Rəsul Cahangirli: “Bu gün bizim əsas vəzifəmiz yerli istehsalı xarici bazarların təsirindən qorumaqla onun sürətli inkişafını təmin etməkdən ibarətdir”
Ümumdünya Ticarət Təşkilatının (ÜTT) katibliyinin təklifi ilə Azərbaycan hazırda bu təşkilata daxil olmaqla bağlı ikitərəfli əsasda danışıqlar aparır. Bunu xarici işlər nazirinin müavini Mahmud Məmməd-Quliyev deyib.
M.Məmməd-Quliyevin sözlərinə görə, bu günədək Azərbaycan nümayəndə heyətinin ÜTT işçi qrupu ilə görüşləri həm üzv ölkələrlə ikitərəfli danışıqlarla, həm də kənd təsərrüfatı üzrə çoxtərəfli danışıqlarla müşayiət olunub: "2018-ci ilin dekabrında keçirilmiş görüş zamanı isə Yaponiya, Braziliya, Norveç və digər ölkələrlə yalnız ikitərəfli danışıqlar aparılıb. Danışıqlar ilk növbədə mal və xidmət bazarlarına qarşılıqlı girişin təmin olunması məsələsinə həsr olunub”.
O bildirib ki, danışıqların növbəti mərhələsinin keçirilmə vaxtı yeni təkliflərin hazırlanması müddətindən asılıdır.
Eyni zamanda o, bu il hər hansı bir ölkə ilə danışıqların keçiriləcəyini də istisna etməyib.
Xatırladaq ki, Azərbaycan ÜTT-yə üzv ölkələrlə danışıqlara 2004-cü ildə başlayıb. Hazırda 13 ölkə ilə danışıqlar davam edir.
ÜTT-yə üzv olmaqla bağlı Azərbaycan hökuməti hələ 23 iyun 1997-ci il tarixdə bu quruma müraciət edib. Bu illər ərzində Azərbaycanın ÜTT-yə üzv olması ilə bağlı çoxtərəfli danışıqlar davam etdirilir. Azərbaycan üzrə ÜTT katibliyində yaradılmış İşçi Qrupun 2004-cü ildən başlayaraq ardıcıl olaraq toplantıları keçirilir. Bu illər ərzində Azərbaycan ÜTT-yə üzv olması məqsədilə çoxsaylı dövlətlə ikitərəfli danışıqlar aparır. Danışıqlar zamanı Azərbaycanın mal və xidmətlər bazarına çıxışına dair məsələlər müzakirə olunur, xüsusi əhəmiyyət kəsb edən sahələrin qorunması ilə bağlı zəruri tədbirlər görülür.
Bütün bu deyilənlərin fonunda, Azərbaycanla ÜTT arasında bu təşkilata daxil olmaqla bağlı ikitərəfli əsasda danışıqların aparılmasının hansı əhəmiyyəti var?
Sözügedən məsələni dəyərləndirən ekspert Rəsul Cahangirlinin fikrincə, danışıqların ikitərəfli əsasda aparılması bir sıra məsələlərin həllini sürətləndirə bilər: “Məsələ ondadır ki, tərəflər arasında müəyyən fərqli yanaşmalar var. Azərbaycan tərəfi ÜTT-yə daxil olmamasında əsas problem kimi iki əsas istiqaməti göstərir. Bunlardan biri kənd təsərrüfatına ayrılan yardımların həcmi ilə bağlıdır. Çünki hökumət əsaslandırır ki, Azərbaycanda məşğulluğun əsas təminatı kənd təsərrüfatı sektorudur. Bu sektorun inkişafı istiqamətində hələlik bundan sonrakı uzunmüddətli dövrdə subsidiyaya, yardımlara ehtiyac var. Digəri isə Azərbaycanın gəlirli ölkə olaraq quruma qəbul olunması ilə əlaqədardır. Azərbaycan məhz bu statusda quruma daxil olmaq istəmir. Rəsmi açıqlamalar da onu göstərir ki, bu şərtlər daxilində Azərbaycan bu quruma daxil olmaqda maraqlı deyil. Ümumilikdə, ÜTT ilə gedən danışıqlar prosesində bir çox ölkə ilə ikitərərfli razılaşmalar var. Hesab edirəm ki, bu müsbət haldır. Nəzərə almaq lazımdır ki, bu gün bizim əsas vəzifəmiz yerli istehsalı xarici bazarların təsirindən qorumaqla onun sürətli inkişafını təmin etməkdən ibarətdir. Real sektorun inkişafının indiki məsuliyyətli mərhələsində Azərbaycan hökumətinin ÜTT-yə üzvlüklə bağlı tutduğu mövqe tamamilə doğru bir mövqedir. Fikrimcə, sözügedən məsələdə tələsmək olmaz. O üzdən, sözügedən məsələdə düşünülmüş siyasət davam etdirilməlidir. Hesab edirəm ki, danışıqların ikitərəfli əsasda aparılması əhəmiyyətlidir”.
Vidadi OİRDAHALLI
