Rəsul Cahangirli: “Azərbaycan hökumətinin virusla mübarizədə gördüyü işlər, həyata keçirdiyi tədbirlər digər ölkələrlə müqayisədə daha sistemlidir”
“Biz mütləq həm xəstələrə sahib çıxacağıq və çıxırıq, həm də ki, iş adamlarına”. Bu sözləri Prezident İlham Əliyev "Yeni klinika" tibb müəssisəsinin açılışı zamanı deyib.
Ölkə başçısı bildirib ki, biz eyni vaxtda koronavirus xəstələrini, iş adamlarını və işləyənlərin mənafeyini nəzərə ala bildik: “İndiki şəraitdə bütün ölkələr böyük iqtisadi çətinliklərlə üzləşirlər. İnkişaf etmiş ölkələrin dövlət, hökumət başçıları artıq açıq bəyan edirlər ki, bu xəstəlik çox ciddi böhrana gətirib çıxaracaq. Eyni zamanda, aparıcı beynəlxalq maliyyə qurumları da artıq açıq şəkildə bəyan edirlər ki, bu xəstəlik və onun törətdiyi və törədə biləcəyi fəsadlar 2008-2009-cu illərin böhranından daha da ağır olacaqdır. Dünya iqtisadiyyatına böyük zərbə vurulubdur. Üstəgəl neftin qiyməti iki dəfədən çox düşdü və 24 dollar səviyyəsindədir. Bu, əlbəttə ki, bizim üçün böyük itkilərə gətirib çıxaracaq. Ancaq bizim əvvəlcədən qəbul edilmiş qərarlar əsasında gördüyümüz işlər hesab edirəm imkan verəcək ki, biz bu sınaqdan da şərəflə çıxa bilək”.
Prezident hazırkı vəziyyətlə bağlı görülən işlərdən söhbət açaraq bir sıra məqamlara toxunub: “Dövlət bütün işləri görür. Qeyd etdiyim tədbirlər hesab edirəm ki, ən düzgün tədbirlərdir. Eyni zamanda, sahibkarları, işini itirənləri dəstəkləmək üçün mənim Sərəncamımla Nazirlər Kabinetinə bir milyard manat vəsait ayrıldı, dörd işçi qrupu yaradıldı. Bu işçi qruplarının vəzifəsi məşğulluq məsələlərini həll etmək, iqtisadi sabitliyi təmin etmək, makroiqtisadi vəziyyəti sabit saxlamaq və bizim maliyyə imkanlarımızı səfərbər etməkdir. Bu işçi qrupları fəaliyyətə başlayıb və təkliflər hazırlanır. Biz mütləq həm xəstələrə sahib çıxacağıq və çıxırıq, həm də ki, iş adamlarına”.
Görünən odur ki, Azərbaycan hökuməti həyata keçirdiyi tədbirlərlə eyni vaxtda bütün tərəflərin mənafeyini nəzərə ala bildi. Ümumilikdə bunun əhəmiyyətini ekspertlər necə dəyərləndirir?
- “Həm koronavirusa yoluxan xəstələr yüksək səviyyədə müalicə edilir, həm də pandemiya ilə əlaqədar yaranan iqtisadi çətinliklərin qarşısı alınır”
Məsələyə münasibət bildirən ekspert Rəsul Cahangirlinin sözlərinə görə, Azərbaycanda həyata keçirilən sistemli tədbirlər bu baxımdan tələblərə tam cavab verir: “Məlum olduğu kimi, dünyada yayılan koronavirus epidemiyası ciddi iqtisadi sistemə malik dövlətləri belə, böyük çətinliklərlə üz-üzə qoyub. Avropanın aparıcı ölkələrində pandemiyadan həyatını itirənlərin sayı artır. Hətta ABŞ-da belə, koronavirusa yoluxanların sayı artır. Azərbaycanda isə virusun yayılmasının qarşısını almaq üçün müvafiq tədbirlər görülür. Azərbaycan hökumətinin virusla mübarizədə gördüyü işlər, həyata keçirdiyi tədbirlər digər ölkələrlə müqayisədə daha sistemlidir. Məsələ ondadır ki, həm koronavirusa yoluxan xəstələr yüksək səviyyədə müalicə edilir, həm də pandemiya ilə əlaqədar yaranan iqtisadi çətinliklərin qarşısı alınır. Koronavirus pandemiyasının və bundan irəli gələrək dünya enerji, səhm bazarlarında baş verən kəskin dalğalanmaların təsirlərini azaltmaq üçün tədbirlər görülür. Prezidentin təşəbbüsü ilə Azərbaycanın iqtisadiyyatına, makroiqtisadi sabitliyə, ölkədə məşğulluq məsələlərinə, sahibkarlıq subyektlərinə mənfi təsirinin azaldılması məqsədilə büdcədən 1 milyard manat vəsait ayrılıb. Bütün bunlar onu göstərir ki, Azərbaycan bütün tərəflərin mənafeyini eyni vaxtda nəzərə almaq gücünə malikdir. Bununla bağlı resursları var”.
Vidadi ORDAHALLI
