Aydın Hüseynov: “Bu məsələdə sahibkarların iqtisadi resurslara əlçatanlığı ilə yanaşı, dövlətin onlara göstərdiyi böyük qayğını və dəstəyi də xüsusi vurğulamalıyıq”
Dünya İqtisadi Forumunun Qlobal Rəqabətlilik Hesabatı tamamilə yeni metodologiya əsasında ictimaiyyətə təqdim edilib. Əvvəlki illərdən fərqli olaraq, hesabatın metodologiyası ciddi şəkildə dəyişdirilərək hesabata yeni indikatorlar daxil edilib.
Ümumilikdə, əvvəlki hesabatın 114 indikatorundan 84-ü (74 faizi) çıxarılıb, 68 yeni indikator isə daxil edilib. Beləliklə, hesabatda mövcud 98 indikatorun 70 faizi tamamilə yenidir. Qlobal trendlər nəzərə alınmaqla tamamilə yeni yanaşma əsasında hazırlanmasına baxmayaraq, Azərbaycan yeni dövrün ilk Qlobal Rəqabətlilik Hesabatında bir neçə indikator üzrə yüksək nəticələr əldə edib. Bu nəticələr Azərbaycanın gələcəkdə digər indikatorlar üzrə də daha yaxşı nəticələr əldə etməsi üçün yeni imkanlar açır.
Hesabatda diqqətçəkən məqamlardan biri də Azərbaycan dünyanın 140 ölkəsi arasında biznesin dinamikliyi reytinqi üzrə 31-ci yerdə qərarlaşmasıdır. Azərbaycanın biznesin dinamikliyi sahəsində belə uğura imza ataraq, 140 ölkə arasında 31-ci yerdə qərarlaşması nəyin hesabına mümkün ola bilib?
Millət vəkili Aydın Hüseynov qəzetimizə açıqlamasında bildirdi ki, Azərbaycan, digər sahələrdə olduğu kimi, bu uğura da düzgün yürüdülən siyasət sayəsində nail ola bilib: “Mən bu xüsusda həyata keçirilən bəzi islahatları və atılan mühüm addımları xüsusi olaraq vurğulamaq istərdim. Uğura aparan parametrlər sırasına ilk növbədə qanunvericilik bazasının təkmilləşdirilməsini aid edə bilərəm. Ölkədəki stabilliyi və sahibkarlara göstərilən qayğını da bu sıraya aid edə bilərik. Bilirsiniz ki, iqtisadiyyatın qanunlarına görə, kiçik və orta sahibkarlıq orta təbəqə deməkdir və iqtisadiyyatın dinamikliyini təmin edir. Son illər ərzində ölkəmizdə kiçik sahibkarlığın inkişafı sahəsində ciddi uğurlara imza atılıb. Onların fəaliyyətinin müasir standartlar çərçivəsində qurulması, ixrac, texnoloji dəstək və s. ilə bağlı problemlərin həlli bu istiqamətdə ciddi irəliləyişə səbəb olub. Dövlət qurumlarında biznesin təşkili üçün alınan icazələrlə bağlı sənədlərin araşdırılması müddətinin azaldılması, gömrük və vergi prosedurlarının sadələşməsi belə bir inkişafın yaranmasını səciyyələndirib. Biznesin dinamikliyinin yüksəlməsində dövlət tərəfindən verilən güzəştlərin də mühüm rolu olub. Eyni zamanda, sahibkarlara dövlət büdcəsində ayrılan güzəştli kreditlər də dinamikliyin artmasının əsas elementlərindən biri kimi qəbul edilə bilər. Bu məsələdə sahibkarların iqtisadi resurslara əlçatanlığı ilə yanaşı, dövlətin onlara göstərdiyi böyük qayğını və dəstəyi də xüsusi vurğulamalıyıq. Bütün bu sadalanan şərtlər təhlil olunarkən görünür ki, Azərbaycanın biznesin dinamikliyi reytinqində irəliləməsinin ciddi əsasları mövcud olub”.
Məhəmmədəli QƏRİBLİ
