Məlum olduğu kimi, Azərbaycan Prezidenti, Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə aprelin 10-da Türk Şurasının videokonfrans vasitəsilə fövqəladə Zirvə görüşü keçirilib. Zirvə görüşü koronavirus pandemiyası ilə mübarizə mövzusuna həsr olunmuşdu. Bütün dünya tərəfindən müsbət qarşılanan bu təşəbbüslə bağlı Ermənistanın ciddi narahatlıq keçirdiyi məlum olub. Həmin ölkənin KİV-ində İlham Əliyevin təşəbbüsünü anti-Rusiya ovqatı kimi qələmə verməyə çalışırlar. Daha çox bu Zirvəni Putinin bugünlərdə etdiyi çıxış zamanı koronavirusla mübarizə ilə bağlı tarixdəki türk tayfaları ilə aparılan müharibələri örnək kimi göstərməsi ilə əlaqələndirməyə çalışırlar.
Qeyd edək ki, Rusiya prezidenti Vladimir Putin son açıqlamalarının birində koronavirusla bağlı danışarkən peçeneq və qıpçaq hücumlarını yada salıb və qubernatorlara bunları deyib:“Hər şey ötüb keçir, bu da keçəcək. Ölkəmiz dəfələrlə ciddi sınaqlardan keçib: həm peçeneqlər, həm də qıpçaqların çox cəhdi ilə rastlaşmışıq, Rusiya hər şeyin öhdəsindən gəlib...”
Qabil Hüseynli:“Bu cür uğurlu çıxışı, təşəbbüsü həzm edə bilməyən ermənilərin əlindən yalnız tədbirə qara yaxmaqdan başqa nəsə gəlməyib”
İlham Əliyevin təşəbbüsü ilə keçirilən Zirvə görüşü ilə Putinin məlum çıxışı arasında uyğunluq axtarmaq nə dərəcədə məntiqli sayıla bilər? Politoloq Qabil Hüseynli qəzetimizə açıqlamasında bildirdi ki, biz bununla növbəti erməni yalanı ilə üz-üzə qalırıq:“Azərbaycan Prezidenti Türkdilli Dövlətlərin Əməkdaşlıq Şurasının sədri kimi həmin konfransı keçirib. Məlumdur ki, bu formatda mütəmadi görüşlər keçirilir. Budəfəki toplantı fövqəladə sayılıb. Çünki dünyanı bürüyən pandemiya zamanına təsadüf edib. Məhz buna görə videokonfransın əsas mahiyyəti də pandemiyanı müzakirə etməkdən ibarət olub. Həmin videokfransın stenoqramına baxın və görün, heç orada bir cümlə də olsun Putinin çıxışına eyham varmı? Ola bilər ki, videokonfrans Putinin çıxışından sonraya təsadüf edib. Burada anti-Rusiya ovqatı axtarmaq doğru olmaz. Ermənilərin Azərbaycanın müxtəlif platformalardakı fəallığını həzm edə bilməməsindən irəli gəlir. Bunun Putinin çıxışı ilə heç bir əlaqəsi yoxdur. Qaldı ki, elə bir çıxışı etməkdə Putin sərbəstdir. Çünki öz ölkəsinin tarixindən danışıb. Rusiyanın tarixində doğrudan da qıpcaq və peçeneqlərin yürüşləri olub. Onlar da türk tayfalarıdır. Düzdür, yaxşı olardı ki, Putin tarixin müəyyən mərhələlərində olan hadisələrlə bu xəstəlik arasında müqayisə aparmayaydı. Bunu çox uğursuz müqayisə sayıram. Göründüyü kimi, ermənilər kimi araqarışdıran millətlər bu detaldan öz avantüraları üçün məharətlə istifadə etməyə çalışır. Bu baxımdan da onların əlinə belə əsası vermək lazım deyil. Həmin konfransda İlham Əliyev bəşəri bir problem, onun həlli barədə danışıb, ölkəmizin xəstəliklə mübarizədə gördüyü tədbirləri sadalayıb və bunun dünya üçün örnək ola biləcəyini deyib. Bu cür uğurlu çıxışı, təşəbbüsü həzm edə bilməyən ermənilərin əlindən yalnız tədbirə qara yaxmaqdan başqa nəsə gəlməyib. Biz belə hallara alışmışıq. Fikir verməyib, öz işimizə davam deməliyik”.
Məhəmmədəli QƏRİBLİ
