28/09/2020 12:09
728 x 90

Şou müğənnilər hətta öz həmkarlarının da ziyafətlərinə fantastik qiymətlərlə gedir

img

Şou-biznesçilər hər dəqiqə səmimiyyətdən, sədaqətdən danışsalar da, təmənnasız insan olduqlarını qabartsalar da, əslində, belə deyil. Özlərini hər şəklə salsalar da, nəticədə onların əsl simaları üzə çıxır. Şou-biznesdə təmsil olunan müğənnilərin böyük əksəriyyətinin toylara fantastik qiymətə getdiyini hər kəs bilir. Əvvəllər bunu özləri də fəxrlə deyirdilər, amma son zamanlar müğənnilərin gəlirlərinin ödədikləri vergiyə adekvat olmadığı üzə çıxdıqdan sonra onlar öz gəlirlərini, qazanclarını ört-basdır etməyə başladılar.

Dəfələrlə müxtəlif şou proqramlarda müğənnilər özləri deyiblər ki, həmkarları onların ailə üzvlərinin ziyafətlərinə pulla qatılır, hətta çox böyük məbləğ tələb edirlər. Bu fakt var. Xalq artisti  Aygün Kazımovanın populyar olmayan həmkarlarının ziyafətlərinə qonorarsız qatılmadığı haqqında mətbuatda fikirlər yer alıb. Qeyd edim ki, bir müddət əvvəl prodüsser-aparıcı Tarix Əliyev (Tolik) qonorar müqabilində həmkarlarının şənliyinə qatılan müğənnilərdən birinin Xalq artisti Aygün Kazımova olduğunu açıqlamışdı. O bildirmişdi ki, A.Kazımova müğənni Rəqsanə İsmayılovanın məclisinə qonorarla qatılıb. Deyilənə görə, Rəqsanənin qızının arzusu olub ki, Namiq Qaraçuxurlu ilə A.Kazımova onun ad gününə gəlsin, onlar da pul müqabilində bu məclisə gəlib oxuyublar.

Görünür, qonorar müqabilində öz həmkarlarının toylarına, ad günlərinə qatılmaq şou-biznesçilər üçün adi haldır. Belə olmasaydı, onlar bu hərəkətə yol verməzdilər.

Bəzən eşidirik ki, bizim şou-biznesçilər hansısa rusiyalı müğənninin toyuna qatılıblar. Görəsən, Xalq artisti Brilliant Dadaşova rusiyalı müğənni Alsunun toyunda oxumaq üçün nə qədər qonorar alıb? Hərçənd, B.Dadaşova “Alsunun toyunda tamamilə təmənnasız oxumuşam” deyir. Bəs onda nə baş verir ki, öz həmkarlarının toyuna pulsuz getmirlər. Yəqin bizim şou-biznesçilər Alsudan daha varlıdırlar, ona görə...

Bu günlərdə isə meyxanaçı Samirə Xalq artisti Miri Yusifdən giley edib ki, o onun dəvət etdiyi toya görə meyxanaçıya “qiymət oxuyub”. “Xalq artisti Miri Yusifə zəng vurdum. Onu yarımsaatlıq məclisə dəvət etmək istəyirdilər. Məndən məclisin keçiriləcəyi obyektin ünvanını soruşdular. Dedim ki, nə fərqi var? O isə cavabında mənə dedi: "Fərqi çoxdur. Onun qonşuluğunda olan obyektə biz getmirik. Yarım saata 6500 manata gedirəm” - deyə Samirə deyib.

Göründüyü kimi, şou-biznesçilər bir-birinə hər hansı bir formada güzəşt etmək istəmirlər.

Bir müddət əvvəl mətbuata açıqlama verən və hazırda ABŞ-da restoran biznesi ilə məşğul olan müğənni Elariz Məmmədoğlu da deyib ki, müğənnilərin çoxu bir-birinin toyuna, qohumlarının ziyafətinə ödənişsiz getmir. Onun sözlərinə görə, özü də məclisinə gələn musiqiçilərə pul ödəyib.  Belə hallar şou-biznesə xas bir xüsusiyyətdir. Müğənnilərin çoxu deyir ki, həmkarları Rusiyadan, Türkiyədən müğənni dəvət edib onlara “zəhmət haqqı” vermək imkanına malikdirsə, onlara nə üçün pul ödəməli deyillər?

Bəzi şou-biznesçilər deyirlər ki, tanınmayan sənətçilərin məclislərinə pulsuz getmək olmaz, çünki onlar populyar müğənniləri məclisə dəvət etməklə onların sayəsində reklam olunurlar (?).

Əslində isə belə olmalıdır ki, bütün sənət sahələrində həmrəylik əsas prinsip kimi götürülməlidir. Amma bunu şou-biznesçilər qəbul etmirlər.

Leyla QARAXANLI 

Son xəbərlər