Yeddi rayonu və Qarabağın bir hissəsini Azərbaycan 2020-ci il müharibəsindən sonra geri qaytarıb. 2023-cü ilin sentyabr ayının sonunda faktiki olaraq mübahisəli bölgənin bütün ərazisini nəzarətə götürüb.
Azərbaycan 30 ilə yaxın gözlədiyi qələbəni qeyd edir. Torpaqlarımızın 30 il işğal altında qalması ən çox qaçqın və məcburi köçkünlərimizin həyatına təsir etdi. Lakin Azərbaycan dövləti tərəfindən hər zaman məcburi köçkünlərin sosial problemlərinin həlli istiqamətində mühüm tədbirlər həyata keçirilib. Azərbaycan Respublikasının Prezidenti İlham Əliyev bu istiqamətdə verdiyi tapşırıqların icrasına birbaşa özü nəzarət edib. Bəli, bu gün isə qalib Azərbaycan dövləti öz torpaqlarını erməni işğalından azad edib və artıq keçmiş məcburi köçkün vətəndaşlarımızın öz yurd-yuvalarına qayıtması üçün Qarabağda sürətli abadlıq-quruculuq işləri həyata keçirilir.
"Böyük Qayıdış" proqramının tam icra edilməsi dövlət siyasətinin əsas prioritet istiqamətidir. 44 günlük Vətən müharibəsindən sonra Azərbaycan Respublikasının Prezidenti İlham Əliyev və əksər səfərlərdə onu müşayət edən Birinci vitse-prezident Mehriban Əliyevanın işğaldan azad olunmuş bölgələrimizə etdikləri hər bir səfər həmin ərazilərin əsl sahiblərinin, keçmiş məcburi köçkünlərin ora qayıdışını bir addım daha sürətləndirir.
Qarabağ nəhəng tikinti meydanına çevrilib…
Baş tutan hər səfər yeni infrastruktur layihələrinin icrasına başlanması, təməlqoyma mərasimlərinin keçirilməsi, ayrı-ayrı şəhərlərin baş planlarının təsdiq olunması, yeni innovativ layihələrin icra olunması və daha əvvəlki səfərdə nəzərdə tutulmuş təmir bərpa işlərinin yekunlaşması ilə müşahidə olunur. Bunların hər biri onu göstərir ki, Azərbaycan dövləti, Ali Baş Komandan Prezident İlham Əliyev Vətən müharibəsi dövründə göstərdiyi qətiyyəti, bərpa-quruculuq işlərində də göstərir. Üç il ərzində Azərbaycan öz qələbəsinin nümayişi üçün gözəl bir nümunə yaradıb.
Qarabağ nəhəng tikinti meydanına çevrilib. Yollara yeni asfalt döşənir, məscidlərə yeni üzlüklər çəkilir, körpülər salınır, hava limanları tikilir. Burada hərbçilərdən, minaaxtaranlardan və hətta mülki vətəndaşlardan da çox işçi var. Qarabağın su resursları, münbit torpaq şəraiti, iqlimi imkan verir ki, Azərbaycanın gələcəkdə də ərzaq təhlükəsizliyi problemini həll etsin. Qısa zamanda Azərbaycan dünyanın ən inkişaf etmiş ölkələrindən birinə çevriləcək. Bu məsələ dövlətin strateji hədəfinə çevrilib və "Böyük Qayıdış" planına uyğun olaraq, məcburi köçkünlərin doğma yurd-yuvalarına qayıtması üçün dövlət bütün imkanlarını səfərbər edib. Hazırda həmin ərazilərdə yeni yaşayış məntəqələrinin salınması, infrastrukturun bərpası, yolların çəkilişi, məktəb, xəstəxana tikintisi sürətlə davam edir.
Bu proqramın sürətlə həyata keçirilməsi ölkənin bütün sahələrdə olan problemlərinin həllinə müsbət təkan verəcək…
Prezident İlham Əliyev işğaldan azad edilən bir neçə rayonda hava limanlarının təməlini qoydu. Artıq onlardan bəziləri fəaliyyətə belə başlayıb. Beynəlxalq hava limanının inşası və yaxın gələcəkdə istifadəyə verilməsi işğaldan azad edilmiş ərazilərin inkişafı baxımından vacib layihələrdən biri hesab olunur. Hava limanı eyni zamanda, işğaldan azad edilmiş ərazilərimizə xarici turistlərin gəlməsi baxımından yeni imkanların yaradılması deməkdir. Şübhəsiz ki, bu gün Azərbaycanın mədəniyyət paytaxtı olan Şuşa şəhərinə gəlmək istəyən xarici turistlərin sayı kifayət qədərdir. Bu baxımdan da Füzulidə hava limanının inşa edilməsi turistlərin daha sərfəli və qısa yolla birbaşa işğaldan azad olunan ərazilərimizə səfər etməsinə şərait yaradacaq. Bu isə işğaldan azad edilmiş ərazilərimizə gələcək turistlərin sayına müsbət mənada böyük təsir göstərəcək və turizm sektorunun inkişafına böyük təkan verəcək. Bu layihə sayəsində yeni iş yerləri yaradılacaq və işğaldan azad olunmuş ərazilərimizdə məskunlaşan əhalinin müəyyən hissəsi işlə təmin olunacaq. Bu da ilk növbdə həmin bölgədə işsizlik problemlərinin azalması deməkdir. Hava limanları həmçinin yükdaşımalar, xüsusən də beynəlxalq yükdaşımalar üçün çox mühüm əhəmiyyətə malik olacaq. Heç kəsə sirr deyil ki, işğaldan azad olunmuş ərazilərdə sənaye potensialı yüksək səviyyədədir. İstifadəyə verilən və veriləcək hava limanlarının həmin ərazilərdə istehsal olunacaq sənaye məhsullarının dünya bazarına çıxarılması və bütövlükdə regionun ixrac imkanlarının genişləndirilməsi baxımından vacib amillərdən biri sayılır.
Bir sözlə, bu proqramın sürətlə həyata keçirilməsi ölkənin bütün sahələrdə olan problemlərinin həllinə müsbət təkan verəcək.
Bu gün Azərbaycan artıq yeni bir perspektivə köklənib. Dövlətimizin gerçəkləşdirdiyi tədbirlər nəticəsində qısa zamanda işğaldan azad olunmuş ərazilərimizə Böyük Qayıdışımızı həyata keçirə biləcəyik. Həmin gün isə uzaqda deyil. İndi Böyük Qayıdışın nə zaman reallaşacağı ən çox səslənən suallardan biridir. Son 3 il ərzində bütün əsas infrastruktur layihələri - dəmir yolu, avtomobil yolları, elektrik enerjisi istehsalı və su təchizatı layihələri başa çatdırılmaq üzrədir. Yaxın zamanda kəsin səbrsizliklə gözlədiyi Böyük Qayıdış baş verəcək.
Məhəmmədəli QƏRİBLİYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
