23/09/2020 16:49
728 x 90

Rusiya - Azərbaycan hərbi aviaticarət razılaşması - Ermənistanda narahatlıq və anti-Rusiya isterikası...

img

Azərbaycanla Rusiya arasında hərbi sahədə əməkdaşlığın genişlənməsi Ermənistanı ciddi narahat etməyə başlayıb. Məhz buna görə də, erməni mediasında və siyasi kuluarlarında radikal anti-Rusiya çağırışları yer alımağa başlayıb. Qeyd edək ki, Azərbaycan mütəxəssislərindən ibarət nümayəndə heyəti bugünlərdə Rusiyanın "Suxoy" şirkətinin və "MiQ" korporasiyasının zavodlarına səfər edib. Nümayəndə heyəti Rusiyada Su-35 və MiQ-35 döyüş təyyarələri istehsal edən hərbi zavodlarda olub. Rusiyanın qlobal silah bazarının liderlərindən biri olan “Rosoboroneksport” şirkətinin nümayəndələri və hərbi zavodların rəhbərliyi ilə keçirilən görüşlərdə ölkəmizin Rusiya istehsalı olan ən müasir döyüş təyyarələrinin alınmasında maraqlı olduğu bildirilib. Rusiya tərəfi, öz növbəsində, Azərbaycana Hərbi Hava Qüvvələrimizin ehtiyaclarını ödəyəcək sayda döyüş təyyarələrinin təqdim edilməsinə hazır olduğunu bildirib.

Erməni mediası Rusiyanın bu əməlini hətta Moskvanın öz dövləti maraqlarını satması kimi qələmə verib. Ermənistanın bu aşırı narahatlığı və orada hökm sürən anti-Rusiya ovqatını nə ilə izah etmək olar?

İbrahim Rüstəmli:“Heç vaxt ruhdan düşmədən konkret mövqe sərgiləməyimiz bizim milli maraqlarımızın əsl təminatçısı olacaq”

 

Hərbi-siyasi ekspert İbrahim Rüstəmli “Bakı-Xəbər”ə açıqlamasında bildirdi ki, Ermənistan istisna olmaqla, Azərbaycanın yaxın qonşuları ilə dərin hərbi, siyasi əlaqələri mövcuddur:“Bu əlaqələrin miqyası çox genişdir. Yaxın müttəfiqlər sırasında ilk yeri Türkiyə ilə Rusiya tutur. Bir dövlət kimi Rusiya üçün silah ixracı ciddi əhəmiyyət kəsb edir. Onlar gəlirlərinin böyük hissəsini məhz silah satışından əldə edirlər. Rusiya silahı həm də etibarlı sayılır. Çünki ölkə üzrə tam ixtisaslaşıb. Rusiya silahlarının tərəfimizdən alınması bizə, hərbi üstünlüklə yanaşı, siyasi dividendlər də gətirmiş olur. Burada sətiraltı məqamlar da var. Hər bir təmas ölkələr arasındakı münasibətlərin yaxşılaşmasına xidmət edir. Azərbaycanın həmin ölkədən silah alışı yüksələn xətlə davam edir. Bir arada Ermənistan Rusiyanın bizə silah satmasına etiraz etmişdi. Rusiyadan buna çox konkret cavab verilmişdi ki, rəsmi Moskva kimə istəsə silah sata bilər. Belarusla da onların analoji problemi yaşanmışdı, onda da eyni cavabı almışdılar. Ermənistanın başlıca narahatlığı silahla bağlı deyil, onlar əsasən Azərbaycanın Rusiya ilə yaxınlaşmasından ehtiyat edirlər. Bilirlər ki, belə yaxınlıq Ermənistanı Rusiyadan daha da uzaqlaşdırır. Onlar hər cür yalana, riyakarlığa əl ata bilirlər. Onların qiymətini Rusiya politoloqlarından biri yaxşı vermişdi. Demişdi ki, Ermənistan özünə ər axtaran ayağı sürüşkən qadına bənzəyir. Çox düzgün obraz formalaşdırmışdı. Biz bunlara əhəmiyyət verməməliyik. Bütün bunlar Azərbaycanın artan siyasi və hərbi gücündən xəbər verir. Heç vaxt ruhdan düşmədən konkret mövqe sərgiləməyimiz bizim milli maraqlarımızın əsl təminatçısı olacaq”.

Məhəmmədəli QƏRİBLİ

Son xəbərlər