Son illər ölkədə istehsal olunan ətin həcmi artıb. Ölkədə ət istehsal olunmasına baxmayaraq, idxal olunan ətin də həcmində artım qeydə alınıb. Açıqlanan statistik rəqəmlərə əsasən, ət idxalının artması cari ilin yanvar-iyul aylarında müşahidə olunub. Belə ki, bu il ölkəmizə 43,329 milyon dollar dəyərində 28,804 min ton ət idxal edilib. İdxal edilən ətin miqdarı keçən ilin eyni dövrü ilə müqayisədə 3,117 min ton və ya 12,1 faiz çoxdur. İdxalın artması ilə paralel olaraq bu il ət istehsalı da artıb.
Azərbaycanda ətin istehsalına gəldikdə isə, statisrik rəqəmlərdə qeyd olunur ki, bu ilin yeddi ayı ərzində ölkədə 186,5 min ton ət istehsal olunub. Dövlət Statistika Komitəsinin verdiyi məlumata görə, bu rəqəm 2018-ci il üçün olan göstəricilərdən 2,7 faiz çoxdur. Yəni ət idxalının artım tempi bu məhsulun istehsalını dörd dəfədən çox üstələyir. Buna görə də idxal olunan ətin bazar payı il ərzində 12,5 faizdən 13,2 faizədək artıb. Nəticə etibarilə isə idxal olunan ətin qiymətinin daxili bazara təsiri də artır.
Natiq Cəfərli: “Tələbatın həcmi günü-gündən artdığı üçün idxalın artımına deyil, daxili istehsalın həcminin artmasına daha çox diqqət yetirmək lazımdır”
Maraqlıdır, ət idxalının və istehsalının artması onun qiymətinə təsir edə biləcəkmi? İqtisadçı ekspert Natiq Cəfərli “Bakı-Xəbər”ə açıqlamasında qeyd etdi ki, daxili istehsaldakı artım istehlakın artımı üst-üstə düşmür. Çünki istehlak günü-gündən artır: “Nəzərə almaq lazımdır ki, ölkəyə gələn turistlərin sayı artır. Turistlər də artıq istehlakçı qismində çıxış edirlər. Bu səbəbdən də ölkəyə daha çox ət idxal olunur ki, tələbatı ödəmək mümkün olsun”.
Ət idxalının artmasınının qiymətə təsir edib-etməyəcəyinə gəlincə, iqtisadçı bildirdi ki, idxalın həcminin artması yerli məhsulların qiymətində kəskin artımının qarşısının alınmasına səbəb olub: “Xaricdən ət məhsulları idxal olunmasaydı, daxili bazarda bu sahədə yerli istehsalı qiyməti kəskin baha olardı. Bu səbəbdən idxalın həcminin artması qiymətə təsir etməyəcək”.
Ekspert hesab edir ki, ətin satış qiyməti ilə bağlı aidiyyəti qurumlar yol xəritəsi hazırlamalıdır: “Nəzərə almaq lazımdır ki, pambıqçılığın, texniki bitkilərinin daha çox əkilməsi örüş yerlərinin və yem tədarükünün azalmasına səbəb olur. Bu hal gələcəkdə iri və xırda buynuzlu heyvanların yem problemi ilə qarşılaşmasına səbəb ola bilər. Yaranmış vəziyyəti indidən diqqətdə saxlamaq lazımdır ki, gələcəkdə idxalın həcmi daha da artmasın, yerli istehsalın həcmi idxalı üstələsin. Bəllidir ki, tələbatın həcmi ildən-ilə deyil, günü-gündən artır. Ona görə də daxili istehsalın həcminin artmasına daha çox diqqət yetirmək lazımdır”.
Günel CƏLİLOVA
