Rəsul Cahangirli: “Rusiya üzərindən Şərqi Avropaya yük daşımaq daha çox vaxt tələb edir”
Çexiya şirkətləri Bakı-Tiflis-Qars (BTQ) dəmir yolu ilə yükdaşımalarda iştirak etməyə maraq göstərir. Bunu mətbuata açıqlamasında Çexiyanın sənaye və ticarət naziri Marta Novakova deyib. M.Novakova bildirib ki, hazırda Çexiyanın "Moravia Steel a.s." şirkəti BTQ dəmir yolunun modernləşdirilməsini davam etdirir.
Ümumilikdə, nəqliyyat və logistika sahəsindən danışan M.Novakova vurğulayıb ki, nəqliyyat infrastrukturunun modernləşdirilməsinə, avtomobil və dəmir yolları şəbəkəsinin yenidən qurulmasına yönəlmiş yeni layihələr böyük imkanlar təqdim edir.
Xatırladaq ki, 2017-ci il oktyabrın 30-da Bakı Beynəlxalq Dəniz Ticarət Limanında Bakı-Tiflis-Qars dəmir yolunun açılışı olub.
Qeyd edək ki, Dövlət Statistika Komitəsinin məlumatına əsasən, 2018-ci ildə Çexiya ilə Azərbaycan arasında əmtəə dövriyyəsi 1,04 milyard dollar təşkil edib. Azərbaycan məhsullarının ixracının payına 938,4 milyon dollar düşüb. 2017-ci illə müqayisədə ölkələr arasında əmtəə dövriyyəsi 36,5 faiz, Azərbaycan məhsullarının ixracı isə təqribən iki dəfə artıb.
Onu da qeyd edək ki, artıq get-gedə daha çox Avropa ölkəsi BTQ-nin imkanlarından yararlanmaq istəyir. Xüsusən də Mərkəzi və Şərqi Avropa ölkələri bu məsələdə fəallıq göstərirlər. BTQ-nin yükdaşımalarda hər keçən gün artan rolu və əhəmiyyəti bu baxımdan bir sıra ölkələri özünə cəlb edir. Çexiyanın Azərbaycanın regional layihəsinə olan marağının artması sadalanan məqamlardan irəli gəlir. Maraqlıdır, bəs ekspertlər bunu necə şərh edirlər?
Məsələyə münasibət bildirən ekspert Rəsul Cahangirlinin sözlərinə görə, son illər Azərbaycanla Çexiya arasında artan iqtisadi-ticarət əlaqələri bu ölkənin bir sıra layihələrə marağını artırıb: “Əvvəla Çexiya Şərqi Avropa ölkələri arasında iqtisadi inkişaf səviyyəsinə görə öncül mövqedədir. Nə Bolqarıstan, nə də Rumıniya, Macarıstan, Slovakiya Çexiya qədər iqtisadi tərəqqiyə nail olmayıb. Baxmayaraq ki, sözügedən ölkələr də Avropa İttifaqında təmsil olunurlar. Çexiyanın BTQ-yə maraq göstərməsi ondan irəli gəlir ki, sözügedən dəmir yolu vasitəsilə Orta Asiya bazarına daha qısa yolla çıxa bilər. Bu həm məsafəcə daha əlverişlidir, həm də digər parametrlərə görə Çexiya üçün əlverişlidir. BTQ imkan verir ki, Mərkəzi Asiya və digər regionlardan gələn yüklər Şərqi Avropa bazarına çıxarılsın. Ən azından, yüklərin Qara dəniz sahillərinə daşınması onlar üçün sərfəlidir. Çünki Rusiya üzərindən Şərqi Avropaya yük daşımaq daha çox vaxt tələb edir. Üstəlik, BTQ-də tətbiq olunan tranzit qiymətlər Çexiya üçün daha sərfəlidir. Başqa bir tərəfdən, nəqliyyat infrastrukturunun modernləşdirilməsində, avtomobil və dəmir yolları şəbəkəsinin yenidən qurulmasında Çexiya şirkətləri rəqabət qabiliyyətinə malikdirlər. Hesab edirəm ki, bu sahədə əlaqələrin genişlənməsi Çexiya üçün yeni imkanlar yarada bilər”.
Vidadi ORDAHALLI
