Azərbaycan parlamenti buraxılar-buraxılmaz, bir sıra insanlar, o cümlədən də şou müğənniləri, aparıcılar, bəzi sənət adamları, hətta açıq-saçıq səhnələrlə gündəmə gələn aktrisa-modellər fevralın 9-da keçirləcək növbədənkənar parlament seçkilərində iştirak edəcəklərini bəyan etdilər. Hətta bir çoxu seçki kampaniyasının elan ediləcəyi günü gözləməyib əvvəlcədən təbliğata başladılar.
Bu şəxslər sosial şəbəkələrdə, ayrı-ayrı sosial media platformalarında çıxışlar edir, deputatlıq iddialarını ortaya qoyur, xalqın onlardan “parlament seçkilərində iştirak etməyi tələb etdiyini” bəyan edirdilər. Onu da deyək ki, bir çox şou müğənniləri və aktrisaların sosial şəbəkələrdə müxtəlif insanlar tərəfindən yönəldilən xüsusi təbliğat qrupları, səhifələri də yaradılmışdı. Bu səhifələrdə həmin şəxslərin deputatlığa namizədlikləri təşviq edilir, dəstəklənirdi. Xalq artistləri Afaq Bəşirqızı, Faiq Ağayev, Əməkdar artist Elza Seyidcahan, müğənni-aktrisa Pərvin Abıyeva, şoumen Tolik, teleaparıcı və aktrisa Könül Yusifqızı və başqaları millət vəkili olmaq istəklərini açıqlamışdılar.
Növbədənkənar parlament seçkilərində iştirak etmək üçün deputatlığa namizədlərin qeydiyyatı artıq yanvarın 10-da, saat 18:00-da başa çatır. Əməkdar artist Elza Seyidcahan istisna olmaqla, digər sənətçilər növbədənkənar parlament seçkilərində iştirak üçün müraciət etməyiblər. E.Seyidcahanın isə artıq namizədliyi təsdiqlənib.
Qeyd edək ki, bir müddət əvvəl seksual səhnə obrazı ilə seçilən, açıq sözlü teleaparıcı və aktrisa Könül Yusifqızı da deputat olmaq niyyətini ortaya qoymuşdu. Bu barədə o, şəxsi “Facebook” hesabında məlumat paylaşmışdı: “Dostlar, hazırlaşın, deputatlığa namizədliyimi irəli sürürəm. Varmı dəstəkləyənlər?” Bundan sonra o, saytlardan birinə “Tam ciddi bir şəkildə deputatlığa dair namizədliyimi irəli sürmək niyyətindəyəm. Düşünürəm ki, mənim kimi açıq fikirli, tam çılpaq danışmağı bacaran, azad ruhlu bir insana orada ehtiyac var. Hərçənd ki, seçiləcəyimə gümanım azdır. Amma seçildiyim halda bir daha bizim ölkəmizdə bu, azad səsin və demokratiyanın sübutu olacaq” - deyə bildirib.
Lakin K.Yusifqızının deputatlığa namizədliyini vermədiyi bildirilir.
Afaq Bəşirqızı: “Deputatlıq heç fikrimdən də keçməyib, bu, saytların istəyi idi, mən də onlara kobudluq etmirdim”
Xalq artistləri Faiq Ağayevin və Afaq Bəşirqızının da növbədənkənar parlament seçkilərində iştirak etmədiyi məlum olub. Deputat olmaq iddialarını dəfələrlə ortaya qoyan və bununla bağlı saysız müsahibə, açıqlamalar verən sənətçilər namizəd kimi seçkilərə qatılmayıblar. Dekabrın əvvəlində mətbuata müsahibəsində parlament seçkilərində iştirakla bağlı son qərarını açıqlayan Xalq artisti Afaq Bəşirqızı “Heç vaxt vəzifədə, kresloda gözüm olmayıb. Amma son günlər sosial şəbəkələrdə deputatlığa namizəd olmağımla bağlı gedən müzakirələri izləyirəm. Hiss edirəm ki, illərdir sənət naminə gördüyüm işlər, hər zaman xalqımın, dövlətimin yanında olmağım cavabsız qalmayıb. İnsanlar mənim namizəd olmağıma yetərincə müsbət yanaşırlar. Əgər belədirsə, mən də onların Milli Məclisdə səsi olmağa müsbət yanaşıram. İstərdim ki, onların problemlərinin həllində, daha yuxarı instansiyalara çatdırılmasında yaxından iştirak edim” - deyə bildirmişdi. Bundan əlavə, o qeyd etmişdi ki, hələ namizəd olacağı dairəni müəyyənləşdirməyib: “...Hələlik hansı dairədən namizəd olacağımı dəqiqləşdirməmişəm. Amma dairə seçimi barədə tam qərarsız da deyiləm. Çox güman ki, yaxın günlərdə namizəd olacağım dairəni də açıqlayacağam”...
