Əli Əlirzayev: “Başqa ölkələrə yardım göstərilməsi Azərbaycanın iqtisadi inkişafının göstəricisi olmaqla yanaşı, həm də ölkənin dünyada nüfuzunu artırır”
Yayılan məlumata görə, Azərbaycan yoxsul ölkələr üçün donor olacaq. Belə ki, Beynəlxalq İnkişaf Assosiasiyasının (BİA) aprel ayında keçiriləcək toplantısında Azərbaycanın yoxsul ölkələrə donor qismində nə qədər vəsait ayıracağı müəyyən olunacaq.
Sözügedən məsələ ilə bağlı mətbuata açıqlama verən Dünya Bankının Cənubi Qafqaz üzrə regional direktoru Mersi Tembon yoxsul ölkələrə göstərdiyi dəstək və yardıma görə Azərbaycana minnətdarlığını bildirib: “Azərbaycan da 1992-ci ildə Dünya Bankına yenicə qoşulanda yoxsul ölkə idi. Bu gün isə Azərbaycan dövləti bir çox sahələrdə əhəmiyyətli dərəcədə uğurlar əldə edib və yoxsul ölkələrə öz yardımını təklif edir. Biz buna görə çox şadıq və Azərbaycana minnətdarıq”.
Azərbaycanın Dünya Bankının strukturuna daxil olan Beynəlxalq Yenidənqurma və İnkişaf Bankı (BYİB) və Beynəlxalq Maliyyə Korporasiyası (BMK) kimi institutlarda səhmlərinin artırılması məsələsinə gəldikdə, M.Tembon qeyd edib ki, ölkə buna öz razılığını verib və zəruri sənədləri imzalayıb: “Ən əsas məsələ razılaşmanın əldə olunması və Azərbaycanın razılığının alınması idi. Buna da nail olmuşuq. Ancaq biz ölkənin öz payını nə qədər artıracağını bilmirik. Bu, uzun prosesdir və 10 ilə yaxın vaxt apara bilər”.
Bütün hallarda, Azərbaycanın yoxsul ölkələrə donor olması ölkənin iqtisadi inkişafının göstəricisidir. Nəzərə almaq lazımdır ki, 90-cı illərdə məlum səbəblərlə əlaqədar Azərbaycan dünyanın maliyyə qurumlarından borc alırdı. Azərbaycanda aparılan uğurlu iqtisadi siyasətin nəticəsi olaraq ölkə kredit alan ölkədən kredit verən dövlətə çevrildi. Bir sıra dövlətlər iqtisadi layihələri həyata keçirmək üçün Azərbaycandan kredit alırlar. Azərbaycanın dəstəyilə böyük layihələr həyata keçirilir. Bütün bunlarla yanaşı, Azərbaycan dünyada humanitar xarakterli tədbirlərdə də fəal iştirak edir. O baxımdan, Azərbaycanın yoxsul ölkələrə donor olmasını ekspertlər necə dəyərləndirirlər?
Məsələyə münasibət bildirən iqtisadçı-alim Əli Əlirzayev buna bir neçə aspektdən yanaşdı: “Bunun həm iqtisadi, həm də mənəvi tərəfləri var. Əvvəla nəzərə almaq lazımdır ki, Azərbaycan xalqı xeyirxahdır, yardım etməyi sevəndir. Tarixən bu belə olub. Məsələnin iqtisadi tərəfinə gəldikdə isə, reallıq ondan ibarətdir ki, son illər Azərbaycanın iqtisadi imkanları xeyli artıb. Azərbaycan iqtisadi və digər parametrlərə görə regionda lider mövqeyinə malikdir. Nəzərə almaq lazımdır ki, Azərbaycanda yoxsulluğun səviyyəsi 5 faizə düşüb. Elə ölkələr var ki, orada yoxsulluğun səviyyəsi 40 faizdir. Belə olan halda, Azərbaycanın həmin ölkələrə kömək etməsi, daha konkret desək, donor qismində çıxış etməsi müsbət haldır. Başqa ölkələrə yardım göstərilməsi Azərbaycanın iqtisadi inkişafının göstəricisi olmaqla yanaşı, həm də ölkənin dünyada nüfuzunu artırır. Hesab edirəm ki, bu çox önəmli faktordur. Belə humanitar xarakterli missiyalarda iştirak etmək ölkənin nüfuzunun artmasına xidmət edir. Nəzərə almaq lazımdır ki, vaxt var idi Azərbaycan da yoxsul ölkələr sırasında idi. Ermənistanla müharibə nəticəsində ölkədə qaçqın və məcburi köçkünlərin sayı xeyli artmışdı. Onlar çox çətin şəraitdə yaşayırdılar. Şükürlər olsun ki, həmin dövrlə müqayisədə Azərbaycan bir sıra çətinliklərin öhdəsindən gəldi. Ona görə də bütün bunlar Azərbaycanın uğurudur”.
Vidadi ORDAHALLI
