Martın 31-də Azərbaycan Respublikasının işğal olunmuş ərazilərində keçirilmiş qondarma “seçkilər” beynəlxalq ictimaiyyət tərəfindən birmənalı olaraq rədd edilməklə yanaşı, səslənən bəyanatlardakı sərtlik və konkretlik diqqəti çəkir. Bəyanatlarda Azərbaycanın işğal olunmuş Dağlıq Qarabağ regionunda keçirilmiş qondarma “seçkilər” tanınmır və qanunsuz hesab olunur. Bununla yanaşı, qondarma “seçkilər”in keçirildiyi konstitusional və hüquqi çərçivəsinin tanınmadığı bəyan olunur. Beləliklə, “seçkilər”in heç bir hüquqi qüvvəyə malik olmadığına açıq mətnlə işarə olunur. Bildirilir ki, qondarma “seçkilər”in nəticələri davam edən danışıqlar prosesini və bölgənin statusunu əvvəlcədən müəyyənləşdirmir.
Bəyanatlarda yer alan “qondarma “seçkilər”in keçirildiyi konstitusional və hüquqi çərçivənin tanınmadığı” ilə bağlı səslənən tezis hansı mənanı ifadə edir?
Akif Nağı:“Qondarma qurumda bu seçkiləri keçirmək üçün nə hüquqi, nə də konstitusion haqqın olmadığı mənasını daşıyır”
Qarabağ Azadlığ Təşkilatının sədri Akif Nağı “Bakı-Xəbər” ə açılamasında bildirdi ki, verilən reaksiyaların çoxluğu və operativliyi diqqəti çəkir:“Ancaq bir faktı deyim ki, indiyə qədər qondarma qurumda keçirilən “seçkilərin” heç biri tanınmayıb. Ermənilər bunu bilir, ancaq yenə də “seçkiləri” keçirirlər. Bununla onlar həm də qanunsuz subyekti gündəmdə saxlayırlar. Siz, biz buna münasibət göstəriririk, müəyyən ölkələr bəyanatlar verirlər, nəticədə separatçı qurumun adı hallanır, onların mövcudluğu diqqətə çatdırılır. Mən istərdim ki, bəyanat verən dövlətlər və qurumlar həmin saxta “seçkilərin” keçirilməsinə mane olardılar. Buna görə Ermənistana sərt sanksiyalar tətbiq edərdilər . Çünki bütün bu oyunların arxasında birmənalı olaraq Ermənistan dayanır. Hər dəfə bəyanatlarda biz seçkilərin fərqli terminlərlə tənqid edildiyini eşidirik. Hüquq və konstitusion çərçivəsini tanımamaq seçkilərin tam qeyri-legetim olması anlamına gəlir. Yəni qondarma qurumda bu seçkiləri keçirmək üçün nə hüquqi, nə də konstitusion haqqın olmadığı mənasını daşıyır. Ancaq nə qədər sərt verilən bəyanatlar olsa da, bu bizə torpaqları, ərazimizə tam nəzarət etmək haqqını vermir. Təəssüf ki, mən həmsədr ölkələrin ayrı-ayrı bəyantına da rast gəlmədim. Onlar Minsk Qrupu çərçivəsində, həmin qurumun adından belə bəynat veriblər. Bunun ən doğru yolu budur ki, beynəlxalq təşkilatlar təzyiq edib Ermənistanı işğalçılıqdan əl çəkdirməlidirlər. Bunlar səmərə verməyəcəksə, biz müharibə ilə öz torpaqlarımızı azad etməliyik”.
QAT sədrinin sözlərinə görə, biz öz ərazimizdə separtizmin qarşısını almalıyıq:“Ordakı rejimin heç bir “seçki” keçirmək hüququ yoxdur. Onlar bunu bilirlər, sadəcə bu üsulla diqqəti özlərinə yönəldirlər. Ümumiyyətlə, belə “seçki” şoularının bitməsinə çalışılmalıdır”.
Məhəmmədəli QƏRİBLİ
