Nicat Nəsirli: “İnkişaf etmiş ölkələrdə aqrar sahədə Könüllülər Hərəkatından müvəffəqiyyətlə istifadə olunur”
Azərbaycan müstəqillik əldə etdikdən sonra ölkəmizin güclü bir dövlətə çevrilməsində, insanların rifahının getdikcə yaxşılaşmasında könüllülər də mühüm rol oynayırlar. Xüsusilə son illərdə könüllülük hərəkatı respublikamızın davamlı inkişafının təmin olunmasında daha çox diqqət çəkir.
Könüllülük öz iradəsi və sərbəst seçimi əsasında, heç bir maddi xeyirə əsaslanmayan və cəmiyyətin rifahının daha da yaxşılaşdırılmasını qarşıya məqsəd qoyan sosial bir fəaliyyət istiqaməti hesab olunur. Yer üzündə yaşayan hər bir xalqın nəhəng və özünəməxsus könüllülük adət-ənənələri var. Eləcə də Azərbaycanda könüllülüyün qədim kökləri xalqımızın adət-ənənələrinin qorunmasına və milli-mənəvi dəyərlərimizin yeni nəsillərə çatdırılmasına əsaslanır.
Son illərdə ölkəmizin evsahibliyi etdiyi "Eurovision - 2012” mahnı müsabiqəsi, 2015-ci il Birinci Avropa Oyunları, 2017-ci il IV İslam Həmrəyliyi Oyunları, "Formula -1” və digər mötəbər və irimiqyaslı tədbirlərə on minlərlə könüllü cəlb olundu. Bu tədbirlərin keçirilməsi nəticəsində Azərbaycanın beynəlxalq miqyasa çıxarılacaq böyük potensiala malik, eyni zamanda, təcrübəli könüllü bazası formalaşdı.
Bu gün könüllülər hərəkatı tək beynəlxalq əhəmiyyətli tədbirlərin keçirilməsində iştirak etmir, eyni zamanda, qeyri-neft sektorunun inkişafı üçün zəruri sahələrdən biri olan aqrar sahədə də çalışır.
Məlumdur ki, bir neçə gün öncə Bakının Sabunçu rayonunun Pirşağı qəsəbəsində Kənd Təsərrüfatı Nazirliyinin əsaslı şəkildə yenidən qurulan Tərəvəzçilik Elmi-Tədqiqat İnstitutunun və “Kartof və tərəvəz toxumları istehsalı” kompleksinin açılışında iştirak edən Prezident İlham Əliyev qeyd edib ki, könüllülük öz iradəsi və sərbəst seçimi əsasında, heç bir maddi xeyirə əsaslanmayan və cəmiyyətin rifahının daha da yaxşılaşdırılmasını qarşıya məqsəd qoyan sosial bir fəaliyyət istiqaməti hesab olunur: “Yer üzündə yaşayan hər bir xalqın nəhəng və özünəməxsus könüllülük adət-ənənələri var. Eləcə də Azərbaycanda könüllülüyün qədim kökləri xalqımızın adət-ənənələrinin qorunmasına və milli-mənəvi dəyərlərimizin yeni nəsillərə çatdırılmasına əsaslanır. Azərbaycanda Aqrar İnkişaf Könüllüləri Hərəkatı başlayır. Əminəm ki, bu hərəkatın çox böyük gələcəyi olacaq”.
Aqrar sahə üzrə ekspert Nicat Nəsirli “Bakı-Xəbər”ə açıqlamasında qeyd etdi ki, Azərbaycanda Könüllülük Hərəkatının ikinci ən böyük məqsədi ondan ibarətdir ki, Sovet imperiyası dağılandan sonra kənd təsərrüfatı reytinqdən düşmüş sahə idi. Bu gün kənd təsərrüfatı ixtisasları elə də populyar deyil. Araşdırmalara görə, bu gün kənd təsərrüfatında istehsal fəaliyyəti ilə məşğul olanların yaş həddi təxminən 50-55 səviyyəsindədir. Bu da istehsalın kefiyyətli qurulmasında, uçot sisteminin düzgün qurulmasında ciddi problem yaradır. Nəzərə almaq lazımdır ki, bir gəncin potensialı ilə yaşı 50-dən yuxarı olan insanların faydalı iş əmsalı eyni ola bilməz. Azərbaycanda Könüllülük Hərəkatının yaradılmasında əsas məqsəd gənclər arasında kənd təsərrüfatına marağı artırmaqdır. Eyni zamanda, dünyada məşhur və tələb olunan ixtisasların Azərbaycanda təbliğinin həyata keçirilməsinə nail olmaq lazımdır”.
Həmsöhbətimiz onu da vurğuladı ki, Könüllülük Hərəkatı ilk dəfə birinci dünya müharibəsi ərəfəsində Amerikada formalaşıb: “O vaxtı Könüllülər Hərəkatının formalaşma məqsədi tam başqa idi. Minlərlə amerikalı könüllü şəkildə müharibəyə qatılmışdı. Sonrakı dövrlərdə isə Könüllülər Hərəkatı daha çox sosial-iqtisadi mahiyyət daşımağa başladı. Bu gün inkişaf etmiş ölkələrdə cəmiyyətin müxtəlif sahələrində Könüllülər Hərəkatından geniş istifadə olunur. Son illər isə Könüllülər Hərəkatı aqrar sahəyə maraq göstərir. Bunun da səbəbi kənd təsərrüfatında çalışanların sayının minlərlə olması və böyük əraziləri əhatə etməsidir. Bu gün inkişaf etmiş ölkələrdə aqrar sahədə Könüllülər Hərəkatından müvəffəqiyyətlə istifadə olunur. Sevindirici haldır ki, bu prosesə Azərbaycanda da start verilib”.
N.Nəsirli Könüllülər Hərəkatının Azərbaycanda hansı məqsədlərə çatmasının vacibliyi barədə məlumat verdi. O qeyd etdi ki, 1995-ci ildə torpaqlar özəlləşdiriləndən sonra ölkədə 1 milyon 300 mindən çox istehsalçı meydana çıxdı. Onların əksəriyyəti kiçik istehsalçılardır. Kiçik istehsalçıların da müxtəlif köməyə ehtiyac var: “Ümid edirəm ki, Könüllülər Hərəkatı istehsalçıların çoxsaylı ehtiyacının qarşılanması üçün müəyyən işlər görəcək. Onlara dövlət dəstəyinin verilməsi, məlumatlara çıxışı, elmi məlumatların əldə olunmasında hərəkatın rolu olacaq”.
Günel CƏLİLOVA
