Aprelin 30-da Prezident İlham Əliyevin sədrliyi ilə Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclası keçirilib. Dövlət başçısı ötən il prezident seçkilərindən sonra islahatların yeni mərhələsinin başladığını və onun icrası üçün məqsədyönlü addımlar atıldığını bildirib.
Bununla yanaşı, Prezident bir sıra sahələrdə yeni iqtisadi islahat kursu elan etdi. Bunlardan biri də kənd təsərrüfatı ilə bağlıdır. Onu da qeyd edək ki, indiyə qədər kənd təsərrüfatında bir neçə mərhələdə islahatlar həyata keçirilib. Kənd təsərrüfatının inkişafı ilə bağlı bir sıra torpaqlar, müəssisələr özəlləşdirilib. Aqrar sahənin inkişafı ilə bağlı yeni emal müəssisələri tikilib. Fermerlərə güzəştli şərtlərlə kreditlər verilir. Həmçinin, bu sahədə aparılan islahatlar çərçivəsində fermerlərin subsidiyalarla təmin olunması ilə bağlı mexanizmlər hazırlanıb. Aqrar sektor bütün dünyada tam rentabelli sahə sayılmır. Bu səbəbdən bir çox inkişaf etmiş ölkə kənd təsərrüfatına hər il böyük həcmdə subsidiyalar ayırır.
Azərbaycanda indiyə qədər 17 aqropark tikilib. Bu il daha 10 aqroparkın tikiləcəyi gözlənir. Eyni zamanda, Kənd Təsərrüfatı Nazirliyi tabeliyində Dövlət Aqrar Ticarət Şirkəti yaradılıb. Ötən il nazirliyin rayon və şəhər idarələri ləğv edilərək əvəzində Dövlət Aqrar İnkişaf Mərkəzi (DAİM) təsis edilib. Kənd Təsərrüfatı Nazirliyində Fermerlər Şurası təsis edilib. Həmçinin, nazirlik yanında Aqrar Məşvərət Şurası yaradılıb.
Bütün bunların fonunda, kənd təsərrüfatında əvvəlki və indi elan olunmuş islahat kursları arasında hansı oxşar və fərqli xüsusiyyətlər olacaq?
Fikrət Yusifov: “Verilən subsidiya və güzəştli kreditlərin daha səmərəli istifadəsinə diqqət artacaq”
Məsələyə münasibət bildirən iqtisad elmləri doktoru Fikrət Yusifovun sözlərinə görə, islahatlarda bəzi oxşar və fərqli məqamlar olacaq: “Aqrar sahədə islahatların daha sürətlə həyata keçiriləcəyi gözlənir. Bu fazaya keçməkdə məqsəd odur ki, nəticələr daha səmərəli olsun. Çünki son illər ərzində aqrar sektora diqqət artıb. Aqrar sektorda yetişdirilən müxtəlif məhsullara subsidiyalar ayrılır. Bu vaxta qədər bir sıra güzəştli kreditlər verilib. Çox güman ki, bundan sonra da bununla bağlı işlər görüləcək. Sumqayıtda böyük Azot zavodu tikilib. Bir var azotu idxal edəsən, bir də var buna olan tələbatı yerli istehsal hesabına ödəyəsən. Ancaq Kənd Təsərrüfatı Nazirliyinin keçmiş rəhbərliyi dövründə aqrar sektorda istənilən nəticələr əldə olunmayıb. Ən azı, iki-üç dəfə yuxarı nəticələr gözləyirdik. Ancaq belə olmadı. Halbuki, rəhbərlik öz işinə məsuliyyətlə yanaşsaydı, aqrar sektorda daha böyük nəticələr əldə olunardı. Ona görə də rəhbərlik dəyişdi. Oxşar xüsusiyyətlər o olacaq ki, subsidiyalar, güzəştli şərtlərlə bu il də kreditlər veriləcək. Fərqli məqam isə o olacaq ki, verilən subsidiya və güzəştli kreditlərin daha səmərəli istifadəsinə diqqət artacaq. Bu sahədə yeni mexanizmlər tətbiq ediləcək ki, bu da aqrar sektorda şəffaflığın artırılmasında mühüm rol oynaya bilər. Fermerlərin təşəbbüskarlığına daha çox üstünlük veriləcəyi gözlənir. İslahatlar bu kimi məsələlərdə yeniliklər gətirə bilər. Son üç ayda ət idxalı xeyli artıb. Bunlar aqrar sektorun çatışmayan cəhətləridir. Fikrimcə, aparılacaq yeni islahatlar bu sahənin də tənzimlənməsinə müsbət təkan verə bilər”.
Vidadi ORDAHALLI
