə çox səmimi, dostcasına əlaqə saxlayır. “Rosbalt” yazır ki, hazırda Rusiyada “arzuedilməz təşkilat” hesab olunan Sorosun “Açıq cəmiyyət”inin himayəsi altında Ermənistanda 60-a yaxın təşkilat maliyyələşdirilir. Bu təşkilatlar ölkənin bütün fəaliyyət sahələrini, o cümlədən media, jurnalist araşdırmaları, siyasi tədqiqatlar, gənclər siyasəti, insan haqlarının müdafiəsi, təhsil, elm və başqa sahələri əhatə edir. Bunlar isə Rusiyada getdikcə daha böyük narazılıq yaratsa da, Paşinyan iqtidarı Sorosun göstərişindən çıxa bilmir. Təbii ki, Kremlin buna mümkün reaksiyası Ermənistanda çoxları üçün əndişə yaradır. Elə politoloq Qabil Hüseynli də qeyd edir ki, Sorosun postsovet məkanında əsas dayaqlarından biri məhz Ermənistanda yerləşir:“SSRİ dağıldıqdan sonra postsovet ölkələri dərin bir iqtisadi böhrana düçar oldu. Soros fondu bu ölkələrin bir çoxunda, eyni zamanda Azərbaycanda da fəaliyyətə başladı. Onu da deyim ki, əvvəlcə özünü xeyirxah kimi təqdim edən fond zamanla iç üzünü bəlli etməyə başladı. Azərbaycandakı fəaliyyəti günü-gündən dəyişən fond, faktiki olaraq, siyasi və iqtisadi məsələlərə də müdaxilə etməyə başladı. Buna görə də fəaliyyəti dayandırıldı. Soros fondunun Azərbaycandan çıxarılması onun nüfuzuna təsir etdi. Azərbaycanın ardınca Gürcüstanda da fəaliyyəti dayandırılan fond Qafqazda yalnız Ermənistanda fəaliyyət göstərir. Soros Fondunun MDB ölkələrindən məhz Ermənistana 600 min dollar maliyyə dəstəyi ayırması da bu səbəbdəndir”.
Tahir TAĞIYEV
