Azərbaycanın işğal altında olan Dağlıq Qarabağ bölgəsində koronavirus aşkarlanan kənd təcrid edilib. Erməni KİV-inin verdiyi məlumata görə, həmin kəndə giriş-çıxış qadağan olunub. Bildirilir ki, koronavirusayoluxan şəxsin təmasda olduğu insanların sayı məlum deyil. Onun ailə üzvləri və daha 20 nəfərlə təmasda olduğu ehtimal edilir. Qeyd edək ki, bunu erməni KİV-i etiraf edirsə, deməli, vəziyyət daha ağır ola bilər.
Faktiki olaraq legitim nəzarət altında olmayan Dağlıq Qarabağ və ətraf rayonlarda koronavirusla bağlı məsələnin beynəlxalq nəzarət altına alınmasına ehtiyac varmı?
Elşən Mustafayev:“Bu bəşəri problemin nəzarətə götürülməsi üçün Dağlıq Qarabağda koronavirusla mübarizənin beynəlxalq təminat altına alınmasına böyük zərurət var”
Azərbaycan Milli İstiqlal Partiyasının funksioneri Elşən Mustafayev “Bakı-Xəbər”ə açıqlamasında bildirdi ki, işğal altında olan ərazilərimizdə baş verən bütün proseslər bizi ciddi narahat edir:“Biz dəfələrlə dünya ictimaiyyətinə bəyan etmişik ki, ordakı vəziyyəti nəzarətdə saxlamaq lazımdır. Dəfələrlə orada terrorizmin stimullaşmasına uyğun olaraq addımların atılması, Suriyadan köçürülən terrorçuların yerləşdirilməsi, onlara təlimlərin keçilməsi ilə bağlı həyəcan təbili çalmışıq. Biz, həmçinin, bütün beynəlxalq təşkilatlara işğal altındakı ərazilərimizdən narkotrafik üçün istifadə olunduğunu bildirmişik. Təəssüflər olsun ki, bu istiqamətdə lazım olan tədbirlərin görülməməsi sonda bu mənzərəni yaradıb. Artıq sübut olunur ki, qondarma rejim heç bir beynəlxalq öhdəliyi, tədbirləri nəzərə almır. Biz bunu Ermənistanın martın 31-də Azərbaycanın işğal olunmuş Dağlıq Qarabağ ərazisində qondarma “prezident” və “parlament” seçkiləri zamanı bir daha gördük. Azərbaycanın suverenliyinə və ərazi bütövlüyünə qarşı yeni bir pozuntu təşkil edən bu qanunsuz “seçkilər” heç bir beynəlxalq təşkilat və ölkə tərəfindən tanınmadı. Beynəlxalq təşkilatlar, ayrı-ayrı dövlətlər, nüfuzlu KİV və görkəmli şəxsiyyətlər dünyada koronavirus pandemiyasının tüğyan etdiyi bir dövrdə təşkil olunan bu “seçkiləri” məqsədli təxribat, Qafqazda sülh və sabitliyə qarşı məsuliyyətsiz siyasi addım, münaqişənin sülh yolu ilə nizamlanmasına ciddi əngəl, beynəlxalq hüquq normalarına təhdid kimi dəyərləndirir. Ermənistanda referendum aprelin əvvəlində keçirilməli idi, amma təxirə salındı. Çünki koronavirusa görə xüsusi karantin rejimi tətbiq edildi. Amma işğal olunmuş ərazilərdə bu seçki şousu dayandırılmadı. Çox maraqlıdır ki, məhz “seçkilər”dən sonra Dağlıq Qarabağda ilk koronavirusa yoluxma halı aşkarlandı. Namizədlər arasında ikinci nəticəni göstərmiş Masis Mailyan keçirilən “seçkilər”də saxtakarlığın olduğunu bəyan etdi və ən maraqlısı budur ki, o öz tərəfdarlarının seçkilərdə iştirak etməməsini məhz koronavirusla əsaslandırdı. Bu artıq ona dəlalət edir ki, koronavirus seçkilərdən əvvəl də var idi, sadəcə, Ermənistan və qondarma rejim onu gizlədib. Hətta belə məlumatlar var ki, koronavirus qondarma rejimin nəzarətində olan ərazilərdə dislokasiya olunan erməni ordusu arasında da yayılıb. Biz öz ərazilərimizdə istənilən vəziyyətin nəzarət altında olmasını istəyirik. Hazırda həmin ərazilər işğal altında olduğu üçün biz bunu təmin edə bilmirik. Bu səbəbdən də, bu bəşəri problemin nəzarətə alınması üçün Dağlıq Qarabağda koronavirusla mübarizənin beynəlxalq təminat altına alınmasına böyük zərurət var”.
Məhəmmədəli QƏRİBLİ
