İyulun 19-na keçən gecə DİN-in "102 Zəng Mərkəzi"nə Qobustan qəsəbəsi ərazisində avtomobilin qaçırılması barədə məlumat daxil olub.
Məlumatla əlaqədar hadisə yerinə gələn Qaradağ RPİ 11-ci Polis Bölməsinin əməkdaşlarından ibarət əməliyyat qrupu müvafiq araşdırmalar aparıb. Məlum olub ki, saat 1.00 radələrində Nəsimi rayonu ərazisində Balakən rayon sakini Elçin Dəmirovun idarə etdiyi "Opel" markalı avtomobilə sərnişin qismində oturan naməlum şəxs Qobustan qəsəbəsinə gedəcəyini bildirib. Qəsəbə ərazisinə çatanda həmin şəxs ona pul verməli olan bir nəfərin başqa bir avtomobildə gözlədiyini, içkili olduğundan özünün düşə bilməyəcəyini deyib, sürücüdən pulu həmin adamdan götürməsini xahiş edib.
E.Dəmirov maşından düşən kimi həmin şəxs avtomobili sürərək aradan çıxıb. Aldadıldığını və maşınının qaçırıldığını görən zərərçəkmiş polisə müraciət edib.
Əməliyyat qrupu məlumatı aidiyyəti üzrə ötürüb və maşının saxlanması üçün təxirəsalınmaz tədbirlərə başlanıb.
Baş Dövlət Yol Polisi İdarəsi əməkdaşlarının keçirdiyi əməliyyat-axtarış tədbirləri nəticəsində avtomobil Şamaxı rayonu ərazisində saxlanıb, onu qaçırmaqda şübhəli bilinən şəxslə birgə 11-ci Polis Bölməsinin əməkdaşlarına təhvil verilib.
Araşdırmalarla onun əvvəllər dəfələrlə məhkum olunmuş Bakı şəhər sakini Elnur Baxışov olduğu müəyyən edilib.
Faktla əlaqədar Qaradağ RPİ-nin İstintaq şöbəsində cinayət işi başlanıb, araşdırma aparılır.
Natiq CAVADOV DİN mətbuat xidmətinin əməkdaşı
