26/01/2020 18:20
728 x 90

Azərbaycanlı müğənni erməni aktyorla oynamaqdan imtina etdi...

Faiq Sücəddinov: “Mən onu “milli qəhrəman” elan etməyin tərəfdarı deyiləm, amma bu addımını təqdir edirəm, dəstəkləyirəm”

img

Məlum olduğu kimi, Azərbaycanın Xalq artisti, məşhur Azərbaycan əsilli tenor Yusif Eyvazov milliyyətcə erməni soprano Ruzan Mantaşyanla bir səhnədə çıxış etməkdən imtina edib.

Y.Eyvazovun bu addımı ermənilərin ciddi narahatlığına səbəb olub və hətta bu məsələyə digər erməni opera müğənnisi Asmik Papyan öz “Facebook” səhifəsində münasibət bildirib. “Azərbaycanlı opera müğənnisi, soprano Anna Netrebkonun əri olan Yusif Eyvazov erməni müğənninin iştirakı ilə fevralın 7-də illik Drezden Opera Balının açılış mərasimində çıxış etməkdən imtina etdi. O, açılış mərasimində erməni müğənni Ruzan Mantaşyanla danışmaqdan da imtina edib. Bunu siyasi səbəblərə görə izah edib. Göstərilən opera teatrında dəfələrlə səsləndirdim, belə bir hadisəni xatırlaya bilmirəm. Etiraz səsləndirəcəyəm...” - deyə A.Papyan yazıb.

Y.Eyvazovun erməni soprano ilə bir səhnəni bölüşməkdən imtina etməsinə dünya mediası da yer ayırıb. “Forumopera.com” yazır ki, “milliyyətcə azərbaycanlı Yusif Eyvazov siyasi səbəblərdən milliyyətcə erməni soprano Ruzan Mantaşyanla bir səhnədə çıxış etməkdən imtina etdi”.

Məlumat üçün bildirək ki, Drezden Opera Balı ilk dəfə 1925-ci ildə təşkil edilib. 1939-cu ildə – II Dünya Müharibəsinin başlamasına qədər səkkiz dəfə baş tutub. 2006-cı ildə Drezdenin qurulmasının 800 illik yubileyi münasibətilə ənənə davam etdirilib. Bu vaxtdan etibarən Bal hər il təşkil olunur.

Drezden Opera Balı təkcə Avropadan deyil, digər ölkələrdən də siyasi, sənət və iş adamlarının nümayəndələrini bir araya gətirir.

Yusif Eyvazovun (tenor) repertuarına dramatik istedad və vokal bacarıqlarını göstərməyə imkan verən opera partiyaları daxildir. Onun adı "Dünyanın ən yaxşı tenorları” kitabına daxil edilib. 2017-ci ildə Y.Eyvazov və həyat yoldaşı A.Netrebko opera ulduzlarının "Half Way Around The World” konsert turunda iştirak ediblər. Tur çərçivəsində altı ölkənin səkkiz şəhərində konsertlər verilib.

  • “...böyük çətinliklərə qalib gələrək bunu Azərbaycandan kənarda edib”

Əlcəzairdə dünyaya gələn azərbaycanlı tenor Y.Eyvazovun erməni soprono ilə eyni səhnəni bölüşdürməkdən imtina etməsinə şərh verən Xalq artisti, tanınmış bəstəkar Faiq Sücəddinov hesab edir ki, Y.Eyvazovun bu addımı onun Azərbaycana, dövlətimizə, xalqımıza, işğal altında olan torpaqlarımıza bəslədiyi münasibətin göstəricisidir. “Hər bir insanın öz vətəninə, xalqına, torpağına öz yanaşması var. Y.Eyvazovun erməni soprano ilə eyni səhnədə iştirak etməkdən imtina etməsi onun öz şəxsi yanaşmasıdır. Y.Eyvazov R.Mantaşyanla bir səhnədə çıxış etməkdən imtina etməklə ermənilərə, erməni saxtakarlığına öz münasibətini bildirib. O bir azərbaycanlıdır və məsələyə də azərbaycanlı mövqeyindən yanaşıb, erməni saxtakarlığına, şovinizminə etiraz edib. Mən onu “milli qəhrəman” elan etməyin tərəfdarı deyiləm, amma onun bu addımını təqdir edirəm, dəstəkləyirəm. Bir sənət adamı, bəstəkar kimi Yusifin hərəkətinə dəstək verirəm. Bilirsiniz, Y.Eyvazovun Bakı səhnəsində erməni ilə eyni səhnədə çıxış etməkdən imtina etməsi çox asan bir məsələ olardı, amma o, böyük çətinliklərə qalib gələrək Azərbaycandan kənarda bunu edib. Halbuki, Azərbaycanda yaşayan bəzi müğənnilər erməni ilə oxumaqdan nəinki imtina etmirlər, hətta onlarla birgə oxuyurlar. Mən ad çəkmək istəmirəm, səhnəni bölüşürlər”.

F.Sücəddinov qeyd etdi ki, ermənilər bu gün də bizim qədim mahnı və rəqslərimizi oğurlayaraq Rusiya telekanallarında “erməni musiqisi” kimi təqdim edirlər. O vurğuladı ki, bu yaxınlarda Rusiya kanallarından birində yayımlanan “Dobroye utro” proqramında Azərbaycana məxsus “Qədim Bakı” mahnısını təqdim ediblər.   

İradə SARIYEVA

Son xəbərlər