Cari ilin əvvəlində fiziki şəxslərin problemli kreditlərinin həlli ilə bağlı imzalanan fərmandan sonra problemli kreditlərin həcmi azaldı. Məlumdur ki, həmin ərəfəyə qədər ölkədə problemli kreditlərin həcmi 1 milyard 620 milyon manat idi və bu, kredit portfelinin təxminən 14 faizini təşkil edirdi. Eyni zamanda, problemli kreditlərin həcminin çox olması ilə yanaşı, kredit portfelindəki payının çoxalması da müşahidə olunur. Nəzərə alaq ki, beynəlxalq praktikada, adətən, problemli kreditlərin kredit portfelindəki payı təqribən 5 faizə yaxın olur. Hətta inkişaf etmiş ölkələrdə bu, 3 faizə yaxındır.
Azərbaycanda isə bu göstərici ikirəqəmli idi. Bu baxımdan 2015-ci ildən problemli kreditlərin həcmində müşahidə edilən artımlar, eləcə də kredit portfelinin kiçilməsi, nəticə etibarilə, problemli kreditlərin kredit portfelində payının artmasına gətirib çıxarıb.
Problemli kreditlərlə bağlı Azərbaycan Prezidentinin məlum fərmanının icrası devalvasiya nəticəsində bank sektorunun və vətəndaşların boynundan asılan “problemli kredit yükü”nü həll etdi. Bu fərmandan sonra bank sektorunun vəziyyətinin yaxşılaşması gözlənilirdi. Hətta belə bir fikir vardı ki, fərmanın icrasından sonra Azərbaycanda bank sahəsi yenindən canlanacaq. Maraqlıdır, hazırda həmin canlanma hiss edilirmi?
“AtaBank”: “Hazırda “AtaBank”ın sağlamlaşdırılması istiqamətində müəyyən işlər görülür”
“AtaBank”ın ictimaiyyətlə əlaqələr şöbəsindən “Bakı-Xəbər”ə verilən məlumata görə, fiziki şəxslərin problemli kreditlərinin həll olunması ilə bağlı imzalanan fərmandan sonra bankın vəziyyəti nisbətən yaxşılaşıb: “Hazırda “AtaBank”ın sağlamlaşdırılması istiqamətində müəyyən işlər görülür”.
"AccessBank" - İlkin Əhmədov: “Məlum fərman, sözsüz ki, ümumilikdə, bütün sektora, o cümlədən, bu sektorun aparıcı oyunçularından biri olan “AccessBank”a müsbət təsir etdi”
"AccessBank"ın PR meneceri İlkin Əhmədov qəzetimizə açıqlamasında qeyd etdi ki, ölkə başçısının müvafiq fərmanı, sözsüz ki, ümumilikdə, bütün sektora, o cümlədən, bu sektorun aparıcı oyunçularından biri olan “AccessBank”a müsbət təsir etdi: “Bundan öncə də “AccessBank”ın rəhbər şəxsləri öz çıxışlarında bu fərmanı ölkə rəhbərliyinin indiyədək reallaşdırdığı ən önəmli sosial layihələrdən biri kimi qiymətləndirib. Çünki fərmanın sosial əhəmiyyəti kifayət qədər yüksəkdir. Prezident 800 min nəfərin kredit problemini birdəfəlik həll etdi. Dövlət başçısı bu fərmanı fiziki şəxslərin xarici valyutada olan kreditləri üzrə onların üzləşdiyi maliyyə itkisini qarşılamaq və dövlət dəstəyini təmin etmək məqsədilə imzalayıb. Şübhəsiz ki, Prezident burada bank sektorunun maraqlarını da nəzərə alıb. Bunun üçün banklara 682 milyon manatadək dövlət zəmanəti ilə təmin edilmiş güzəştli kredit verilib. Ölkə başçısı problemli kreditlərin həllində daha sistemli və əhatəli yanaşmanı ortaya qoyub, əhalinin maraqlarını daha yüksək səviyyədə nəzərə alıb. Bu fərmanın icrası yüz minlərlə insanın güzəştdən istifadə etməsinə şərait yaratdı. Bu mühüm addım vətəndaşların maddi rifah halını daha da yüksəltmək, onların maliyyə yükünü azaltmaq məqsədi daşıyır”.
Pərviz Heydərov: “Bank sektorunda müsbət meyllər artıq bir müddətdir müşahidə edilir”
İqtisadçı-ekspert Pərviz Heydərov bildirdi ki, bank sektorunda müsbət meyllər artıq bir müddətdir müşahidə edilir. Problemli kreditlərin həll olunması buna şübhəsiz ki, əlavə dinamika verməli idi. Lakin bu, belə qısa müddətdə özünü göstərə bilməz. Sadəcə olaraq, banklar bu dəfə köhnə səhvlərini təkrar etməməlidirlər. Əsas fəaliyyət yenə də istehlak kreditləri üzərində köklənəcəksə, bank sektorundakı canlanma sabun köpüyü effekti daşıyacaq. Odur ki, buna yol verilməməlidir: “Bundan əlavə, bankların təklif etdikləri kreditlər üzrə faiz dərəcələri yüksəkdir. Bu vəziyyət dəyişməz olaraq qalır. Açıq deyim, ölkəmizdə banklar kreditləşdirmə fəaliyyəti ilə deyil, sələmçiliklə məşğul olublar və məşğul olmaqda da davam etmək istəyirlər. Ümumiyyətlə, bankların canlanması üçün real sektor da inkişaf etməlidir. Bunsuz mümkün deyil. Burada risq səviyyəsi olduqca yüksəkdir. Hesab edirəm ki, qeyri-neft sektorunun inkişafı ilə bağlı həyata keçirilən tədbirlər bunu tədricən aradan götürməyə imkan verəcək. Odur ki, bank sektorunun sağlam inkişafı yalnız bununla bərabər mümkündür”.
Günel CƏLİLOVA