2020-ci ilin fevral ayının 9-da keçiriləcək növbədənkənar parlament seçkilərində iştirak edəcəyini dəfələrlə açıqlayan A.Bəşirqızı ilə əlaqə saxlayıb parlament seçkilərinə hansı səbəbdən qatılmadığını soruşduq. A.Bəşirqızının cavabı çox qəribə oldu. O, əvvəlki fikirlərinin tam əksi olaraq bildirdi ki, heç vaxt deputat olmaq iddiası və arzusu olmayıb.
“Afaq xanım, siz son zamanlar dəfələrlə bildirmisiniz ki, parlament seçkilərində iştirak edəcəksiniz, Milli Məclisdə sənət adamlarının səsinə çevriləcəksiniz. Bu gün isə tamam fərqli bir fikir bildirirsiniz. Fikrinizi niyə təkzib edirsiniz” sualına cavabında A.Bəşirqızı bildirdi ki, onun deputatlığa namizədliyinin irəli sürülməsinin təşəbbüskarı özü deyil, bir sıra saytlar olub: “Mən heç vaxt deputat olmaq fikrində olmamışam. Mən, zatən, millətin vəkiliyəm. Deputatlıq heç fikrimdən də keçməyib, bu, saytların istəyi idi, mən də onlara kobudluq etmirdim. Saytlar mənim haqqımda xəbərim olandan da, olmayandan da yazırlar həmişə. Müəyyən saytlar vardı ki, onlar məni namizəd kimi görürdülər. Amma mən deputatlığa namizəd olmaq haqda düşünməmişəm”.
Faiq Ağayevin köməkçisi: “Bu dəfə namizədliyini vermədi, inşallah, gələn dəfə verər”
Növbədənkənar parlament seçkilərində iştirak edəcəyini bəyan edən Xalq artisti Faiq Ağayevin Azər adlı köməkçisi bildirdi ki, F.Ağayevin növbədənkənar parlament seçkilərində iştirak etmək niyyəti olsa da, bu qərardan imtina edib. “F.Ağayev 2020-ci il fevralın 9-da keçiriləcək növbədənkənar parlament seçkilərində iştirak üçün namizədliyini irəli sürmədi. Bunun səbəblərini bilmirəm, bunu özü bilir. Bu dəfə namizədliyini vermədi, inşallah, gələn dəfə verər” - deyə o qeyd etdi.
2015-ci ildə keçirilən parlament seçkilərində də namizədliyini irəli sürən Əməkdar artist Elza Seyidcahan isə həmkarlarından fərqli olaraq, növbədənkənar parlament seçkilərində namizədliyini irəli sürüb və onun namizədliyi təsdiqlənib.
Elza Seyidcahan: “Artıq namizədliyim qeydə alınıb”
E.Seyidcahan “Bakı-Xəbər”ə bildirdi ki, o, 54 saylı Şabran-Siyəzən seçki dairəsindən millət vəkilliyinə namizədliyini irəli sürüb: “Artıq namizədliyim qeydə alınıb. Mənim parlament seçkilərində iştirakım təsdiqlənib. Amma hələlik bu barədə heç nə danışmaq istəmirəm. Bu haqda yanvarın 17-dən sonra danışmaq olar. Çünki təbliqat-təşviqat o tarixdən başlayır. İstəsəniz seçki məntəqəsinə də gələ bilərsiniz və orada hər şeyi özünüz görüb yazarsınız. Diqqətinizə görə çox sağ olun”.
İradə SARIYEVA
