Qadir Bayramlı: “Xüsusilə də həmin heyvanların təbii mühitə uyğunlaşması məsələsi ciddi tədqiq olunmalıdır”
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin yaydığı bir məlumat sosial şəbəkələrdə geniş müzakirələrə səbəb olub. Həmin xəbərdə bildirilir ki, qurumun mütəxəssislərindən ibarət nümayəndə heyəti Cənubi Afrika Respublikasında (CAR) səfərdədir. Səfərdə məqsəd CAR-ın heyvandarlıq, xüsusilə qoyunçuluq sahəsi üzrə təcrübəsinin öyrənilməsidir.
Nazirlikdən bildiriblər ki, fevralın 22-dək davam edəcək səfər zamanı nümayəndə heyəti bu ölkədə “Dorper” cinsli qoyunların yetişdirilməsi və Azərbaycana idxalı ilə bağlı məsələləri də müzakirə edəcək. Nümayəndə heyətinin tərkibinə nazirlik aparatının və “Aqrolizinq” ASC-nin nümayəndələri daxildir.
Sosial şəbəkələrdə bu məlumat ətrafında aparılan müzakirələrdə maraqlı yanaşmaların şahidi oluruq. Qeyd edilir ki, CAR çox uzaq məsafədə yerləşən ölkədir. Ora 4 nəfərlik nümayəndə heyətinin gedişi-gəliş biletinin qiyməti 20 min manat təşkil edir. Bir qədər də ezamiyyət xərclərini hesablayanda, təqribən 50 minə yaxın pul edir. Hətta ironik olaraq yanaşanlar da var ki, 50 min manata böyük bir qoyun sürüsü almaq olar. Azərbaycanın özü heyvandarlıq üzrə ixtisaslaşmış ölkə olduğu halda, uzaq Afrikadan bura yeni qoyun cinslərini gətirmək, bu işə vəsait sərf etmək nə dərəcədə rentabelli sayıla bilər?
Aqrar sahə üzrə ekspert Qadir Bayramlı qəzetimizə bildirdi ki, tərəqqi və təcrübə, harda olursa-olsun, ondan istifadə etmək lazımdır: “Təbii ki, bu bizə nəsə qazandıracaqsa. Ancaq sizin dediyiniz məsələdə başqa məqsəd var. Hesab edirəm ki, biz kənd təsərrüfatında, xüsusilə də qoyunçuluqda inkişafa nail olmaq üçün öz daxilimzdə olan problemləri həll etməliyik. Sonra beynəlxalq təcrübə gəlir. Öz daxili imkanlarımız hesabına buna daha yaxşı nail ola bilərik. Azərbaycana heyvan sortlarının gətirilməsi asan məsələ deyil. Bunun üçün bir sıra seleksiya araşdırılması həyata keçirilməlidir. CAR çox inkişaf etmiş ölkədir. Onlardan biz qoyunçuluqda olan xəstəliklərlə necə mübarizə aparılmasını mənimsəyə bilərik. Sonra süni mayalanma, damazlıqla bağlı təcrübəni öyrənə bilərik. Heyvanları müasir üsullarla yemləmə üsulları da onlardan götürülə bilər. Cins məsələsinə gəldikdə isə, bu da kompleks araşdırma tələb edir. Yaxşı olar ki, biz yerli cinslərimizlə iş aparıb məhsuldarlığı artıraq. Bilirsiniz, elə bir sort var ki, onu CAR-dan gətirəndə burada həmin nəticəni verməyəcək. Burada hava, yemin kalorilik dərəcəsi, suyun tərkibi də önəmli rol oynayır. Xüsusilə də həmin heyvanların təbii mühitə uyğunlaşması məsələsi ciddi tədqiq olunmalıdır. Bizdə heyvandarlıqda yaylaq-qışlaq problemi həllini tapmalıdır. Yaylaqlarımızın bir hissəsi işğaldadır. Digərlərində isə otlaqlar azalıb. Bizim yerli məhsuldar cinslərimiz az deyil, amma onlara vaxtlı-vaxtında zootexnik xidmətlər göstərilməlidir. Yem bazasını gücləndirməliyik. Yeni cinslərin gətirilməsindənsə, xarici təcrübəni öyrənib, onun tətbiqini yerli cinslərə həyata keçirmək daha məqbul olardı”.
Məhəmmədəli QƏRİBLİ
