İnsanların ən çox sevdiyi, buna görə də bir-birinə hədiyyə etdiyi gül həm də toy, nişan mərasimlərində istifadə edilir. Eləcə də güldən dekorasiya məqsədilə geniş çeşiddə yararlanırlar. Bu gün ölkədə yeni salınan və yaxud abadlaşdırılan parklarda müxtəlif gül növlərindən istifadə edilir. Eyni zamanda, bu da bir faktdır ki, çiçək artıq, sadəcə, bəzək deyil, qazanc gətirən bir təsərrüfat növü kimi iqtisadiyyatın aparıcı sahələrindən birinə çevrilib.
Prezident İlham Əliyev dəfələrlə çıxışında qeyd edib ki, ölkəmizdə gülçülüyün inkişafı vacibdir və bunun üçün müasir texnologiyalar əsasında fəaliyyət göstərən istixanalar yaradılmalıdır.
Məlumdur ki, XX əsrin 70-ci illərində Azərbaycanda böyük gülçülük təsərrüfatları olub. Həmin dövrdə Bakı kəndlərindən Zabrat, Maştağa, Nardaran, Bilgəh, Mərdəkan və Şüvəlanda gülçülük sovxozları fəaliyyət göstəriblər. Hansı ki, onlar həm Azərbaycanı, həm də SSRİ-ni güllə təmin edirdilər. Məlumdur ki, Şəki-Zaqatala bölgəsində isə respublikada ilk dəfə olaraq sənaye xarakterli gülçülük təsərrüfatı yaradıldı.
Ölkəmiz müxtəlif güllərin yetişdirilməsi ilə bağlı əlverişli iqlim şəraitinə malikdir. Bir vaxtlar ölkəmizdə də gül istehsalında olan inkişaf ixrac üçün geniş imkanlar açıb. Ölkəmizdə bu sahənin inkişafı üçün imkanlar var və bir çox çiçək növünü yetişdirmək mümkündür. Hətta elə güllər var ki, yalnız Azərbaycanda bitir.
Güldən tək dekor məqsədilə ilə deyil, eyni zamanda, kosmetika sahəsində də istifadə olunur. Gülçülük sektorunun inkişafı nəticəsində ölkəmizdə qızılgül yağı sahəsi də inkişaf edir.
"AzRose" Məhdud Məsuliyyətli Cəmiyyətinin bir müddət öncə yaydığı məlumatda qeyd olunur ki, şirkət xaricə qızılgül yağı ixrac etməyə hazırlaşır. Fransa, İsveçrə, Almaniya və Bavariyaya qızılgül və lavanda yağları "Made in Azerbaijan" brendi altında, "Roseoil" və "Lavandoil" adı ilə ixrac ediləcək.
Azərbaycan Respublikasının Prezidenti İlham Əliyev oktyabrın 28-də Qəbələ rayonunun Vəndam qəsəbəsində dekorativ gülçülük istixanası ilə tanış olub. “AzRose” MMC-nin direktoru Nicat Mirzəyev bildirib ki, ölkəmizdə ənənəvi və ixrac potensialı yüksək sahələrdən biri də gülçülükdür.
Tanışlıq zamanı Azərbaycan Prezidenti İlham Əliyevin regionların mövcud iqtisadi potensialından daha səmərəli istifadə edilməsi, ənənəvi sahələrin inkişafı ilə bağlı verdiyi tapşırıq və göstərişlərə uyğun olaraq, gülçülüyün inkişafı istiqamətində də zəruri işlər görüldüyünü bildirib. Həmçinin, bu sahədə əldə olunan məhsullara dünya bazarında böyük tələbat olduğu dilə gətirilib.
Statistik göstəricilərə görə, dünya üzrə ildə təxminən 3 ton qızılgül yağı istehsal olunur. Bu bazarda Azərbaycanın da təmsil olunması ölkəmizə yeni valyuta axınını təmin edəcək, digər tərəfdən də “Made in Azerbaijan” brendinin dünyada daha da məşhurlaşmasına səbəb olacaq.
“Made in Azerbaijan” brendi adı altında istehsal olunan qızılgül yağı rəqabətyönümlü olmalıdır”
Məlumdur ki, qızılgül yağı dünyada ən gəlir gətirən sahələrdən biri hesab olunur. Bu sahənin inkişaf etdirilməsinin vacibliyi barəsində danışan iqtisadçı-ekspert Fuad İbrahimov “Bakı-Xəbər”ə açıqlamasında qeyd etdi ki, istehsal olunan hər bir məhsul rəqabətqabiliyyətli olmalıdır. Nəzərə almaq lazımdır ki, gülçülük elə bir sahədir ki, bu sahəyə tələbat var. Tələbat olmaqla yanaşı, xarici bazarda bu sahə üzrə öz sözünü demiş ölkələr var: “Məlumdur ki, qızılgül yağı olduqca bahalı məhsuldur və yağın ixracı ölkəyə xeyli valyuta gətirər. Onu da nəzərə almaq lazımdır ki, hər ölkədə qızılgül yağı istehsal olunmur. “Made in Azerbaijan” brendi adı altında istehsal olunacaq qızılgül yağı rəqabətyönümlü olmalıdır. Bazar iqtisadiyyatı prinsiplərinə əsasən, xarici bazara çıxarılacaq məhsul qonşu ölkələrlə müqayisədə ucuz olmalıdır”.
Həmsöhbətimiz onu da vurğuladı ki, qızılgül yağının ixracını genişləndirmək üçün qeyd olunan sektoru daha da inkişaf etdirmək lazımdır: “Bəllidir ki, qızılgül yağına tək parfümeriyada deyil, eyni zamanda, qida və farmokoloji sahələrdə tələbat var. Vaxtilə Azərbaycanda qızılgül yağı daha çox istehsal olunurdu. Eyni ənənənin yenidən bərpa olunması gözlənir. Adıçəkilən məhsul rəqabətqabiliyyətli olarsa, xarici bazarda özünə yer tutar”.
Günel CƏLİLOVA
