“Azərbaycan bu gün xarici sərmayələrin qoyuluşu üçün öz imkanlarını təqdim edir və bu, hər bir ölkə üçün çox önəmli məsələdir. Şadam ki, qeyri-neft sektoruna investorlar tərəfindən böyük maraq var. Burada əsas məsələ bürokratik əngəlləri aradan götürməkdir”.
Bu fikirləri Prezident İlham Əliyev Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında deyib.
Ölkə başçısının fikrincə, sözügedən məsələdə bürokratik əngəllərə yol vermək olmaz: “Biz potensial investoru cəlb etməliyik, investoru axtarmalıyıq, ona sübut etməliyik ki, Azərbaycana sərmayə qoysun. Ancaq bəzi hallarda hansısa yerli və ya xarici şirkət investisiya qoymaq istəyəndə onun qarşısında süni, bürokratik və digər əngəllər yaradılır. Bu, tamamilə qəbuledilməzdir, buna yol vermək olmaz. İnvestisiyaların cəlb edilməsi hər bir ölkənin iqtisadi inkişafı üçün əsas şərtlərdən biridir. Azərbaycanda dövlət investisiyaları qoyulur və qoyulmalıdır. Ancaq biz çalışmalıyıq ki, özəl sektor daha da böyük həvəslə investisiyalar qoysun”.
Prezident onu da qeyd edib ki, indi xaricdən investisiya, sərmayə qoymaq istəyənlərin sayı çoxalır: “Xarici sahibkarlar müraciət edirlər. Mənim bu yaxınlarda Çin Xalq Respublikasına etdiyim səfər çərçivəsində görüşdüyüm iri şirkətlərin rəhbərlərinin fikri də çox müsbətdir. Onlar da Azərbaycana sərmayə qoymaq üçün indi işlər aparırlar və böyük maraq göstərirlər”.
Maraqlıdır, Azərbaycana daha çox xarici sərmayənin cəlbi ilə əlaqədar bürokratik əngəllərin aradan qaldırılması üçün bundan sonra hansı islahatlar aparıla bilər? Xarici sərmayənin cəlbi ilə bağlı qanunvericilikdə konkret nə kimi yeniliklər ola bilər?
Ruslan Atakişiyev: “O zaman xarici sərmayədar sərbəst olacaq və ölkəyə sərmayə qoymaqda maraqlı olacaq”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, bu sahədə qanunvericilik müvafiq normalara cavab verir, sadəcə bunun tətbiqi arzuolunan səviyyədə deyil: “Fikrimcə, xarici sərmayənin cəlbi ilə əlaqədar və bürokratik əngəllərlə mübarizə məqsədilə qanunvericilikdə olan yeniliklər tətbiq oluna bilər. Mövcud qanunvericiliyn tətbiqinə önəm verilməlidir. Aparılan islahatlarla əlaqədar qanunlarımız bazar iqtisadiyyatı mexanizminin işləməsi üçün hardasa imkan yaradır. Sadəcə bunun tətbiqini genişləndirmək lazımdır. Qanunu pozanlara qarşı sərt tədbirlər görülməlidir. Xüsusən də səlahiyyətini aşanlara qarşı qanun çərçivəsində sərt addımlar atılmalıdır. O zaman xarici sərmayədar sərbəst olacaq və ölkəyə sərmayə qoymaqda maraqlı olacaq. Bürokratik əngəllər dedikdə əsasən söhbət süründürməçilikdən gedir. Lazım olan gərəkli sənədləri vaxtında əldə etmək olmur. Bu da, istər-istəməz, xarici investoru çəkindirir. Bəzi məmurlar bu məsələdə vəzifə səlahiyyətlərindən sui-istifadə edirlər. Nəinki xarici investorlar, daxili investorlar da bu problemlərdən əziyyət çəkirlər. Sərmayənin ölkəyə cəlbi üçün bütün maneələr minimuma endirilməlidir. Buna nail olmadan biz qeyri-neft sektoruna böyük həcmdə investisiya cəlb edə bilmərik. Ona görə də bütün mümkün vasitələri işə salmalıyıq. Rayonlarda bəzi icra başçıları xarici sərmayədarları təşviq etmək üçün addımlar atmırlar. Halbuki, investorlara geniş imkanlar yaradılmalıdır. Bu gün aparılan siyasət onu göstərir ki, Prezident ölkəyə böyük xarici sərmayə gəlişində maraqlıdır. Ancaq bəzi məmurlar, praktiki olaraq, buna münbit zəmin yaratmırlar. Qoyulacaq sərmayədən pay gözləyirlər ki, görək onlara bundan nə çatacaq. Bu kimi problemlər çıxır ortaya. Lisenziyalarla bağlı investorların problemləri olur. Hesab edirəm ki, bütün bunlara son qoyulmalıdır”.
Vidadi ORDAHALLI
