Məlum olduğu kimi, dünyada koronavirus (COVID-19) infeksiyasının yayılması ilə əlaqədar Prezident İlham Əliyevin rəhbərliyi ilə əhalinin sağlamlığının qorunması, qlobal pandemiyanın yarada biləcəyi təhlükənin qarşısının alınması məqsədilə zəruri preventiv tədbirlər müəyyən edilib, bu məqsədlə xüsusi karantin rejimi elan olunub, virusa yoluxması daha risqli olan yaşı 65-dən yuxarı vətəndaşların sosial izolyasiyasına xüsusi diqqət yetirilib. Görülən tədbirlər çərçivəsində ölkə Prezidentinin 06.04.2020-ci il tarixli Əfv Sərəncamı ilə yaşı 65-dən yuxarı olan 176 nəfər məhkum cəzasının çəkilməmiş hissəsindən azad olunub.
Hazırda həmin şəxslərin iki həftə müddətinə karantinə alınmasına müxtəlif don geyindirməyə çalışılır. İddia olunur ki, güya bu, Penitensiar Xidmətə aid olan müəssisələrdə koronavirusun yayılması səbəbindən edilib. Ancaq Ədliyyə Nazirliyi bu iddiaları tam əsassız sayır. Nazirliyin bununla bağlı yaydığı məlumatda bildirilir ki, indiki pandemiya şəraitində virusa yoluxması daha ağır nəticələnə bilən həmin şəxslərin azadlığa buraxılması onların həyati təhlükəsizliyi və sağlamlıqlarının qorunması, xüsusilə ailə qayğısı ilə əhatə olunmaları baxımından mühüm humanist addımdır:“Məhkumların təhlükəsizliyi və sağlamlıqları diqqətdə saxlanılaraq, penitensiar müəssisələrdə ardıcıl, kompleks tibbi-profilaktik tədbirlər görülür, məhkumların gündəlik termometriyası, səhhətində hər hansı problemi olan şəxslərin dərhal müayinəsi keçirilir və zəruri müalicəsi aparılır. Nazirlər Kabineti yanında Operativ Qərargahın məlumatına əsasən, pandemiyanın respublikamızın müxtəlif bölgələrində yayılmasının müşahidə olunması və əfv edilən şəxslərin yaşayış yerlərinin 40-dək rayonu əhatə etməsi nəzərə alınaraq, onlar doğmalarının yanına getməzdən əvvəl ailə üzvlərinin də sağlamlıq durumu araşdırılacaq. Bu məqsədlə azad olunan şəxslər iki həftəlik istirahət mərkəzlərinin birinə yerləşdirilib və hər cür şəraitlə, o cümlədən qida və tibbi təminatla təchiz olunublar”.
Əliməmməd Nuriyev:“Bunu iddia edənlərin karantinin nə olduğundan xəbəri yoxdur”
Penitensiar Xidmət yanında İctimai Komitənin üzvü Əliməmməd Nuriyev “Bakı-Xəbər”ə açıqlamasında bildirdi ki, güya cəzaçəmə müəssisələrində koronavirus pandemiyasının yayılması ilə bağlı səslənən iddialar tamamilə əsassızdır:“Bilirsiniz ki, bu addım indiyə qədər Azərbaycan dövlətinin yürütdüyü humanizm siyasətinin davamı sayılır. Budəfəki əfv fəramanında xüsusi kateqoriya olan yaşı 65-dən artıq dustaqlar nəzərə alınaraq azadlığa buraxılıb. Bu kateqoriya xüsusi risqli sayılır. Onların pandemiya olmayan dönəmdə belə xüsusi qayğıya ehtiyacları var. Nəzərə alsaq ki, cəzaçəkmə yerlərində onlar xüsusi rejimdə saxlanırlar, qayğıya tələbatları daha da artır. Prezidentin bu nəcib təşəbbüsü göstərir ki, pandemiya ilə bağlı görülən tədbirlərdə əhalinin bütün təbəqələri nəzərə alınır. Qabaqlayıcı tədbir görmək o anlama gəlmir ki, həmin yerdə xəstəlik var. Bakıya giriş edən şəxslərin karantina alınması heç də həmin adamların xəstə olması və ya gəldikləri yerdə xəstəliyin tüğyan etdiyinə dəlalət etmir. Bunu iddia edənlərin karantinin nə olduğundan xəbəri yoxdur. Nazirliyin də açıqlamasından görünür ki, azadlığa çüxan keçmiş məhkumlar Azərbaycanın 40 bölgəsini əhatə edir. Bu tədbirlər həm də onların özünün sağlamlığının qorunması baxımından zəruri və vacibdir. Deyilir ki, onların ailə üzvləri də müayinə olunacaq. Çox normal tədbirdi. Əfv edilənlər gözəl şəraiti olan istirahət mərkəzlərindən birinə yerləşdiriliblər. Hər bir zəruri vasitələrlə də təmin ediliblər. Görülən tədbirlərə başqa don geyindirməyə heç bir əsas yoxdur”.
Məhəmmədəli QƏRİBLİ
