Prezident İlham Əliyevin iyunun 18-də imzaladığı sərəncamlarla minimum əməkhaqqı, ayrı-ayrı dövlət orqanları əməkdaşlarının, müəllimlərin, dövlət qulluqçularının aylıq maaşları artırıldı. Eyni zamanda, minimum əmək pensiyasının 160 manatdan 200 manata çatdırılmasına qərar verildi. Bununla bir daha təsdiq olundu ki, ölkədə dövlət siyasətinin mərkəzində insan amili dayanır. Əhalinin sosial rifahının gücləndirilməsi daim prioritet olaraq qalır.
2019-cu ilin dövlət büdcəsində nəzərdə tutulan vəsaitlər və 2019-cu ilin əvvəlindən başlayaraq artan büdcə gəlirləri hesabına ölkə başçısının sərəncamları ilə geniş sosial paket elan edildi. Bu sosial paket 3 milyondan çox insanı əhatə edərək, minimum əməkhaqlarının, pensiya təminatlarının, təqaüdlərin, sosial müavinətlərin və s. artmasına səbəb oldu. Sosial paket elan edilərkən ölkə başçısı bunun davam edəcəyini və artan iqtisadi resursların bir daha əhalinin maddi rifah halının yaxşılaşmasına sərf ediləcəyini bəyan etdi. Belə bir şəraitdə sosial addımların atılmasının iqtisadi əsasları da təmin edilməkdədir. Bu istiqamətdə verilən son sərəncamlar görülən işlərin əhalinin sosial vəziyyətinin daha da yaxşılaşmasına xidmət etdiyini göstərdi. Hansı ki, pensiya və məvaciblərin artırılması bunu bir daha sübut etdi.
Bütün bunların fonunda, sözügedən artımlar ölkədə yoxsulluq səviyyəsinin daha da azalmasında necə rol oynaya bilər?
Aydın Hüseynov: “... digər şəxslərin də maddi durumuna müsbət təsir edir”
Məsələyə münasibət bildirən millət vəkili Aydın Hüseynovun sözlərinə görə, sözügedən artımlar və minimum əməkhaqqının yaşayış minimumundan yüksək olması yoxsulluq səviyyəsinin azalmasına ciddi təsir edəcək: “Bütövlükdə götürdükdə, Azərbaycanda yoxsulluq 5 faiz həddindədir. O da məlumdur ki, əsasən aşağı təbəqə 180 manata qədər maaş alırdı. Minimum əməkhaqqının 180 manatdan 250 manata qaldırılması və digər artımlar ölkədə yoxsulluq səviyyəsinin daha da aşağı düşməsinə öz təsirini göstərəcək. Nəzərə almaq lazımdır ki, bu təkcə əməkhaqqı alanların sosial durumuna müsbət təsir etməyəcək. Bu, dolayısı ilə, digər ölkə vətəndaşlarının da maddi durumuna müsbət təsir edəcək. Məsələ ondadır ki, əməkhaqqı artan vətəndaşlarımız bazarlara üz tutacaqlar. Bu da, öz növbəsində, bir sıra məhsullara olan tələbatı artıracaq. Nəticədə həmin məhsulların istehsal və satışında iştirak edən şəxslər bundan qazanacaqlar. Artımlar xırda sahibkarlığın inkişafına təkan verəcək. O mənada ki, əməkhaqqı və ailə büdcəsi artırsa, bu, dolayısı ilə, digər şəxslərin də maddi durumuna müsbət təsir edir. Məsələn, vətəndaş hər hansı bir hədiyyə almaq istəyəcək, əşya götürmək istəyəcək və s. Deməyim odur ki, bütün bunlar digər sektorlara da öz təsirini göstərəcək. Bu həm də vətəndaşların məşğulluğunun təmin olunması baxımından mühüm əhəmiyyətə malikdir”.
Vidadi ORDAHALLI
