03/04/2020 10:30
728 x 90

Moskva Paşinyanın ipini kəsdi

img

Ermənistanda son proseslər Moskvanın dəstəyilə bu ölkədə Nikol Paşinyan iqtidarının devrilmə planının işə salındığını göstərir. Bu xüsusda görünən odur ki, Kremlin istifadə edəcəyi əsas fiqur da Ermənistan Milli Təhlükəsizlik Xidmətinin sabiq rəhbəri Artur Vanetsyan olacaq. Sonuncu artıq “Qarabağ klanı”, xüsusən də bu klanın əsas üzvlərindən sayılan Köçəryan ailəsi ilə gücünü birləşdirir.

“Jamanak” qəzeti yazır ki, eks-prezident Robert Köçəryan Vanetsyanla birgə partiya yaratmağı planlaşdırır. Qeyd edək ki, bundan öncə Vanetsyan partiya yaradacağını və bunun Ermənistanın ən böyük müxalifət partiyası olacağını açıqlamışdı. Nəşr yazır ki, Vanetsyan aprel ayında keçirməyi planlaşdırdığı qurultayın “tarixi hadisə” olacağını bildirib. Lakin “Jamanak” yeni partiyada kimlərin iştirak edəcəyinin qaranlıq qaldığını bildirib:“Vanetsyanın öz partiyası ilə birdən-birə meydana çıxması suallar yaradır. Hazırkı hökumətə etiraz edərək belə bir işə əl atması, hər halda, qarşı tərəfdən birmənalı qarşılanmır. Partiyanın harada qurulduğu, kimlərin dəstək verdiyi yönündə ortaya çıxan suallar da hələlik cavabsız qalır. Gözlənilən qurultayda kimlərin iştirak edəcəyini təsəvvür etmək çox çətindir”. Nikol Paşinyan hökumətinə yaxın media qurumları və ekspertlər isə Vanetsyanın xarici dövlətin sifarişi ilə belə bir işə girişdiyini istisna etmir. Söhbət Rusiyadan gedir.

Elə Rusiyanın Paşinyan əleyhdarlarına verdiyi sığınacaq da bu ehtimalı yüksəldir. Belə ki,  Rusiya Ermənistanda ittiham edilən 3-cü şəxsi azadlığa buraxıb və ona sığınacaq verib. “1 Mart” cinayəti üzrə xüsusi olaraq sübutları saxtalaşdırmaqda ittiham edilən və 2018-ci ilin oktyabr ayından etibarən axtarışda olan “1 Mart” cinayətinin araşdırılması üzrə istintaq qrupunun sabiq rəhbəri Vahaqn Harutyunyanın həbsi ləğv edilib və Rusiya hüquq-mühafizə orqanları tərəfindən o, sərbəst buraxılıb. Erməni siyasi ekspert Sarkis Artsruni bildirir ki, bu, Moskvanın Paşinyana növbəti zərbəsidir: “Harutyunyanın həbs qərarı ləğv edilib və hüquq-mühafizə orqanları tərəfindən sərbəst buraxılıb. Bununla da Rusiya hakimiyyəti istədiyi halda “1 Mart” cinayəti üzrə “qaçqınları” həbs edə biləcəyinə işarə etmiş olub. Ancaq növbəti addımları ilə ruslar “1 Mart” cinayətinin açılmasına, xüsusilə inqilaba qarşı, münasibətlərini nümayiş etdirmiş olublar. Hər iki ölkə rəhbərləri, rus-erməni münasibətlərində qeydə alınan yeni səviyyədən danışmalarına baxmayaraq, Moskvada açıq-aydın şəkildə “1 Mart” cinayətinin açılmasını dəstəkləmirlər”.

Bu fonda Paşinyan Harutyunyanın ekstradisiyasını gözlədiyi bir vaxtda Moskva yenə onun ümidlərini doğrultmayıb. Qeyd edək ki, eyni məsələ Ermənistan Məhkəmə Qərarlarının Məcburi İcrası Komitəsinin keçmiş rəhbəri Miqran Poqosyan, sabiq müdafiə naziri Mikayel Harutyunyanla da bağlı baş vermişdi. Yəni hər üç halda Rusiya ittiham olunan şəxsləri Ermənistana təhvil verməkdən imtina edib. Erməni hüquq müdafiəçisi Artur Sakuntsun sözlərinə görə, Rusiya hakimiyyəti açıq şəkildə Ermənistanda mövcud hakimiyyəti saymır:“Rusiya hakimiyyətdən uzaqlaşdırılan keçmiş rejimin əsas xadimlərinə himayədarlıq edir. Rusiya bu cür davranış tərzi ilə istənilən halda Ermənistandakı suverenliyin bərpasının məntiqi prosesi ilə barışmaq istəmir və Ermənistanı özünün tabeliyində olan ərazi kimi qəbul etməyə davam edir”.
Ermənistan hakimiyyətinin hansı nəticələri çıxarmalı olduğuna dair verilən suala cavabında hüquq müdafiəçisi qeyd edib ki, çıxarılacaq yeganə nəticə var: “Rusiya və Ermənistanın guya strateji tərəfdaş olduqlarına dair siyasi səviyyədə verilən bütün bəyanatlar həqiqəti əks etdirmir. Bu strateji tərəfdaşlığın müxtəlif ölçülərinin birini digərindən ayırmaq olmaz”.
Erməni hüquq müdafiəçisi Marina Poqosyan isə əmin edir ki, Artur Davtyan Ermənistanın baş prokuroru olduğu müddət ərzində Vahaqn Harutyunyan məsuliyyətə cəlb edilməyəcək, ona qarşı heç bir təhlükə olmayacaq: “Vahaqn Harutyunyan elə əvvəldən olduqca müdafiə edilmiş şəkildə olub. Onun axtarışı formal xarakter daşıyıb. Ona görə ki, ona qarşı heç həbs barədə sanksiya verilməyib. Bir gün Artur Davtyan cəsarət edib məhkəmə həbs barədə sanksiya verməyib deyərsə, demək yalan danışır. Çünki birinci instansiya məhkəməsi, kobud pozuntularla olsa da, həbs barədə sanksiya verib. Bu da Artur Davtyan tərəfindən təşkil edilən şou idi. Çünki baş prokuror da Moskvanın adamıdır”. Poqosyanın sözlərinə görə, Artur Davtyan vəzifədə olduğu müddət boyunca heç bir çinayətkar, o cümlədən Serj Sarkisyan, Robert Köçəryan, Vahaqn Harutyunyan və digərləri cəzalandırılmayacaq: “Bundan əvvəl Miqran Poqosyana qarşı ittiham irəli sürülən kimi onun Moskvaya uçması faktını xatırladaq. Daha sonra həbs edilən Poqosyan qısa zaman sonra azad edilib. İndi isə Rusiyada azad şəkildə hərəkət edir. Artur Davtyan tərəfindən Miqran Poqosyan yola salınıb və ona qarşı ittihama xitam verilib. Bütün bunlar Davtyan tərəfindən törədilib. Bu şəxs Moskvadan gələn göstərişləri icra edir. Moskva isə Paşinyanı qəbul etmək istəmir“. Bunlar fonunda hesab edilir ki, Kreml Paşinyanın əleyhdarları, xüsusən də Artur Vanetsyan vasitəsilə baş naziri devirməkdə israrlıdır.

Nahid SALAYEV

Son xəbərlər